Revelation 22

Xhosa 2024 (ITestamente Entsha)

← Chapter 21 Jump to:

1za sandibonisa umlambo wamanzi obomi, uqaqambile, ngathi ngumkhenkce, uphuma etroneni kaThixo neyeMvana.

2Phakathi kwesitrato sawo namacala omabini omlambo, kukho umthi wobomi, ovelisa iintlobo zeziqhamo ezilishumi elinambini, unika iinyanga ngeenyanga zonke isiqhamo sawo; abe amagqabi omthi lowo engawokuphilisa imimoya, izizwe.

3Akusayi kuba sabakho nasinye isiqalekiso; kodwa itrone kaThixo neyeMvana iya kubakho kuwo; abakhonzi bakhe bamkhonze;

4Aya kububona ubuso bakhe; negama lakhe liya kuba semabunzini abo.

5Akuyi kubakho busuku khona; abafuni sibane, nakukhanya kwelanga; ngokuba iNkosi uThixo iya kuzikhanyisela, zilawule ngonaphakade kanaphakade.

6Sathi kum, La mazwi athembekile, ayinyaniso; iNkosi, uThixo wabaprofeti abangcwele, yathuma isithunywa sayo sasemazulwini ukubabonisa abakhonzi bayo izinto ezimele ukubakho kamsinya.

7Yabona, ndiyeza kamsinya; unoyolo lowo uwagcinayo amazwi esiprofeto sayo le ncwadi.

8Mna, Yohane, ndingulowo ubezibona ezi zinto, eziva; Ndathi ndakuva, ndakubona, ndawa ndaqubuda phambi kweenyawo zesithunywa sezulu esandibonisa ezi zinto.

9Sithi kum, Lumka, ungenjenjalo; ngokuba ndingumkhonzi kunye nawe, nabazalwana bakho abaprofeti, nabo bawagcinayo amazwi ale ncwadi; qubuda kuThixo.

10Sathi kum, Musa ukuwatywina amazwi esiprofeto sale ncwadi; kuba ixesha likufuphi.

11Lowo ungongendawo makahlale engongendawo; nalowo uyinyhukunyhuku, makaselehlala eyinyhukunyhuku; lowo ulilungisa makahlale elilungisa; nongcwele makahlale ngcwele.

12Yabona, ndiyeza kamsinya; umvuzo wam unam, wokuba ndivuze elowo njengoko umsebenzi wakhe uya kuba njalo.

13Mna ndinguAlfa no-Omega, isiqalo nesiphelo, owokuqala nowokugqibela.

14Banoyolo abo bayenzayo imithetho yakhe, ukuze babe negunya kuwo umthi wobomi, bangene ngamasango kuwo umzi.

15Ngaphandle ke zizinja, nabakhafuli, nabenzi bombulo, nababulali, nabakhonzi bezithixo, nabo bonke ababuthandayo, ababenzayo ubuxoki.

16Mna, Yesu, ndasithuma isithunywa sam sasemazulwini, ukuba ndizingqine kuni ezi zinto ngawo amabandla. Mna ndiyingcambu nenzala kaDavide, ikhwezi eliqaqambileyo lokusa.

17uMoya nomtshakazi bathi, Yiza. Lowo uvayo makathi, Yiza. Lowo unxaniweyo makeze; nosukuba ethanda, makawathabathe amanzi obomi ngesisa.

18Kuba ndiyangqina kubo bonke abawevayo amazwi esiprofeto sale ncwadi, ukuba, Ukuba uthe umntu wongeza kwezo zinto, uThixo uya kongeza kuye izibetho ezibhaliweyo kule ncwadi;

19Ukuba ke uthe umntu wasusa kuwo amazwi encwadi yesi siprofeto, uThixo uya kusisusa isabelo sakhe encwadini yobomi, nakuwo umzi ongcwele, nakuzo izinto ezibhaliweyo kule ncwadi.

20Uthi lowo uzingqinayo ezi zinto, Ewe, ndiyeza kamsinya. Amen. Ewe, yiza, Nkosi Yesu.

21Ubabalo lweNkosi yethu uYesu Kristu malube nani nonke. Amen.

← Chapter 21 Jump to: