1 Corinthians 3

Xhosa 2024 (ITestamente Entsha)

← Chapter 2 Jump to: Chapter 4 →

1Nam ke, bazalwana, bendingenakuthetha kuni njengakwaboMoya; bendinokuthetha njengakwabenyama, njengakwabaziintsana kuKristu.

2Ndaniseza amasi, andaninika kudla kuqinileyo, kuba nibe ningekabi nakomelela, unangoku anikabi nako.

3Kuba nisengabenyama; oku nje kukhoyo phakathi kwenu umona, neenkani, neenkani, neembambaniso, aningabenyama na? Anihambi ngokwabantu na?

4Kuba xa uthile athi, Mna ndingokaPawulos; omnye ke athi, Mna ndingoka-Apolo; aningabenyama na?

5Engubani na yena uPawulos? engubani na yena uApolo? Ingabalungiseleli nje kuphela, enakholwa ngabo, njengokuba iNkosi yamnikayo ulowo nalowo?

6Mna ndatyala, uApolo wankcenkcesha; ke nguThixo owahlumisayo.

7Ngoko ke lowo utyalayo akalutho, nalowo unkcenkceshayo akalutho; ke nguThixo okhulisayo.

8Lowo utyalayo ke, nalowo unkcenkceshayo, banto-nye; kodwa elowo uya kwamkela owakhe umvuzo ngokukokwakhe ukubulaleka.

9Kuba singabasebenzi kunye noThixo; intsimi kaThixo nina, nisisakhiwo sikaThixo.

10Ngokobabalo lukaThixo endababalwa ngalo, ndithi, ngokomakhi osisilumko, ndibeke ilitye lesiseko, athi ke omnye akhe phezu kwalo; Ke elowo makakhangele ukuba uthini na ukwakha kwakhe phezu kwalo.

11Kuba akukho namnye unako ukubeka litye limbi lesiseko, nxamnye nelo libekwe kade, linguYesu onguKristu.

12Ukuba ke umntu wakha phezu kwesi siseko igolide, isilivere, amatye anqabileyo, imithi, ingca, iindiza;

13Umsebenzi walowo nalowo wobonakalaliswa; kuba loo mini iya kuwazisa, ngokuba iya kuvela inomlilo; nomsebenzi walowo nalowo, umlilo uya kuwucikida ubunjani bawo;

14Ukuba umsebenzi awawakhayo umntu phezu kwalo, uthe wahlala uhleli, wowamkela umvuzo.

15Ukuba umsebenzi womntu uthe watshiswa, wolahlekelwa ngumvuzo wakhe; ke yena okwakhe wosindiswa; kanti kungomlilo.

16Anazi na ukuba niyitempile kaThixo? Anazi na ukuba uMoya kaThixo umi ngaphakathi kwenu?

17Ukuba umntu uyayonakalisa itempile kaThixo, uThixo womonakalisa lowo; kuba itempile kaThixo ingcwele, niyitempile ke nina.

18Makungabikho namnye uzikhohlisayo. Ukuba ubani kuni uba usisilumko kweli hlabathi, makabe sisidenge, ukuze abe sisilumko.

19Kaloku ubulumko beli hlabathi bubudenge kuye uThixo; kuba kubhaliwe kwathiwa, Yena uyazibambisa izilumko kubuqhetseba bazo;

20kwathiwa kananjalo, iNkosi iyazazi izicamango zezilumko, ukuba azinto.

21Ngoko ke makungabikho namnye uqhayisa ngabantu; Ngokuba zonke izinto zezenu;

22nokuba nguPawulos, nokuba nguApolo, nokuba nguKefas, nokuba lihlabathi, nokuba bubomi, nokuba kukufa, nokuba zizinto ezingeneyo, nokuba zezizayo; zonke zezenu;

23Nina ke ningabakaKristu; noKristu ngokaThixo.

← Chapter 2 Jump to: Chapter 4 →