Judges 5

Chinese TTVR (現代台語譯本羅馬字版)

← Chapter 4 Jump to: Chapter 6 →

1Hit-ji̍t, Tí-pho-la kap A-pí-lô-am ê kiáⁿ Pa-la chhiùⁿ-koa, kóng:

2Í-sek-lia̍t tiong ū léng-siù chhōa-thâu, jîn-bîn kam-goān hi-seng, lín tio̍h chheng-chàn Siōng Chú!

3Kun-ông ah, tio̍h thiaⁿ! Thóng-tī-chiá ah, tio̍h àⁿ hī-khang thiaⁿ! Góa beh ǹg Siōng Chú chhiùⁿ-koa; góa beh chhiùⁿ-koa chheng-chàn Siōng Chú — Í-sek-lia̍t ê Siōng-tè.

4Siōng Chú lí tùi Se-ní chhut-hoat, tùi Í-tong ê tōe chiân-chìn; hit-sî tāi-tōe iô-choah, thiⁿ piàⁿ-chúi, hûn lo̍h tōa-hō͘.

5Chèng-soaⁿ tī Se-nāi-soaⁿ ê Siōng Chú bīn-chêng tōng-iâu, tī Siōng Chú — Í-sek-lia̍t Siōng-tè ê bīn-chêng iô-choah.

6Tī A-ná ê kiáⁿ San-ka ê sî, tī Ngá-ek ê ji̍t, siong-tūi bô koh tùi hia keng-kè, lú-hêng ê lâng oat-khì kiâⁿ sió-lō͘.

7Í-sek-lia̍t lông-chhoan pha-hng, lóng bô lâng tòa, kàu góa Tí-pho-la khí--lâi, khí-lâi chòe Í-sek-lia̍t ê lāu-bú.

8Í-sek-lia̍t kéng sin ê sîn-bêng, chiàn-cheng chiū lâi kàu in ê siâⁿ-mn̂g. Hit-sî Í-sek-lia̍t sì-bān lâng ê tiong-kan, khòaⁿ bōe tio̍h tún-pâi kap chhiuⁿ.

9Góa ê sim ì-hiòng Í-sek-lia̍t ê léng-siù, ì-hiòng kam-goān hi-seng ê jîn-bîn. Lín tio̍h chheng-chàn Siōng Chú!

10Khiâ pe̍h-sek lû-bú--ê, chē bé-oaⁿ--ê, lú-hêng ê lâng, lín lóng tio̍h pò-iông.

11Chhiūⁿ-chúi ê só͘-chāi, ū chhiùⁿ-koa ê lâng ê koa-siaⁿ, in teh kóng-khí Siōng Chú kong-gī ê só͘-chòe, chiū-sī I kái-kiù Í-sek-lia̍t lông-bîn ê chok-ûi. Hit-sî, Siōng Chú ê chú-bîn lo̍h-khì kàu siâⁿ-mn̂g hoan-ho͘:

12Tí-pho-la, tio̍h heng-khí, heng-khí! Tio̍h chhíⁿ--khí-lâi, chhíⁿ--khí-lâi! Tio̍h chhiùⁿ-koa! Pa-la, tio̍h khí--lâi! A-pí-lô-am ê kiáⁿ, tio̍h lia̍h lí ê hu-ló͘ lâi!

13Hit-sî, só͘ chhun ê kùi-cho̍k lo̍h--lâi, Siōng Chú ê chú-bîn chhin-chhiūⁿ ióng-sū ūi góa chhut-cheng.

14Tùi Í-hoat-liân lâi--ê, chìn-ji̍p soaⁿ-kok; tè tī Piān-ngá-bín chi-cho̍k ê āu-bīn. Ū léng-siù tùi Má-kiat lo̍h--lâi; ū chí-hui-koaⁿ tùi Se-pò͘-lûn chhut--lâi.

15Í-sat-ka ê léng-siù kap Tí-pho-la chòe-hé lâi; Í-sat-ka tè tī Pa-la āu-bīn, kap i chòe-hé chhiong-ji̍p soaⁿ-kok. Lū-piān sim tiû-tû bô koat-toàn.

16In sī-án-chóaⁿ lâu tī iûⁿ-tiâu, thiaⁿ kò͘-iûⁿ ê lâng pûn phín-á? Lū-piān sim tiû-tû bô koat-toàn.

17Ka-tek tòa tī Iok-tàn-hô tang-pêng; Tān sī-án-chóaⁿ lâu tī chûn-téng? A-siat thêng-liû tī hái-piⁿ, an-ku tī káng-kháu.

18Se-pò͘-lûn sī piàⁿ-miā m̄ kiaⁿ sí ê jîn-bîn; Ná-hut-tha-lī tī chiàn-tiûⁿ mā-sī án-ni.

19Kun-ông lóng lâi chham-chiàn; hit-sî Ka-lâm chu-ông tī Bí-kiat-to chúi-piⁿ ê Tha-la̍p kau-chiàn, m̄-kú bô chhiúⁿ-tio̍h gûn.

20Chhiⁿ-sîn mā tùi thiⁿ chham-chiàn, tùi in ê khúi-tō kong-kek Se-se-la.

21Ki-sūn-hô kā in chhiong-cháu; Ki-sūn-hô ê chúi kiông koh tōa. Góa ê sim ah, tio̍h hùn-ióng chiân-chìn!

22Ióng-chòng ê bé phun-pháu chhin-chhiūⁿ teh pe; bé-tôe ê siaⁿ chhin-chhiūⁿ lûi hiah-ni̍h hiáng.

23Siōng Chú ê sù-chiá kóng, “Tio̍h chiù-chó͘ Bí-lô-su, tāng-tāng chiù-chó͘ hia ê chū-bîn; in-ūi in bô lâi pang-chān Siōng Chú, bô pang-chān Siōng Chú kong-kek tùi-te̍k.”

24Ki-nî -lâng Hi-pek ê bó͘ Ngá-ek pí só͘-ū ê hū-jîn-lâng khah thang o-ló, pí tòa tī chhù--ni̍h ê hū-jîn-lâng khah thang o-ló.

25Se-se-la thó chúi, Ngá-ek hō͘ i gû-lin, ēng kùi-tiōng ê pôaⁿ phâng chhì-jù hō͘ i.

26Ngá-ek chhiú the̍h khi̍t-á, chiàⁿ-chhiú gia̍h kang-lâng ê thûi-á, kòng Se-se-la, phah-chhùi i ê thâu, chha̍k-thàng i ê pìn-piⁿ.

27Tī i ê kha-chêng, Se-se-la lek--lo̍h-khì, tó-ti̍t-ti̍t, tī i ê kha-chêng lek--lo̍h-khì, bōe tín-tāng; Se-se-la tī hia lek--lo̍h-khì, sí--khì.

28Se-se-la ê lāu-bú tùi thang-á khòaⁿ--chhut-khì, tī thang-á piⁿ kho̍k-kho̍k-siòng, kóng, “Sī-án-chóaⁿ i ê chiàn-chhia iáu-bē tńg--lâi? Sī-án-chóaⁿ iáu-bē thiaⁿ-tio̍h chhia-lián ê siaⁿ?”

29I chhong-bêng ê kiong-lú hôe-tap i, i mā ka-kī án-ni kóng,

30“In it-tēng sī teh pun chiàn-lī-phín; ta̍k-ê ióng-sū pun-tio̍h chi̍t nn̄g ê cha-bó͘ gín-á. Se-se-la it-tēng pun-tio̍h chhái-sek ê saⁿ, chhái-sek siù-hoe ê saⁿ, nn̄g niá chhái-sek siù-hoe ê saⁿ, phoa̍h tī ām-kún chòe chiàn-lī-phín.”

31Siōng Chú ah, goān lí ê tùi-te̍k lóng án-ni bia̍t-bông. Goān thiàⁿ lí ê lâng chhin-chhiūⁿ ji̍t-thâu chhut-hiān kng-iàⁿ-iàⁿ. Í-āu hit-ê tōe-khu thài-pêng sì-cha̍p nî.

← Chapter 4 Jump to: Chapter 6 →