Deuteronomy 22

Tsonga Xitsonga (Bibele) 1929

← Chapter 21 Jump to: Chapter 23 →

1“Kungakuloko u vona homu ya makwenu, hambi yi ri nyimpfu ya yena leyi lahlekeke, u nga tshuki u yi fularhela; u ta yi tlherisela eka makwenu.

2Loko makwenu a nga akanga kusuhi na wena; kumbe loko u nga n'wi tivi, u ta hlayisa xifuwo emutini wa wena; xi ta tshama eka wena, makwenu a ko a ta xi lava, hi kona u nga ta n'wi tlherisela xona.

3U ta endlisa sweswo hi mbhongolo ya yena, ni nguvu ya yena, ni xilo xin'wana ni xin'wana lexi makwenu a xi lahleke lexi u xi kumeke; u nga tshuki u xi fularhela.

4“Loko u vona mbhongolo ya makwenu, hambi homu ya yena loko yi wile endleleni, u nga tshuki u yi fularhela; u ta n'wi pfuna ku yi pfuxa.

5“Wansati a nga tshuki a ambala nguvu ya wanuna, ni wanuna a nga tshuki a ambala nguvu ya wansati; hikuva la endlaka xilo lexi, wa yila eka Yehovha, Xikwembu xa wena.

6“Kungakuloko u vona endleleni ya wena xisaka xa tinyanyana lexi nga emurhini, kumbe ehansi, xi ri ni mavondlo kumbe mandza, mana wa wona a ri karhi a alamela mavondlo, hambi mandza, u nga tshuki u teka mavondlo ni mana wa wona;

7u ta tshika mana wa wona a tihahela, kambe u nga titekela mavondlo, swi ri leswaku u kuma ku tsaka, ni leswaku masiku ya wena ma lehisiwa.

8“Kutakuloko u aka yindlu leyintshwa, u ta biyela lwangu ra wena leswaku u nga vekeli ngati endlwini ya wena, loko kumbe munhu a wa a ri ehenhla ka yona.

9“U nga tshuki u byala evhinyeni ya wena timbewu ta tinxakaxaka, leswaku timbewu hinkwato leti u ti byaleke ni mihandzu ya vhinya, u nga tshuki u tekeriwa swona.

10“U nga tshuki u rima hi homu leyi paniweke ni mbhongolo.

11“U nga tshuki u ambala nguvu leyi lukiweke hi voya bya tinyimpfu swin'we ni ntsembyana.

12“U ta rhungela madziva ematlhelweni ya mune ya nguvu leyi u yi funengelaka.

13“Kutakuloko munhu a tekile nsati kutani a yile eka yena, kambe a sungula ku n'wi venga,

14a n'wi vekela nandzu wa xivi lexikulu, a n'wi lumbeta hi swilo leswo biha, a ku: ‘Nsati loyi, ndzi n'wi tekile, ndzi yile eka yena kambe a ndzi n'wi kumanga a ri wanhwana!’

15Tata wa nsati loyi ni mana wa yena, va ta teka xikombiso xa vunhwana bya yena, va xi yisa eka vakulukumba va muti ehubyeni.

16Tata wa wansati u ta ku eka vakulukumba: ‘Ndzi nyikile n'wana wa mina eka munhu loyi leswaku a va nsati wa yena, kambe u n'wi vengile,

17kutani u n'wi vekile nandzu wa swilo leswo biha, u te: “A ndzi kumangi n'wana wa wena a ha ri wanhwana.” Kambe xikombiso xa vunhwana bya n'wana wa mina hi lexi.’ Kavaloko va ta tshandzavuta nceka emahlweni ka vakulukumba va muti.

18Vakulukumba va muti lowo va ta teka munhu loyi, va n'wi avanyisa.

19Kambe leswi a lumbeteke wanhwana wa Israele hi xilo lexo biha, va ta n'wi rihisa hi tixikele ta dzana ta silivhere, va ti nyika tata wa wansati loyi; kutani u ta va nsati wa yena hi masiku hinkwawo ya yena, a nga ka a nga n'wi hlongoli.

20Kambe kungakuloko mhaka leyi, yi tiyile, swi ri leswaku ku nga kumiwanga swa vunhwana eka nsati loyi,

21va ta humesa wansati enyangweni ya yindlu ya tata wa yena, kutani vanhu va muti wa yena va ta n'wi khandla hi maribye, a ko a fa, hikuva u endlile xivi lexikulu ngopfu eIsraeleni hi ku oswa endlwini ya tata wa yena. Hi sweswo u nga ta susa lowo biha exikarhi ka wena.

22“Kungakuloko va kuma wanuna a etlele ni wansati la tekiweke va ta fa havambirhi, wanuna la etleleke ni wansati, na yena wansati. U ta susisa sweswo lowo biha eIsraeleni.

23“Kungakuloko wanhwana a vutiwile, kutani a hlangana ni wanuna emutini, a etlela na yena,

24mi ta va humesa havambirhi enyangweni ya muti lowo, mi va khandla hi maribye va fa: wanhwana u ta fa hikuva a nga huwelelanga emutini, ni wanuna u ta fa hikuva u khomisile nsati wa warikwavo tingana. Sweswo u ta susa lowo biha exikarhi ka wena.

25“Kambe wanuna loko a hlangana emasin'wini ni wanhwana la vutiweke, kutani a n'wi sindzisa a etlela na yena, wanuna la etleleke na yena u ta fa, a ri yena ntsena.

26U nga ka u nga endli nchumu eka wanhwana, hikuva a nga na nandzu lowu faneleke rifu, swi kotisa ni loko munhu a pfukela makwavo hi matimba, a n'wi dlaya; i mhaka yin'we.

27Hikuva u n'wi kumile emasin'wini: wanhwana la vutiweke a huwelerile, kambe a ku tangi munhu ku n'wi ponisa.

28“Kungakuloko wanuna a hlangana ni wanhwana la nga vutiwangiki, kutani a n'wi khoma a etlela na yena, kambe va voniwile;

29wanuna la etleleke na yena u ta nyika tata wa wanhwana tixikele ta 50 ta silivhere, kutani u ta va nsati wa yena hikuva u n'wi sindzisile, a nga ka a nga n'wi tshiki eku hanyeni ka yena hinkwako.

30“Wanuna ni un'we a nga tshuki a teka nsati wa tata wa yena, ni ku funungula nguvu ya tata wa yena.

← Chapter 21 Jump to: Chapter 23 →