Ezra 4

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 3 Jump to: Chapter 5 →

1Jab Yahúdáh aur Binyamín ke dushmanoṉ ne suná, ki wuh jo asír húe the Ḳhudáwand Isráíl ke Ḳhudá ke liye haikal ko baná rahe haiṉ;

2to wuh Zarubbábul aur ábáí ḳhándánoṉ ke sardároṉ ke pás ákar un se kahne lage, ki Ham ko bhí apne sáth banáne do: kyúṉki ham bhí tumháre Ḳhudá ke tálib haiṉ, jaise tum ho, aur ham sháh i Asúr aur Asar Haddún ke dinoṉ se, jo ham ko yaháṉ láyá, us ke liye qurbání chaṛháte haiṉ.

3Lekin Zarubbábul, aur Yashú‘, aur Isráíl ke ábáí ḳhándánoṉ ke báqí sardároṉ ne un se kahá, ki Tumhárá kám nahíṉ, ki hamáre sáth hamáre Ḳhudá ke liye ghar banáo; balki ham áp hí milkar Ḳhudáwand Isráíl ke Ḳhudá ke liye use banáeṉge, jaisá sháh i Fárs Ḳhoras ne ham ko hukm kiyá hai.

4Tab mulk ke log Yahúdáh ke logoṉ kí muḳhálafat karne aur banáte waqt un ko taklíf dene lage.

5Aur sháh i Fárs Ḳhoras ke jíṭe jí, balki sháh i Fárs Dárá kí saltanat tak un ke maqsúd ko bátil rakhne ke liye un ke ḳhiláf mushíroṉ ko ujrat dete rahe.

6Aur Aḳhasúerus ke ‘ahd i saltanat, ya‘ní us kí saltanat ke shurú‘ meṉ unhoṉ ne Yahúdáh aur Yarúshalem ke báshindoṉ kí shikáyat likh bhejí.

7Phir Artaḳhshashatá ke dinoṉ meṉ Bishlám, aur Mitradát, aur Tábiel, aur us ke báqí rafíqoṉ ne sháh i Fárs Artaḳhshashatá ko likhá: un ká ḳhatt Arámí hurúf, aur Arámí zabán meṉ likhá thá.

8Rahúm díwán aur Shamsí munshí ne Artaḳhshashatá bádsháh ko Yarúshalem ke ḳhiláf yúṉ ḳhatt likhá:

9so Rahúm díwán, aur Shamsí munshí, aur un ke báqí rafíqoṉ ne jo Dínah aur Afársatkah, aur Tarfílah, aur Fárs, aur Arak, aur Bábul, aur Sosan, aur Dih, aur ‘Ailám ke the,

10aur báqí un qaumoṉ ne, jin ko us buzurg o sharíf Asnaffar ne pár lákar shahr i Sámariya aur daryá ke is pár ke báqí ‘iláqe meṉ basáyá thá, wag̣aira, wag̣aira, is ko likhá.

11Us ḳhatt kí naql jo unhoṉ ne Artaḳhshashatá bádsháh ke pás bhejá yih hai: Áp ke g̣ulám, ya‘ní wuh log jo daryá pár rahte haiṉ, wag̣aira;

12Bádsháh par raushan ho, ki Yahúdí log jo huzúr ke pás se hamáre darmiyán Yarúshalem meṉ áe haiṉ, wuh us bág̣í aur fasádí shahr ko baná rahe haiṉ; chunáṉchi díwároṉ ko ḳhatm aur bunyádoṉ kí marammat kar chuke haiṉ.

13So bádsháh par raushan ho jáe, ki agar yih shahr ban jáe, aur fasíl taiyár ho jáe, to wuh ḳhiráj, chungí, yá mahsúl nahíṉ deṉge, aur áḳhir bádsháhoṉ ko nuqsán hogá.

14So chúṉki ham huzúr ke daulatḳháne ká namak kháte haiṉ, aur munásib nahíṉ ki hamáre sámne bádsháh kí tahqír ho, is liye ham ne likhkar bádsháh ko ittilá‘ dí hai,

15táki huzúr ke bápdádá ke daftar kí kitáb meṉ taftísh kí jáe, to us daftar kí kitáb se huzúr ko ma‘lúm hogá, aur yaqín ho jáegá, ki yih shahr fitnaangez shahr hai, jo bádsháhoṉ aur súboṉ ko nuqsán pahuṉchátá rahá hai, aur qadím zamáne se us meṉ fasád barpá karte rahe haiṉ: isí sabab se yih shahr ujáṛ diyá gayá thá.

16Aur ham bádsháh ko yaqín diláte haiṉ ki agar yih shahr ta‘mír ho aur is kí fasíl ban jáe, to is súrat meṉ huzúr ká hissa daryá pár kuchh na rahegá.

17Tab bádsháh ne Rahúm díwán, aur Shamsí munshí, aur un ke báqí rafíqoṉ ko jo Sámariya aur daryá pár ke báqí mulk meṉ rahte haiṉ yih jawáb bhejá; ki Salám, wag̣aira.

18Jo ḳhatt tum ne hamáre pás bhejá wuh mere huzúr sáf sáf paṛhá gayá.

19Aur maiṉ ne hukm diyá aur taftísh húí, aur ma‘lúm húá, ki is shahr ne qadím zamáne se bádsháhoṉ se bag̣áwat kí hai, aur fitna aur fasád us meṉ hotá rahá hai.

20Aur Yarúshalem meṉ zoráwar bádsháh bhí húe haiṉ, jinhoṉ ne daryá pár ke sáre mulk par hukúmat kí hai, aur ḳhiráj, chungí aur mahsúl un ko diyá játá thá.

21So tum hukm járí karo, ki yih log kám band kareṉ, aur yih shahr na bane, jab tak merí taraf se farmán járí na ho.

22Ḳhabardár, is meṉ sustí na karná; bádsháhoṉ ke nuqsán ke liye ḳharábí kyúṉ baṛhne páe?

23Pas Artaḳhshashatá bádsháh ke ḳhatt kí naql Rahúm aur Shamsí munshí, aur un ke rafíqoṉ ke sámne paṛhí gayí, to wuh jald Yahúdíoṉ ke pás Yarúshalem ko gaye, aur jabr aur zor se un ko rok diyá.

24Tab Ḳhudá ke ghar ká jo Yarúshalem meṉ hai kám mauqúf húá; aur sháh i Fárs Dárá kí saltanat ke dúsre baras tak band rahá.

← Chapter 3 Jump to: Chapter 5 →