Ezra 9

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 8 Jump to: Chapter 10 →

1Jab yih sab kám ho chuke, to sardároṉ ne mere pás ákar kahá, ki Isráíl ke log, aur káhin, aur Láwí, in atráf kí qaumoṉ se alag nahíṉ rahe, kyúṉki Kan‘áníoṉ, aur Hittíoṉ, aur Farizzíoṉ, aur Yabúsíoṉ, aur ‘Ammoníoṉ, aur Moábíoṉ, aur Misríoṉ, aur Amoríoṉ ke se nafratí kám karte haiṉ;

2chunáṉchi unhoṉ ne apne aur apne beṭoṉ ke liye un kí beṭiyáṉ lí haiṉ; so muqaddas nasl in atráf kí qaumoṉ ke sáth ḳhalt malt ho gayí; aur sardároṉ aur hákimoṉ ká háth is badkárí meṉ sab se baṛhá húá hai.

3Jab maiṉ ne yih bát suní, to apne pairáhan aur apní chádar ko chák kiyá, aur sir aur dáṛhí ke bál noche, aur hairán ho baiṭhá.

4Tab wuh sab jo Isráíl ke Ḳhudá kí bátoṉ se káṉpte the asíroṉ kí is badkárí ke bá‘is mere pás jama‘ húe; aur maiṉ shám kí qurbání tak hairán baiṭhá rahá.

5Aur shám kí qurbání ke waqt maiṉ apná phaṭá pairáhan pahine, aur apní phaṭí chádar oṛhe húe apní sharmindagí kí hálat se uṭhá, aur apne ghuṭnoṉ par girkar Ḳhudáwand apne Ḳhudá kí taraf apne háth phailáe,

6aur kahá, Ai mere Ḳhudá, maiṉ sharminda húṉ, aur terí taraf, ai mere Ḳhudá, apná muṉh uṭháte mujhe láj átí hai; kyúṉki hamáre gunáh baṛhte baṛhte hamáre sir se baland ho gaye, aur hamárí ḳhatákárí ásmán tak pahuṉch gayí hai.

7Apne bápdádá ke waqt se áj tak ham baṛe ḳhatákár rahe; aur apní badkárí ke bá‘is ham, aur hamáre bádsháh, aur hamáre káhin, âur mulkoṉ ke bádsháhoṉ aur talwár, aur asírí, aur g̣árat, aur sharmindagí ke hawále húe haiṉ, jaisá áj ke din hai.

8Ab thoṛe dinoṉ se Ḳhudáwand hamáre Ḳhudá kí taraf se ham par fazl húá hai, táki hamárá kuchh baqiya bach nikalne ko chhúṭe, aur us ke makán i muqaddas meṉ ham ko ek khúṉṭí mile, aur hamárá Ḳhudá hamárí áṉkheṉ raushan kare, aur hamárí g̣ulámí meṉ ham ko kuchh tázagí baḳhshe.

9Kyúṉki ham to g̣ulám haiṉ; par hamáre Ḳhudá ne hamárí g̣ulámí meṉ ham ko chhoṛá nahíṉ; balki ham ko tázagí baḳhshne aur apne Ḳhudá ke ghar ko banáne, aur us ke khanḍaroṉ kí marammat karne, aur Yahúdáh aur Yarúshalem meṉ ham ko shahr i panáh dene ko Fárs ke bádsháhoṉ ke sámne ham par rahmat kí.

10Aur ab, ai hamáre Ḳhudá, ham is ke ba‘d kyá kaheṉ? kyúṉki ham ne tere un hukmoṉ ko tark kar diyá hai

11jo tú ne apne ḳhádimoṉ, ya‘ní nabíoṉ kí ma‘rifat farmáe; ki Wuh mulk jise tum mírás meṉ lene ko játe ho âur mulkoṉ kí qaumoṉ kí najásat aur nafratí kámoṉ ke sabab se nápák mulk hai, kyúṉki unhoṉ ne apní nápákí se us ko is sire se us sire tak bhar diyá hai.

12So tum apní beṭiyáṉ un ke beṭoṉ ko na dená, aur un kí beṭiyáṉ apne beṭoṉ ke liye na lená; aur na kabhí un kí salámatí yá iqbálmandí cháhná, táki tum mazbút bano, aur us mulk kí achchhí achchhí chízeṉ kháo, aur apní aulád ke wáste hamesha kí mírás ke liye use chhoṛ jáo.

13Aur hamáre bure kámoṉ aur baṛe gunáh ke bá‘is jo kuchh ham par guzrá, us ke ba‘d, ai hamáre Ḳhudá, dar háleki tú ne hamáre gunáhoṉ ke andáze se ham ko kam sazá dí, aur ham meṉ se aisá baqiya chhoṛá;

14kyá ham phir tere hukmoṉ ko toṛeṉ, aur un qaumoṉ se nátá joṛeṉ jo in nafratí kámoṉ ko kartí haiṉ? kyá tú ham se aisá g̣ussa na hogá, ki ham ko nest o nábúd kar de, yaháṉ tak ki na koí baqiya rahe, aur na koí bache?

15Ai Ḳhudáwand, Isráíl ke Ḳhudá, tú sádiq hai, kyúṉki ham ek baqiya haiṉ jo bach niklá hai, jaisá áj ke din hai; dekh, ham apní ḳhatákárí meṉ tere huzúr házir haiṉ; kyúṉki isí sabab se koí tere huzúr khaṛá rah nahíṉ saktá.

← Chapter 8 Jump to: Chapter 10 →