Judges 13

Chinese TTVR (現代台語譯本羅馬字版)

← Chapter 12 Jump to: Chapter 14 →

1Í-sek-lia̍t -lâng koh chòe Siōng Chú khòaⁿ-chòe pháiⁿ ê sū; Siōng Chú kā in kau tī Hui-lī-sū -lâng ê chhiú sì-cha̍p nî.

2Hit-sî, ū chi̍t ê Tān chi-cho̍k ê Só-la -lâng, kiò-chòe Má-ná-a; i ê bó͘ bô hoâi-īn, bô siⁿ.

3Siōng Chú ê sù-chiá tùi hit-ê hū-jîn-lâng hián-hiān, kā i kóng, “Lí í-chêng bōe hoâi-īn, bōe siⁿ-kiáⁿ, m̄-kú hiān-chāi lí beh hoâi-īn siⁿ chi̍t ê kiáⁿ.

4Só͘-í lí tio̍h sòe-jī, po̍h-chiú kāu-chiú m̄-thang lim, lu̍t-hoat kui-tēng bô chheng-khì ê mi̍h lóng m̄-thang chia̍h.

5Lí beh hoâi-īn siⁿ chi̍t ê kiáⁿ, m̄-thang kā i thì-thâu; in-ūi chit-ê gín-á tùi thai--ni̍h chiū kui Siōng-tè chòe Ná-sè-ní-lâng; i beh khai-sí kái-kiù Í-sek-lia̍t -lâng thoat-lī Hui-lī-sū -lâng ê chhiú.”

6Hū-jîn-lâng khì kā i ê tiōng-hu kóng, “Ū chi̍t ê Siōng-tè tiōng-iōng ê lâng lâi góa chia, i ê iông-māu chhin-chhiūⁿ Siōng-tè ê sù-chiá, hō͘ lâng kiaⁿ-ùi. Góa bô mn̄g i tùi tó-ūi lâi, i mā bô kā góa kóng i ê miâ;

7m̄-kú i tùi góa kóng, ‘Lí beh hoâi-īn siⁿ chi̍t ê kiáⁿ, só͘-í po̍h-chiú kāu-chiú m̄-thang lim, bô chheng-khì ê mi̍h lóng m̄-thang chia̍h, in-ūi chit-ê gín-á tùi thai--ni̍h kàu i sí hit-ji̍t, beh kui Siōng-tè chòe Ná-sè-ní-lâng.’”

8Má-ná-a chiū kiû Siōng Chú kóng, “Chú ah, kiû lí hō͘ lí só͘ chhe Siōng-tè tiōng-iōng ê lâng koh lâi goán chia, thang kàu-tō goán án-chóaⁿ tùi-thāi chit-ê teh-beh chhut-sì ê gín-á.”

9Siōng-tè thiaⁿ Má-ná-a ê khún-kiû. Hū-jîn-lâng chē tī hn̂g--ni̍h ê sî, Siōng-tè ê sù-chiá koh lâi i hia; m̄-kú i ê tiōng-hu Má-ná-a bô kap i chòe-hé.

10Hū-jîn-lâng kóaⁿ-kín cháu-khì pò i ê tiōng-hu, kā i kóng, “Hit-ji̍t lâi góa chia hit-ê lâng koh tùi góa hián-hiān.”

11Má-ná-a kóaⁿ-kín tè i ê bó͘ khì hit-ê lâng hia, tùi i kóng, “Lí kiám sī tùi goán bó͘ kóng-ōe hit-ê lâng?” I kóng, “Sī.”

12Má-ná-a kóng, “Lí ê ōe si̍t-hiān liáu-āu, goán tio̍h án-chóaⁿ kà chit-ê gín-á? I tio̍h siú sím-mi̍h kui-kú?”

13Siōng Chú ê sù-chiá tùi Má-ná-a kóng, “Góa kā chit-ê hū-jîn-lâng kóng ê tāi-chì, i lóng tio̍h kín-sīn;

14só͘-ū phû-tô-chhiū chhut ê mi̍h m̄-thang chia̍h, po̍h-chiú kāu-chiú m̄-thang lim, it-chhè bô chheng-khì ê mi̍h mā m̄-thang chia̍h. Góa kā i hoan-hù--ê, i lóng tio̍h chun-siú.”

15Má-ná-a tùi Siōng Chú ê sù-chiá kóng, “Chhiáⁿ lâu--lo̍h-lâi, hō͘ goán thang chún-pī chi̍t chiah soaⁿ-iûⁿ-á chhiáⁿ lí.”

16Siōng Chú ê sù-chiá kā Má-ná-a kóng, “Lí kā góa lâu--lo̍h-lâi, góa mā bōe chia̍h lí ê mi̍h-kiāⁿ. Lí nā beh hiàn sio-hòa-chè, tio̍h hiàn hō͘ Siōng Chú.” Má-ná-a m̄ chai i sī Siōng Chú ê sù-chiá.

17Má-ná-a tùi Siōng Chú ê sù-chiá kóng, “Chhiáⁿ kā góa kóng lí ê tōa miâ. Lí ê ōe si̍t-hiān ê sî, goán thang pò-tap lí.”

18Siōng Chú ê sù-chiá kā i kóng, “Lí bô eng-kai mn̄g góa ê miâ. Góa ê miâ sī kî-biāu, oh-tit lí-kái.”

19Má-ná-a chiong chi̍t chiah soaⁿ-iûⁿ-á kap sò͘-chè, tī chio̍h-pôaⁿ téng hiàn hō͘ Siōng Chú; hit-sî, Má-ná-a kap i ê bó͘ khòaⁿ-kìⁿ chi̍t hāng kî-biāu ê sū.

20Hé-iām tùi tôaⁿ-téng chhèng-chiūⁿ thiⁿ ê sî, Siōng Chú ê sù-chiá mā tùi chio̍h-pôaⁿ téng ê hé-iām tiong chiūⁿ--khì. Má-ná-a kap i ê bó͘ khòaⁿ--kìⁿ, chiū phak tī thô͘-kha.

21Siōng Chú ê sù-chiá bô koh chhut-hiān hō͘ Má-ná-a kap i ê bó͘ khòaⁿ--kìⁿ, Má-ná-a chiah chai i sī Siōng Chú ê sù-chiá.

22Má-ná-a kā i ê bó͘ kóng, “Lán it-tēng ōe sí, in-ūi lán ū khòaⁿ-kìⁿ Siōng-tè.”

23I ê bó͘ kā i kóng, “Siōng Chú nā beh hō͘ lán sí, it-tēng bōe chiap-la̍p lán hiàn ê sio-hòa-chè kap sò͘-chè, bōe hō͘ lán khòaⁿ-kìⁿ chiah-ê tāi-chì, mā bōe tī chit-chūn hō͘ lán thiaⁿ-tio̍h chiah-ê ōe.”

24Āu-lâi, hū-jîn-lâng siⁿ chi̍t ê kiáⁿ, kā i hō-miâ kiò-chòe Chham-sun; gín-á tōa-hàn, Siōng Chú sù-hok i.

25Tī Só-la kap Í-si̍t-tô tiong-kan ê Má-hap-nî Tān, Siōng Chú ê sîn khai-sí chhiong-móa i.

← Chapter 12 Jump to: Chapter 14 →