Judges 17

Chinese TTVR (現代台語譯本羅馬字版)

← Chapter 16 Jump to: Chapter 18 →

1Ū chi̍t ê lâng kiò-chòe Bí-ka, tòa tī Í-hoat-liân soaⁿ-khu.

2I tùi lāu-bú kóng, “Lí chi̍t-chheng chi̍t-pah tè gûn hō͘ lâng thau-the̍h--khì, lí kā hit-ê lâng chiù-chó͘, koh kóng hō͘ góa thiaⁿ. Lí khòaⁿ, hiah-ê gûn tī góa chia, sī góa the̍h--ê.” I ê lāu-bú kóng, “Goān Siōng Chú sù-hok góa ê kiáⁿ.”

3I chiū chiong hit chheng-it tè gûn hêng i ê lāu-bú. Āu-lâi i ê lāu-bú kóng, “Góa beh chiong chiah-ê gûn hiàn hō͘ Siōng Chú, hō͘ góa ê kiáⁿ thang khek chi̍t sian sîn-siōng, koh chù chi̍t sian sîn-siōng. Taⁿ góa chiong chiah-ê gûn kau lí.”

4Bí-ka koh chiong hiah-ê gûn hêng i ê lāu-bú. I ê lāu-bú chiū ēng nn̄g-pah tè gûn hō͘ phah-kim sai-hū, chō tiau-khek ê sîn-siōng kap chù ê sîn-siōng. Chiah-ê sîn-siōng hē tī Bí-ka ê chhù.

5Bí-ka ū chi̍t keng sîn-biō, koh chō í-hut-tek kap ka-cho̍k sîn-siōng; i koh kā i chi̍t ê kiáⁿ siat-li̍p chòe chè-si.

6Hit-sî, Í-sek-lia̍t -lâng bô ông, ta̍k-ê lâng lóng chiàu i khòaⁿ-chòe tio̍h--ê khì chòe.

7Iû-tāi ê Pek-lī-hêng ū chi̍t ê siàu-liân-lâng; i sī Lī-bī -lâng, chiām-sî tòa tī Iû-tāi chi-cho̍k ê tōe-khu.

8I lī-khui Iû-tāi ê Pek-lī-hêng -siâⁿ, beh chhē chi̍t ê thang khiā-khí ê só͘-chāi. I lâi kàu Í-hoat-liân soaⁿ-khu Bí-ka ê chhù.

9Bí-ka mn̄g i kóng, “Lí tùi tó-ūi lâi?” I ìn kóng, “Góa sī Lī-bī -lâng, tùi Iû-tāi ê Pek-lī-hêng lâi, beh chhē chi̍t ê thang khiā-khí ê só͘-chāi.”

10Bí-ka kā i kóng, “Chhiáⁿ lâi kap góa tòa, chòe góa ê su-hū, chòe góa ê chè-si; góa ta̍k-nî hō͘ lí cha̍p tè gûn, chi̍t thò lé-ho̍k, kap chia̍h-mi̍h.” Lī-bī -lâng chiū ji̍p--khì.

11Lī-bī -lâng tah-èng kap Bí-ka chòe-hé tòa. Bí-ka chiong chit-ê siàu-liân-lâng khòaⁿ-chòe ka-kī ê kiáⁿ.

12Bí-ka kā Lī-bī -lâng siat-li̍p chòe chè-si, i chiū tòa tī Bí-ka ê chhù.

13Bí-ka kóng, “Taⁿ góa chai Siōng Chú beh hó khoán-thāi góa, in-ūi góa ū chi̍t ê Lī-bī -lâng chòe chè-si.”

← Chapter 16 Jump to: Chapter 18 →