Ezra 3

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 2 Jump to: Chapter 4 →

1Jab sátwáṉ mahína áyá, aur baní Isráíl apne apne shahroṉ meṉ bas gaye, to log yaktan hokar Yarúshalem meṉ ikaṭṭhe húe.

2Tab Yashú‘ bin Yúsadaq aur us ke bháí jo káhin the, aur Zarubbábul bin Siyáltiel, aur us ke bháí, uṭh khaṛe húe, aur unhoṉ ne Isráíl ke Ḳhudá ká mazbah banáyá, táki us par soḳhtaní qurbáníáṉ chaṛháeṉ, jaisá mard i Ḳhudá Músá kí sharí‘at meṉ likhá hai.

3Aur unhoṉ ne mazbah ko us kí jagah par rakkhá; kyúṉki un atráf kí qaumoṉ ke sabab se un ko ḳhauf rahá; aur wuh us par Ḳhudáwand ke liye soḳhtaní qurbáníáṉ, ya‘ní subh aur shám kí soḳhtaní qurbáníáṉ chaṛháne lage.

4Aur unhoṉ ne nawishte ke mutábiq ḳhaimoṉ kí ‘íd manáí, aur roz kí soḳhtaní qurbáníáṉ gin ginkar, jaisá jis din ká farz thá, dastúr ke muwáfiq charháíṉ;

5us ke ba‘d dáimí soḳhtaní qurbání, aur naye chánd kí, aur Ḳhudáwand kí un sab muqarrara ‘ídoṉ kí jo muqaddas ṭhahráí gayí thíṉ, aur har shaḳhs kí taraf se aisí qurbáníáṉ chaṛháíṉ jo razá kí qurbání ḳhushí se Ḳhudáwand ke liye guzrántá thá.

6Sátweṉ mahíne kí pahlí táríḳh se wuh Ḳhudáwand ke liye soḳhtaní qurbáníáṉ chaṛháne lage. Par Ḳhudáwand kí haikal kí bunyád hanoz ḍálí na gayí thí.

7Aur unhoṉ ne mi‘mároṉ aur baṛhaiyoṉ ko naqdí dí, aur Saidáníoṉ aur Súríoṉ ko kháná píná aur tel diyá, táki wuh deodár ke laṭhe Lubnán se Yáfá ko samundar kí ráh se láeṉ, jaisá un ko sháh i Fárs Ḳhoras se parwána milá thá.

8Phir un ke Ḳhudá ke ghar meṉ jo Yarúshalem meṉ hai á pahuṉchne ke ba‘d, dúsre baras ke dúsre mahíne meṉ, Zarubbábul bin Siyáltiel, aur Yashú‘ bin Yúsadaq ne, aur un ke báqí bháí káhinoṉ, aur Láwíoṉ, aur sabhoṉ ne jo asírí se lauṭkar Yarúshalem ko áe the kám shurú‘ kiyá, aur Láwíoṉ ko jo bís baras ke aur us se úpar the muqarrar kiyá, ki Ḳhudáwand ke ghar ke kám kí nigrání kareṉ.

9Tab Yashú‘ aur us ke beṭe, aur bháí, aur Qadmíel aur us ke beṭe jo Yahúdáh kí nasl se the milkar uṭhe ki Ḳhudá ke ghar meṉ kárígaroṉ kí nigrání kareṉ; aur baní Hannadád bhí aur un ke beṭe aur bháí jo Láwí the un ke sáth the.

10So jab mi‘már Ḳhudáwand kí haikal kí bunyád ḍálne lage, to unhoṉ ne káhinoṉ ko apne apne pairáhan pahine, aur narsinge liye húe, aur Ásaf kí nasl ke Láwíoṉ ko jháṉjh liye húe khaṛá kiyá, ki sháh i Isráíl Dáúd kí tartíb ke mutábiq Ḳhudáwand kí hamd kareṉ.

11So wuh báham naubat ba naubat Ḳhudáwand kí sitáish aur shukrguzárí meṉ gá gákar kahne lage, ki Wuh bhalá hai, kyúṉki us kí rahmat hamesha Isráíl par hai. Jab wuh Ḳhudáwand kí sitáish kar rahe the, to sab logoṉ ne baland áwáz se na‘ra márá, is liye ki Ḳhudáwand ke ghar kí bunyád paṛí thí.

12Lekin káhinoṉ, aur Láwíoṉ, aur ábáí ḳhándánoṉ ke sardároṉ meṉ se bahut se ‘umrrasída log, jinhoṉ ne pahle ghar ko dekhá thá, us waqt jab is ghar kí bunyád un kí áṉkhoṉ ke sámne ḍálí gayí, to baṛí áwáz se chillákar rone lage; aur bahutere ḳhushí ke máre zor zor se lalkáre.

13So log ḳhushí kí áwáz ke shor aur logoṉ ke rone kí sadá meṉ imtiyáz na kar sake; kyúṉki log baland áwáz se na‘re már rahe the, aur áwáz dúr tak sunáí detí thí.

← Chapter 2 Jump to: Chapter 4 →