Deuteronomy 23

Tsonga Xitsonga (Bibele) 1929

← Chapter 22 Jump to: Chapter 24 →

1“La nga mutsheniwa, hambi hi ku kamiwa, hambi hi ku tsemiwa, a nga ka a nga ngheni enhlengeletanweni ya Yehovha.

2“La tswariweke hi lava nga tekanangiki a nga ka a nga ngheni enhlengeletanweni ya Yehovha: hambi ri ri rixaka ra yena ra vukhume, vatukulu va yena va nga ka va nga ngheni enhlengeletanweni ya Yehovha.

3“Vaamoni ni Vamowabu va nga ka va nga ngheni enhlengeletanweni ya Yehovha hambi rixaka ra vona ra vukhume ri nga ka ri nga ngheni enhlengeletanweni ya Yehovha; va nga ka va nga ngheni ni siku ni rin'we,

4hikuva a va hlangananga na n'wina hi vuswa ni mati endleleni, loko mi humile eEgipta, na swona hikuva va hakerile Balaama, n'wana Beyori, wa Petoro, muti wa Mesopotamiya, leswaku a ta eka wena a ku rhukana.

5Kambe Yehovha, Xikwembu xa wena, a nga rhandzanga ku yingisa Balaama, kutani Yehovha, Xikwembu xa wena, u ku hundzuluxele ku rhukana ku kateka, hikuva Yehovha, Xikwembu xa wena, a ku rhandzile.

6U nga tikarhati, ku va ni ku rhula na vona, hambi ku ri hi ku tsaka ka vona eku hanyeni ka wena hinkwako, hilaha ku nga heriki.

7“U nga tshuki u sandza Vaedomu, hikuva i vamakwenu; u nga sandzi Vaegipta, hikuva u luvele etikweni ra vona.

8Vana va vona va rixaka ra vunharhu va ta tiva ku nghena enhlengeletanweni ya Yehovha.

9“Kutakuloko u hume nyimpi, u nghene emixaxeni ku lwa ni valala va wena, u ta chava swilo hinkwaswo leswo biha.

10Kungakuloko ku tshama eka wena, munhu la nga tengangiki hikwalaho ka leswi n'wi humeleleke nivusiku, u ta huma emixaxeni; a nga ka a nga ngheni emixaxeni,

11nimadyambu u ta hlamba ematini, kutakuloko ri perile u ta tlhela a nghena emixaxeni.

12U ta va ni xivandla ehandle ka mixaxa; u ta huma kona loko u ya ehandle.

13U ta va ni xikomu etimpahleni ta wena, kutani loko u rhandza ku ya ehandle, u ta cela hi xikomu lexi, kambe loko u suka, u ta funengeta thyaka ra wena.

14Hikuva Yehovha, Xikwembu xa wena, a famba exikarhi ka mixaxa ya wena ku ku ponisa ni ku nyiketa valala va wena emavokweni ya wena; mixaxa ya wena yi ta va leyi hlawuriweke, Yehovha a nga tshuki a vona leswo biha eka wena, leswaku a nga suki eka wena.

15“U nga tshuki u nyiketa n'wini wa rona khumbi leri chaveleke eka wena loko ri balekele n'wini wa rona;

16ri ta tshama eka wena ni le tikweni ra wena exivandleni lexi ri nga ta xi hlawula, ni le mutini lowu ri nga ta wu rhandza; kambe u nga tshuki u ri xanisa.

17“Ku nga tshuki ku va ni wansati la nyiketiweke vuoswi exikarhi ka vanhwanyana va Israele, kambe ku nga tshuki ku va ni wanuna la nyiketiweke vuoswi exikarhi ka vana va Israele.

18“U nga tshuki u tisa endlwini ya Yehovha Xikwembu xa wena hakelo ya nsati wa mbhisa, hambi mali ya mbyana, ku tiyisa rito rin'wana ra ku hlambanya; hikuva swilo leswimbirhi swa yila eka Yehovha, Xikwembu xa wena.

19“U nga ka u nga lavi bindzu eka makwenu, hambiloko u n'wi lombile mali, hambi swakudya, hambi xilo xin'wana lexi lombiwaka hi bindzu.

20U nga lava bindzu eka wamatiko, kambe u nga ka u nga lavi bindzu eka makwenu, leswaku Yehovha Xikwembu xa wena a ku katekisa emitirhweni hinkwayo ya wena, etikweni leri u nga ta nghena eka rona ku ri fuma.

21“Kutakuloko u tibohile hi ku hlambanya eka Yehovha, Xikwembu xa wena, ku endla xilo, u nga tshuki u hlwela ku xi endla; hikuva Yehovha, Xikwembu xa wena, u ta swi lava eka wena, kutani u nga kumiwa u ri ni nandzu.

22Loko u nga tibohi hi ku hlambanya ku endla mhaka u nga ka u nga vi na nandzu.

23Kambe u fanele ku tiyisa rito leri humeke enon'wini wa wena, hilaha u hlambanyeke hakona eka Yehovha, Xikwembu xa wena, hi ku rhandza ka wena, ni laha u vuleke hakona hi nomu wa wena, u endla hakona.

24“Kungakuloko u nghena ensin'wini ya vhinya ya warikwenu, u ta dya mihandzu hi ku rhandza ka mbilu ya wena, u xurha, kambe u nga tshuki u nghenisa nchumu exirhundzwini xa wena:

25Kutakuloko u nghena emaveleni ya warikwenu, u ta tshova min'oko hi voko, kambe u nga tshuki u nghenisa sikela emaveleni ya warikwenu.

← Chapter 22 Jump to: Chapter 24 →