Judges 3

Chinese TTVR (現代台語譯本羅馬字版)

← Chapter 2 Jump to: Chapter 4 →

1Siōng Chú lâu chiah-ê cho̍k, sī beh chhì-giām hiah-ê m̄-bat keng-le̍k Ka-lâm chiàn-cheng ê Í-sek-lia̍t -lâng;

2beh hō͘ Í-sek-lia̍t ê hō͘-tāi, chiū-sī hiah-ê m̄-bat keng-le̍k chiàn-cheng ê lâng, chai koh ha̍k-si̍p kau-chiàn.

3Lâu--lo̍h-lâi ê cho̍k, ū gō͘ ê Hui-lī-sū ê léng-siù, só͘-ū ê Ka-lâm -lâng, Se-tùn -lâng, kap tòa tī Pa-le̍k Hek-bûn-soaⁿ kap Hap-má ài-kháu tiong-kan ê Lê-pa-lūn-soaⁿ ê Hi-bī -lâng.

4Lâu chiah-ê sī beh ēng in lâi chhì-giām Í-sek-lia̍t -lâng, khòaⁿ in khéng thiaⁿ-thàn Siōng Chú thong-kè Mô͘-se bēng-lēng in lia̍t-chó͘ ê kài-bēng á bô.

5Tùi án-ni, Í-sek-lia̍t -lâng tòa tī Ka-lâm -lâng, Hek -lâng, A-mô͘-lī -lâng, Pí-lī-sé -lâng, Hi-bī -lâng, Iâ-pò͘-su -lâng ê tiong-kan;

6chhōa in ê cha-bó͘-kiáⁿ choh-bó͘; mā chiong cha-bó͘-kiáⁿ kè hō͘ in ê kiáⁿ, sòa khì ho̍k-sāi in hiah-ê sîn-bêng.

7Í-sek-lia̍t -lâng chòe Siōng Chú khòaⁿ-chòe pháiⁿ ê sū, bōe-kì-tit Siōng Chú — in ê Siōng-tè, khì ho̍k-sāi chiah-ê Pa-le̍k kap A-sià-la.

8Siōng Chú chiū tùi Í-sek-lia̍t -lâng hoat tōa siū-khì, chiong in kau hō͘ Bí-soh-put-ta̍t-bí-a -ông Kó͘-san Lī-sat-tiân; Í-sek-lia̍t -lâng ho̍k-sāi Kó͘-san Lī-sat-tiân poeh nî.

9Í-sek-lia̍t -lâng kiû-kiò Siōng Chú, Siōng Chú chiū ūi-tio̍h in heng-khí chi̍t ê chín-kiù-chiá kái-kiù in, chiū-sī Ka-le̍k ê sió-tī Ki-la̍p-su ê kiáⁿ Gô-tô-liap.

10Siōng Chú ê sîn lîm-kàu i, i chiū chòe Í-sek-lia̍t ê sū-su. I chhut-khì kau-chiàn, Siōng Chú chiong Bí-soh-put-ta̍t-bí-a -ông Kó͘-san Lī-sat-tiân kau tī i ê chhiú, i chiū thâi-iâⁿ Kó͘-san Lī-sat-tiân.

11Hit-ê tōe-khu chiū thài-pêng sì-cha̍p nî. Āu-lâi, Ki-la̍p-su ê kiáⁿ Gô-tô-liap sí.

12Í-sek-lia̍t -lâng koh chòe Siōng Chú khòaⁿ-chòe pháiⁿ ê sū. In-ūi in án-ni chòe, Siōng Chú hō͘ Mô͘-ap -ông I-ki-lûn kiông-sēng, kong-táⁿ Í-sek-lia̍t -lâng.

13I-ki-lûn tiàu-chi̍p A-bûn -lâng kap A-má-le̍k -lâng lâi i hia, khì kong-táⁿ Í-sek-lia̍t -lâng, chiàm Chang-chhiū-siâⁿ Iâ-lī-ko.

14Tùi án-ni, Í-sek-lia̍t -lâng ho̍k-sāi Mô͘-ap -ông I-ki-lûn cha̍p-poeh nî.

15Í-sek-lia̍t -lâng kiû-kiò Siōng Chú, Siōng Chú chiū ūi-tio̍h in heng-khí chi̍t ê chín-kiù-chiá, chiū-sī Piān-ngá-bín -lâng Ki-la ê kiáⁿ Í-hut; i koàn-sì ēng tò-chhiú. Í-sek-lia̍t -lâng phài i khì kā Mô͘-ap -ông I-ki-lûn chìn-kòng.

16Í-hut phah chi̍t ki siang-bīn-lāi ê kiàm, tn̂g pòaⁿ kong-chhioh, pa̍k tī chiàⁿ-thúi ēng saⁿ khàm--teh.

17I tòa lé-mi̍h khì kìⁿ Mô͘-ap -ông I-ki-lûn; I-ki-lûn chin tōa-kho͘.

18Í-hut hiàn lé-mi̍h liáu-āu, chiū kiò kng lé-mi̍h ê lâng tò--khì.

19I ka-kī tùi óa-kūn Kiat-kah phah chio̍h-siōng ê só͘-chāi oa̍t tò-tńg lâi tùi ông kóng, “Ông, góa ū pì-bi̍t ê sū beh kā lí pò-kò.” Ông kóng, “Hôe-pī!” Hiah-ê sū-hāu ông ê lâng chiū lóng thè-chhut.

20Hit-sî ông ka-kī chi̍t ê chē tī chheng-liâng ê lâu-téng; Í-hut kiâⁿ óa--khì, tùi i kóng, “Siōng-tè ū ōe kau-tài góa kā lí kóng.” Ông chiū tùi chō-ūi khiā--khí-lâi.

21Í-hut chiū chhun tò-chhiú, tùi chiàⁿ-thúi pu̍ih kiàm chhut--lâi, chha̍k-ji̍p ông ê pak-tó͘,

22liân kiàm ê pìⁿ mā sòa chha̍k--ji̍p-khì; kiàm hō͘ iû kā-tiâu. Í-hut bô chiong kiàm tùi ông ê pak-tó͘ pu̍ih--chhut-lâi, ông ê sái lâu--chhut-lâi.

23Í-hut chhut-lâi cháu-lông, chiong lâu-téng ê mn̂g koaiⁿ--khí-lâi, só--teh.

24I chhut-khì liáu, ông ê pō͘-hā lâi, khòaⁿ-tio̍h lâu-téng ê mn̂g koaiⁿ--teh koh só--teh, chiū kóng, “I it-tēng sī tī chheng-liâng ê lâu-téng teh tāi-piān.”

25In thèng-hāu kàu sim tio̍h-kip, khòaⁿ-tio̍h i bô khui lâu-téng ê mn̂g, chiū gia̍h só-sî lâi khui. Ài ah, in ê chú-lâng kèng-jiân tó tī thô͘-kha, sí tī hia.

26Tī in thoa-iân ê sî, Í-hut í-keng tô-cháu, kè phah chio̍h-siōng ê só͘-chāi, cháu kàu Se-i-la.

27Í-hut kàu Í-hoat-liân soaⁿ-khu ê Se-i-la, chiū pûn sàu-kak; Í-sek-lia̍t -lâng tùi soaⁿ-khu lo̍h-khì tè i, i chiū kiâⁿ tī in ê thâu-chêng léng-tō in.

28I tùi in kóng, “Lín lâi tè góa, in-ūi Siōng Chú í-keng chiong lín ê tùi-te̍k Mô͘-ap -lâng kau tī lín ê chhiú.” In tè i lo̍h--khì, kong-chhú Mô͘-ap tùi-bīn ê Iok-tàn-hô tō͘-thâu, m̄-chún lâng kè hô.

29Hit-ji̍t, in thâi-sí Mô͘-ap -lâng tāi-iok chi̍t-bān, lóng sī kiông-béng ê ióng-sū, bô chi̍t ê tô-thoat.

30Tùi án-ni, Mô͘-ap -lâng chiū siū Í-sek-lia̍t -lâng chè-ho̍k; hit-ê tōe-khu thài-pêng poeh-cha̍p nî.

31Í-hut í-āu, A-ná ê kiáⁿ San-ka ēng kóaⁿ-gû ê chhì-kùn phah-sí la̍k-pah ê Hui-lī-sū -lâng. I mā kái-kiù Í-sek-lia̍t -lâng.

← Chapter 2 Jump to: Chapter 4 →