Ezra 6

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 5 Jump to: Chapter 7 →

1Tab Dárá bádsháh ke hukm se Bábul ke us tawáríḳhí kutubḳháne meṉ, jis meṉ ḳhazáne dhare the, taftísh kí gayí.

2Chunáṉchi Aḳhmatá ke mahall meṉ jo Mádai ke súbe meṉ wáqi‘ hai ek túmár milá, jis meṉ yih hukm likhá húá thá:

3Ḳhoras bádsháh ke pahle sál, Ḳhoras bádsháh ne Ḳhudá ke ghar kí bábat jo Yarúshalem meṉ hai hukm kiyá, ki wuh ghar, ya‘ní wuh maqám jaháṉ qurbáníáṉ karte haiṉ, banáyá jáe, aur us kí bunyádeṉ mazbútí se ḍálí jáeṉ; us kí úṉcháí sáṭh háth, aur chauṛáí sáṭh háth ho;

4tin radde bhárí pattharoṉ ke, aur ek radda nayí lakṛí ká ho; aur ḳharch sháhí mahall se diyá jáe.

5Aur Ḳhudá ke ghar ke sone aur chándí ke bartan bhí jin ko Nabúkadnazar us haikal se jo Yarúshalem meṉ hai nikálkar Bábul ko láyá, wápas diye jáeṉ, aur Yarúshalem kí haikal meṉ apní apní jagah pahuṉcháe jáeṉ, aur tú un ko Ḳhudá ke ghar meṉ rakh dená.

6So tú, ai daryá pár ke hákim, Tatnai, aur Shatar Boznai, aur tumháre Afársakí rafíq jo daryá pár haiṉ, tum waháṉ se dúr raho:

7Ḳhudá ke is ghar ke kám meṉ dastandází na karo; Yahúdíoṉ ká hákim, aur Yahúdíoṉ ke buzurg, Ḳhudá ke ghar ko us kí jagah par ta‘mír kareṉ.

8‘Aláwa is ke, Ḳhudá ke is ghar ke banáne meṉ Yahúdíoṉ ke buzurgoṉ ke sáth tum ko kyá karná hai, so us kí bábat merá yih hukm hai; ki sháhí mál meṉ se, ya‘ní daryá pár ke ḳhiráj meṉ se, un logoṉ ko bilá tawaqquf ḳharch diyá jáe, táki un ko rukná na paṛe.

9Aur ásmán ke Ḳhudá kí soḳhtaní qurbáníoṉ ke liye, jis jis chíz kí un ko zarúrat ho, ya‘ní bachhṛe aur meṉḍhe aur halwán, aur jitná gehúṉ, aur namak, aur mai, aur tel, wuh káhin jo Yarúshalem meṉ haiṉ batáeṉ, wuh sab bilánág̣a roz ba roz un ko diyá jáe;

10táki wuh ásmán ke Ḳhudá ke huzúr ráhatangez qurbáníáṉ chaṛháeṉ, aur bádsháh aur sháhzádoṉ kí ‘umrdarází ke liye du‘á kareṉ.

11Maiṉ ne yih hukm bhí diyá hai, ki Jo shaḳhs is farmán ko badal de, us ke ghar meṉ se kaṛí nikálí jáe, aur use usí par chaṛhákar súlí dí jáe; aur is bát ke sabab se us ká ghar kúṛáḳhána baná diyá jáe.

12Aur wuh Ḳhudá jis ne apná nám waháṉ rakkhá hai, sab bádsháhoṉ aur logoṉ ko jo Ḳhudá ke us ghar ko jo Yarúshalem meṉ hai ḍháne kí g̣araz se is hukm ko badalne ke liye apná háth baṛháeṉ, g̣árat kare. Mujh Dárá ne hukm de diyá; is par baṛí koshish se ‘amal ho.

13Tab daryá pár ke hákim Tatnai, aur Shatar Boznai, aur un ke rafíqoṉ ne Dárá bádsháh ke farmán bhejne ke sabab se bilá tawaqquf us ke mutábiq ‘amal kiyá.

14So Yahúdíoṉ ke buzurg, Hajjaí nabí aur Zakariyáh bin ‘Ídú kí nubuwwat ke sabab se, ta‘mír karte aur kámyáb hote rahe. Aur unhoṉ ne Isráíl ke Ḳhudá ke hukm, aur Ḳhoras, aur Dárá, aur sháh i Fárs Artaḳhshashatá ke hukm ke mutábiq use banáyá aur tamám kiyá.

15So yih maskan Adár ke mahíne kí tísrí táríḳh meṉ Dárá bádsháh kí saltanat ke chhaṭe baras tamám húá.

16Aur baní Isráíl, aur káhinoṉ, aur Láwíoṉ, aur asírí ke báqí logoṉ ne ḳhushí ke sáth Ḳhudá ke ghar kí taqdís kí.

17Aur unhoṉ ne Ḳhudá ke ghar kí taqdís ke mauqa‘ par sau bail, aur do sau meṉḍhe, aur chár sau barre, aur sáre Isráíl kí ḳhatá kí qurbání ke liye, Isráíl ke qabíloṉ ke shumár ke mutábiq, bárah bakre chaṛháe.

18Aur jaisá Músá kí kitáb meṉ likhá hai, unhoṉ ne káhinoṉ ko un kí taqsím, aur Láwíoṉ ko, un ke faríqoṉ ke mutábiq, Ḳhudá kí ‘ibádat ke liye jo Yarúshalem meṉ hotí hai muqarrar kiyá.

19Aur pahle mahíne kí chaudahwíṉ táríḳh ko un logoṉ ne jo asírí se áe the ‘íd i fasah manáí;

20kyúṉki káhinoṉ aur Láwíoṉ ne yaktan hokar apne áp ko pák kiyá thá; wuh sab ke sab pák the; aur unhoṉ ne un sab logoṉ ke liye jo asírí se áe the, aur apne bháí káhinoṉ ke liye, aur apne wáste fasah ko zabh kiyá.

21Aur baní Isráíl ne jo asírí se lauṭe the aur un sabhoṉ ne jo Ḳhudáwand Isráíl ke Ḳhudá ke tálib hone ke liye us sarzamín kí ajnabí qaumoṉ kí najásatoṉ se alag ho gaye the, fasah kháyá.

22Aur ḳhushí ke sáth sát din tak fatírí roṭí kí ‘íd manáí; kyúṉki Ḳhudáwand ne un ko shádmán kiyá thá, aur sháh i Asúr ke dil ko un kí taraf máil kiyá thá, táki wuh Ḳhudá, ya‘ní Isráíl ke Ḳhudá ke maskan ke banáne meṉ un kí madad kare.

← Chapter 5 Jump to: Chapter 7 →