Judges 11

Chinese TTVR (現代台語譯本羅馬字版)

← Chapter 10 Jump to: Chapter 12 →

1Ki-lia̍t -lâng Iâ-hut-tha sī kiông-béng ê ióng-sū; i ê lāu-bú sī ki-lú, lāu-pē sī Ki-lia̍t.

2Ki-lia̍t ê bó͘ mā kā i siⁿ kúi-nā ê kiáⁿ; chiah-ê kiáⁿ tōa-hàn, chiū kā Iâ-hut-tha kóaⁿ--chhut-khì, kóng, “Lí bōe-ēng-tit pun goán lāu-pē ê châi-sán, in-ūi lí sī ki-lú siⁿ--ê.”

3Iâ-hut-tha chiū cháu-siám i ê hiaⁿ-tī, khì tòa tī Tô-pek tōe-khu; ū chi̍t-kóa húi-lūi óa-lâi Iâ-hut-tha hia, tè i chhut-ji̍p.

4Kè chi̍t tōaⁿ sî-kan, A-bûn -lâng kap Í-sek-lia̍t -lâng kau-chiàn.

5A-bûn -lâng kap Í-sek-lia̍t -lâng kau-chiàn ê sî, Ki-lia̍t ê tiúⁿ-ló khì Tô-pek tōe-khu chhiáⁿ Iâ-hut-tha tò--lâi.

6In tùi Iâ-hut-tha kóng, “Chhiáⁿ lí tò-lâi chòe goán ê chí-hui-koaⁿ, chhōa goán kap A-bûn -lâng kau-chiàn.”

7Iâ-hut-tha ìn Ki-lia̍t ê tiúⁿ-ló kóng, “Lín í-chêng kiám m̄-sī thó-ià góa, kā góa tùi goán lāu-pē ê ke kóaⁿ--chhut-lâi? Hiān-chāi lín tú-tio̍h hoān-lān, sī-án-chóaⁿ lâi chhē góa?”

8Ki-lia̍t ê tiúⁿ-ló tùi Iâ-hut-tha kóng, “Chiū-sī in-ūi án-ni, goán hiān-chāi tò-tńg-lâi chhē lí. Lí nā kap goán chòe-hé khì kap A-bûn -lâng kau-chiàn, lí chiū thang chòe goán ê léng-siù, koán-hat Ki-lia̍t só͘-ū ê chū-bîn.”

9Iâ-hut-tha tùi Ki-lia̍t ê tiúⁿ-ló kóng, “Lín nā ài góa tò-khì kap A-bûn -lâng kau-chiàn, Siōng Chú koh chiong in kau hō͘ góa, góa chiū beh chòe lín ê léng-siù.”

10Ki-lia̍t ê tiúⁿ-ló ìn Iâ-hut-tha kóng, “Siōng Chú choh-chèng, goán it-tēng chiàu lí ê ōe chòe.”

11Iâ-hut-tha kap Ki-lia̍t ê tiúⁿ-ló tò--khì, jîn-bîn chiū siat-li̍p i chòe léng-siù, chòe chí-hui-koaⁿ. Iâ-hut-tha tī Bí-su-pa chiong chiah-ê it-chhè ê ōe tùi Siōng Chú kóng chi̍t piàn.

12Iâ-hut-tha chhe sù-chiá khì kìⁿ A-bûn -lâng ê ông kóng, “Góa kap lí ū sím-mi̍h oan-siû, lí kèng-jiân lâi chhim-chiàm goán ê tōe?”

13A-bûn -lâng ê ông ìn Iâ-hut-tha ê sù-chiá kóng, “ Í-sek-lia̍t -lâng tùi Ai-ki̍p chiūⁿ--lâi ê sî, chiàm góa ê tōe, tùi A-lūn-hô kàu Ngá-phok-hô, koh kàu Iok-tàn-hô. Taⁿ lín tio̍h koai-koai-á chiong chiah-ê tōe hêng góa.”

14Iâ-hut-tha koh chhe sù-chiá khì kìⁿ A-bûn -lâng ê ông,

15kā i kóng, “ Iâ-hut-tha án-ni kóng, ‘ Í-sek-lia̍t -lâng pèng bô chiàm Mô͘-ap -lâng kap A-bûn -lâng ê tōe.

16Í-sek-lia̍t -lâng tùi Ai-ki̍p chiūⁿ--lâi ê sî, sī keng-kè khòng-iá kàu Âng-hái, lâi kàu Ka-te-su;

17hit-sî Í-sek-lia̍t -lâng chhe sù-chiá khì kìⁿ Í-tong -ông, chhiáⁿ i ún-chún in keng-kè i ê tōe, m̄-kú Í-tong -ông m̄-khéng. In koh chhe sù-chiá khì kìⁿ Mô͘-ap -ông, i mā m̄-chún; Í-sek-lia̍t -lâng chiū tòa tī Ka-te-su.

18In koh keng-kè khòng-iá, se̍h-kè Í-tong -tōe kap Mô͘-ap -tōe ê gōa-bīn, lâi kàu Mô͘-ap -tōe ê tang-pêng, tī A-lūn-hô hit-pêng chat-iâⁿ; bô ji̍p Mô͘-ap ê kéng-lāi, in-ūi A-lūn-hô sī Mô͘-ap ê pian-kài.

19Í-sek-lia̍t -lâng koh chhe lâng khì kìⁿ A-mô͘-lī -lâng Hi-si̍t-pún ê ông Se-hông, chhiáⁿ i ún-chún in keng-kè i ê tōe, khì in ka-kī ê só͘-chāi.

20M̄-kú Se-hông bô sìn-jīm Í-sek-lia̍t -lâng, m̄ hō͘ in keng-kè i ê kéng-kài, tian-tò chū-chi̍p i ê jîn-bîn, tī Ngá-cha̍p chat-iâⁿ, kap Í-sek-lia̍t -lâng kau-chiàn.

21Siōng Chú — Í-sek-lia̍t ê Siōng-tè chiong Se-hông kap i ê jîn-bîn kau tī Í-sek-lia̍t -lâng ê chhiú, Í-sek-lia̍t -lâng chiū kā in phah-pāi; tùi án-ni, Í-sek-lia̍t -lâng chiū tit-tio̍h hit tōe-khu A-mô͘-lī -lâng ê choân-tōe chòe sán-gia̍p.

22In tit-tio̍h A-mô͘-lī -lâng só͘-ū ê thó͘-tōe, tùi A-lūn-hô kàu Ngá-phok-hô, tùi khòng-iá kàu Iok-tàn-hô.

23“‘Siōng Chú — Í-sek-lia̍t ê Siōng-tè ūi-tio̍h I ê chú-bîn Í-sek-lia̍t chiong A-mô͘-lī -lâng kóaⁿ-cháu, lí mā beh chiàm chit-tè tōe sī--bô?

24Lí eng-kai khì chiàm-léng lí ê sîn-bêng Ki-boat sù hō͘ lí ê tōe. Siōng Chú — goán ê Siōng-tè siúⁿ-sù goán ê tōe, goán beh kò͘-siú.

25Lí kiám pí Mô͘-ap -ông Se-phoat ê kiáⁿ Pa-le̍k khah kiông? I m̄-káⁿ kap Í-sek-lia̍t -lâng kè-kàu, mā m̄-káⁿ kap in kau-chiàn.

26Í-sek-lia̍t -lâng tòa tī Hi-si̍t-pún, A-lô-ní, kap in hù-kūn ê chng-siā, í-ki̍p A-lūn hô-piⁿ hiah-ê siâⁿ, í-keng ū saⁿ-pah nî; hit-sî lín ná bô kā in chhiúⁿ--tńg-lâi?

27Góa bô tek-chōe lí, lí tian-tò beh kap góa kau-chiàn. Goān sím-phòaⁿ ê Siōng Chú kin-á-ji̍t tī Í-sek-lia̍t kap A-bûn ê tiong-kan chhâi-koat.’”

28M̄-kú A-bûn -lâng ê ông m̄-khéng thiaⁿ Iâ-hut-tha phài--khì ê lâng tùi i kóng ê ōe.

29Siōng Chú ê sîn lîm-kàu Iâ-hut-tha, i chiū keng-kè Ki-lia̍t kap Má-ná-se ê tōe-khu, tò-lâi Ki-lia̍t ê Bí-su-pa, koh tùi Bí-su-pa khì kàu A-bûn -lâng hia.

30Iâ-hut-tha tùi Siōng Chú hē-goān, kóng, “Lí nā chiong A-bûn -lâng kau tī góa ê chhiú,

31góa tùi A-bûn -lâng hia pêng-an tò--lâi ê sî, tùi goán tau ê mn̂g chhut-lâi gêng-chiap góa--ê, bô-lūn siáⁿ-lâng, góa it-tēng beh kā i hiàn chòe sio-hòa-chè kui Siōng Chú.”

32Iâ-hut-tha khì kap A-bûn -lâng kau-chiàn, Siōng Chú chiong in kau tī i ê chhiú.

33I chiong A-bûn -lâng thiat-tóe phah-pāi, tùi A-lô-ní kàu Bí-le̍k, ti̍t-kàu A-pek Ki-la-bêng, lóng-chóng kong-chhú jī-cha̍p chō siâⁿ, thâi-sí chin chōe lâng. Tùi án-ni, A-bûn -lâng chiū siū Í-sek-lia̍t -lâng chè-ho̍k.

34Iâ-hut-tha tò-lâi Bí-su-pa kàu ka-kī ê chhù, hit-sî, i ê cha-bó͘-kiáⁿ gia̍h lin-long-kó͘ thiàu-bú chhut-lâi gêng-chiap i; chit-ê cha-bó͘ gín-á sī i ko͘-siⁿ ê cha-bó͘-kiáⁿ.

35Iâ-hut-tha khòaⁿ-tio̍h i, chiū thiah-li̍h saⁿ, kóng, “Ài ah, góa ê cha-bó͘-kiáⁿ, lí hō͘ góa chin ûi-lân, hō͘ góa chin kan-khó͘-sim; in-ūi góa í-keng tùi Siōng Chú kóng chhut-chhùi, bōe-tàng siu-hôe.”

36I ìn kóng, “A-pa, lí í-keng tùi Siōng Chú hē-goān, tio̍h chiàu lí só͘ kóng--ê tùi góa án-ni chòe; in-ūi Siōng Chú í-keng tī lí ê tùi-te̍k A-bûn -lâng sin-chiūⁿ thòe lí pò-siû.”

37I koh tùi i ê lāu-pē kóng, “Ū chi̍t hāng tāi-chì kiû lí ún-chún, chhiáⁿ iông-ún góa nn̄g kò-ge̍h, hō͘ góa kap góa ê tâng-phōaⁿ khì soaⁿ--ni̍h, ūi-tio̍h góa tio̍h chi̍t-sì-lâng chòe chāi-sek-lú thî-khàu.”

38Iâ-hut-tha kóng, “Hó, lí khì!” Iâ-hut-tha chiū chún i khì nn̄g kò-ge̍h, kap i ê tâng-phōaⁿ tī soaⁿ--ni̍h ūi-tio̍h i chi̍t-sì-lâng chòe chāi-sek-lú thî-khàu.

39Nn̄g ge̍h-ji̍t āu, i tò-lâi i ê lāu-pē hia, i ê lāu-pē chiū chiàu só͘ hē ê goān tùi-thāi i; i lóng bô kiat-hun. Āu-lâi, Í-sek-lia̍t ū chi̍t ê hong-sio̍k:

40Ta̍k-nî ū sì ji̍t, Í-sek-lia̍t ê cha-bó͘ gín-á ōe chhut-khì tui-tō Ki-lia̍t -lâng Iâ-hut-tha ê cha-bó͘-kiáⁿ.

← Chapter 10 Jump to: Chapter 12 →