Revelation 14

Xhosa 2024 (ITestamente Entsha)

← Chapter 13 Jump to: Chapter 15 →

1Ndabona, nantso iMvana imi phezu kwentaba yeZiyon, kumi nayo ikhulu elinamanci mane anesine lamawaka, benalo igama loYise libhaliwe emabunzini abo.

2Ndeva izwi liphuma ezulwini, ngathi sisandi samanzi amaninzi, ngathi sisandi sendudumo enkulu;

3Baye bevuma ingoma engathi intsha, phambi kwetrone, naphambi kwezinto eziphilileyo zone, namadoda amakhulu; kwaye kungekho namnye unako ukuyifunda ingoma leyo, lingelilo ikhulu elinamanci mane anesine lamawaka, ababethengiwe emhlabeni.

4Aba ngabo bangadyobhekanga ngabafazi; ngokuba banyulu. Aba ngabo bayilandelayo iMvana apho isukuba isiya khona. Aba bathengwa bephuma ebantwini, baziintlahlela kuye uThixo nakuyo iMvana.

5Emlonyeni wabo akufunyanwanga nkohliso, kuba bengenakubekwa bala phambi kwetrone kaThixo.

6Ndabona esinye isithunywa sezulu, siphaphazela esazulwini samazulu, sineendaba ezilungileyo ezingunaphakade, ukuba sizishumayele kwabo bemiyo phezu komhlaba, nakwiintlanga zonke, nezizwe, neelwimi, nabantu;

7sisithi ngezwi elikhulu, Moyikeni uThixo, nimzukise; ngokuba lifikile ilixa lokugweba kwakhe; nimnqule lowo wenza izulu, nomhlaba, nolwandle, nemithombo yamanzi.

8Kwaza kwalandela esinye isithunywa sezulu, sisithi, Iwile, iwile iBhabheli, loo mzi mkhulu, ngokuba iseze zonke iintlanga ngewayini yomsindo wobuhenyu bayo.

9Saza esesithathu isithunywa sazilandela, sithetha ngezwi elikhulu, sisithi, Ukuba ubani ulinqula irhamncwa nomfanekiselo walo, walwamkela uphawu lwakhe ebunzini lakhe, nokuba kusesandleni sakhe;

10Lowo uya kusela kwiwayini yomsindo kaThixo, egalelwe kwindebe yokucaphuka, ingaxutywanga; uya kuthuthunjiswa ngomlilo nesulfure, phambi kwezithunywa ezingcwele, naphambi kweMvana.

11Unyuka umsi wokuthuthunjelwa kwawo, use emaphakadeni asemaphakadeni; abanakuphumla imini nobusuku, abo banqula irhamncwa nomfanekiselo walo, nabani na owamkelayo uphawu lwegama lalo.

12Nalu unyamezelo lwabangcwele, naba abayigcinayo imithetho kaThixo nokukholwa kuYesu.

13Ndaza ndeva ilizwi liphuma ezulwini lisithi kum: “Bhala uthi: ‘Banoyolo abo bafa bezinikele eNkosini, nemisebenzi yabo iyabalandela.

14Ndabona, nalo ilifu elimhlophe, efini apho kuhleli ofana noNyana woMntu, enesithsaba segolide entloko, ephethe irhengqa elibukhali esandleni sakhe.

15Kwaphuma esinye isithunywa sezulu etempileni, sidanduluka ngezwi elikhulu kulowo uhleli efini, sisithi, Lifake irhengqa lakho, uvune; ngokuba isivuno sehlabathi sivuthiwe.

16Lowo uhleli efini waliphosa irhengqa lakhe emhlabeni; wavunwa ke umhlaba.

17Kwaphuma nesinye isithunywa sezulu, siphuma etempileni esemazulwini, naso sinerhengqa elibukhali.

18Kwaphuma esinye isithunywa sezulu esibingelelweni, sinegunya phezu komlilo; sadanduluka ngezwi elikhulu kuleyo yayinerhengqa elibukhali, sisithi, Lifake irhengqa lakho elibukhali, uzihlanganise izihloko zomdiliya womhlaba; ngokuba iidiliya zayo zivuthiwe;

19Saza isithunywa saliphosa irhengqa laso emhlabeni, sawubutha umdiliya womhlaba, sawuphosa kwisixovulelo esikhulu sewayini yomsindo kaThixo.

20Isixovulelo eso saxovulwa ngaphandle komzi, kwaphuma igazi kwisixovulelo eso, lada lada lafika emikhaleni yamahashe, umgama wezitadiya eziliwaka elinamakhulu amathandathu.

← Chapter 13 Jump to: Chapter 15 →