Ezra 1

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

Jump to: Chapter 2 →

1Aur sháh i Fárs Ḳhoras kí saltanat ke pahle sál meṉ, is liye ki Ḳhudáwand ká kalám jo Yarmiyáh kí zabání áyá thá púrá ho, Ḳhudáwand ne sháh i Fárs Ḳhoras ká dil ubhárá, so us ne apní tamám mamlukat meṉ manádí karáí, aur is mazmún ká farmán bhí likhá, ki

2Sháh i Fárs Ḳhoras yúṉ farmátá hai, ki Ḳhudáwand ásmán ke Ḳhudá ne zamín kí sab mamlukateṉ mujhe baḳhshí haiṉ, aur mujhe tákíd kí hai, ki maiṉ Yarúshalem meṉ jo Yahúdáh meṉ hai us ke liye ek maskan banáúṉ.

3Pas tumháre darmiyán jo koí us kí sárí qaum meṉ se ho, us ká Ḳhudá us ke sáth ho, aur wuh Yarúshalem ko jo Yahúdáh meṉ hai jáe, aur Ḳhudáwand Isráíl ke Ḳhudá ká ghar jo Yarúshalem meṉ hai banáe, (Ḳhudá wuhí hai.)

4Aur jo koí kisí jagah jaháṉ us ne qiyám kiyá báqí rahá ho, to usí jagah ke log chándí aur sone aur mál aur mawáshí se us kí madad kareṉ, aur ‘aláwa is ke, wuh Ḳhudá ke ghar ke liye jo Yarúshalem meṉ hai razá ke hadye deṉ.

5Tab Yahúdáh aur Binyamín ke ábáí ḳhándánoṉ ke sardár, aur káhin, aur Láwí, aur wuh sab jin ke dil ko Ḳhudá ne ubhárá, uṭhe, ki jákar Ḳhudáwand ká ghar, jo Yarúshalem meṉ hai, banáeṉ.

6Aur un sabhoṉ ne jo un ke paṛaus meṉ the, ‘aláwa un sab chízoṉ ke jo ḳhushí se dí gayíṉ, chándí ke bartanoṉ aur sone, aur asbáb, aur mawáshí, aur qímatí ashyá se un kí madad kí.

7Aur Ḳhoras bádsháh ne bhí Ḳhudáwand ke ghar ke un bartanoṉ ko nikalwáyá jin ko Nabúkadnazar Yarúshalem se le áyá thá aur apne deotáoṉ ke mandir meṉ rakkhá thá.

8In hí ko sháh i Fárs Ḳhoras ne ḳhazáṉchí Mitradát ke háth se nikalwáyá, aur un ko ginkar Yahúdáh ke amír Shesbazzar ko diyá.

9Aur un kí gintí yih hai: sone kí tís tháliyáṉ, aur chándí kí hazár tháliyáṉ, aur untís chhuriyáṉ,

10aur sone ke tís piyále, aur chándí ke dúsrí qism ke chár sau das piyále, aur âur qism ke bartan ek hazár.

11Sone aur chándí ke kull zurúf páṉch hazár chár sau the. Shesbazzar in sabhoṉ ko jab asírí ke log Bábul se Yarúshalem ko pahuṉcháe gaye le áyá.

Jump to: Chapter 2 →