Judges 19

Chinese TTVR (現代台語譯本羅馬字版)

← Chapter 18 Jump to: Chapter 20 →

1Í-sek-lia̍t bô ông ê sî, ū chi̍t ê Lī-bī -lâng tòa tī Í-hoat-liân soaⁿ-khu phian-phiah ê só͘-chāi. I chhōa chi̍t ê Iû-tāi Pek-lī-hêng ê lú-chú chòe sòe-î.

2Chit-ê sòe-î siū-khì i ê tiōng-hu, chiū lī-khui tiōng-hu, tò-khì āu-thâu-chhù, tī hia tòa sì ge̍h-ji̍t kú.

3I ê tiōng-hu tòa chi̍t ê lô͘-po̍k kap nn̄g chiah lû chhut-hoat khì chhē i, beh kā i ko͘-chiâⁿ, chhōa i tò--khì. I ê tiōng-hu kàu-ūi, i chiū chhōa i ê tiōng-hu ji̍p-khì lāu-pē ê chhù. Lī-bī -lâng ê tiūⁿ-lâng khòaⁿ--tio̍h, chiū hoan-gêng i.

4Hit-ê tiūⁿ-lâng kā i lâu--lo̍h-lâi; i chiū tī hia tòa saⁿ ji̍t, chòe-hé lim-chia̍h.

5Kàu tē-sì ji̍t, in thàu-chá khí--lâi, Lī-bī -lâng beh chhut-hoat; hit-ê tiūⁿ-lâng kā kiáⁿ-sài kóng, “Chhiáⁿ lí chia̍h chi̍t-kóa mi̍h-kiāⁿ, ke-thiⁿ khùi-la̍t, chiah chhut-hoat.”

6Nn̄g ê lâng chiū chē--lo̍h-lâi, chòe-hé lim-chia̍h. Hit-ê tiūⁿ-lâng tùi i kóng, “Chhiáⁿ lí koh tòa chi̍t mî, koh pàng-sang--chi̍t-ē.”

7Hit-ê lâng khí-lâi beh chhut-hoat, i ê tiūⁿ-lâng koh kiông-kiông lâu i; i chiū koh hioh chi̍t mî.

8Kàu tē-gō͘ ji̍t, Lī-bī -lâng thàu-chá khí--lâi beh chhut-hoat, tiūⁿ-lâng kā i kóng, “Chhiáⁿ koh chia̍h chi̍t-kóa mi̍h-kiāⁿ, ke-thiⁿ khùi-la̍t, thèng-hāu kàu ji̍t beh lo̍h-soaⁿ.” I chiū lâu--lo̍h-lâi kap tiūⁿ-lâng chòe-hé chia̍h.

9Hit-ê lâng kap i ê sòe-î, í-ki̍p lô͘-po̍k khí--lâi beh chhut-hoat; i ê tiūⁿ-lâng kā i kóng, “Lí khòaⁿ, ji̍t beh àm ah, chhiáⁿ lí koh hioh chi̍t mî; ji̍t beh lo̍h lah, lí tio̍h hioh chia koh pàng-sang--chi̍t-ē; bîn-á-chài thàu-chá chiah khí-sin tò-khì lín tau.”

10Hit-ê lâng m̄-ài koh hioh chi̍t mî, chiū chhōa i ê sòe-î kap nn̄g chiah chún-pī hó-sè ê lû chhut-hoat, lâi kàu Iâ-pò͘-su ê tùi-bīn; Iâ-pò͘-su chiū-sī Iâ-lō͘-sat-léng.

11In kiâⁿ kūn Iâ-pò͘-su ê sî, ji̍t í-keng beh lo̍h-soaⁿ; lô͘-po̍k tùi chú-lâng kóng, “Lán oat ji̍p-khì Iâ-pò͘-su -lâng ê siâⁿ, tiàm hia hioh-mî hó--bô?”

12I ê chú-lâng kóng, “Lán bô beh oat ji̍p-khì m̄-sī Í-sek-lia̍t -lâng teh tòa ê gōa-pang-lâng ê siâⁿ; lán kè-lâi Ki-pí-a.”

13I koh kā lô͘-po̍k kóng, “Lâi, lán khòaⁿ sī beh khì Ki-pí-a, á-sī La-má kè-mî.”

14In chiū kè-sio̍k kiâⁿ; beh kàu Piān-ngá-bín ê Ki-pí-a ê sî, ji̍t-thâu í-keng lo̍h-soaⁿ.

15In chiū oat--ji̍p-khì, beh tī Ki-pí-a hioh-mî. In ji̍p-siâⁿ, chē tī kóng-tiûⁿ, in-ūi bô lâng chiap-thāi in ji̍p-khì chhù--ni̍h hioh-mî.

16Ji̍t àm, ū chi̍t ê lāu-lâng tùi iá-gōa chòe kang tò--lâi. I sī Í-hoat-liân soaⁿ-khu ê lâng, tòa tī Ki-pí-a; Ki-pí-a sī Piān-ngá-bín -lâng tòa ê só͘-chāi.

17Hit-ê lāu-lâng gia̍h-thâu khòaⁿ-tio̍h ū chhut-gōa-lâng tī siâⁿ-lāi ê kóng-tiûⁿ, chiū mn̄g i kóng, “Lí tùi tó-ūi lâi, beh khì tó-ūi?”

18I ìn kóng, “Goán tùi Iû-tāi ê Pek-lī-hêng lâi, beh khì Í-hoat-liân soaⁿ-khu phian-phiah ê só͘-chāi; góa sī hia ê lâng, khì Iû-tāi ê Pek-lī-hêng, hiān-chāi beh tńg-khì goán tau; m̄-kú tī chia bô lâng chiap-thāi góa khì in tau.

19Góa ū chháu-liāu hō͘ lû, mā ū piáⁿ kap chiú hō͘ góa, kap góa ê sòe-î, í-ki̍p sū-hāu góa ê siàu-liân-lâng, lóng bô khiàm sím-mi̍h.”

20Lāu-lâng kóng, “Chhiáⁿ lí hòng-sim! Lín khiàm-ēng--ê góa lóng ōe siat-hoat. Chhian-bān m̄-thang tiàm kóng-tiûⁿ kè-mî.”

21I chiū chhōa in khì i ê chhù, chhī in ê lû; in chiū sóe-kha lim-chia̍h.

22In tú-teh hoaⁿ-hí khoài-lo̍k ê sî, siâⁿ-lāi hiah-ê húi-lūi lâi ûi hit-keng chhù, ti̍t-ti̍t phah-mn̂g, tùi chhù-chú, hit-ê lāu-lâng, kóng, “Kā ji̍p-khì lín tau hit-ê ta-po͘-lâng chhōa--chhut-lâi, goán beh kap i kau-ha̍p.”

23Hit-ê chhù-chú chhut--lâi, tùi in kóng, “Pêng-iú ah, mài án-ni lah, m̄-thang chòe chit-khoán pháiⁿ tāi-chì. Chit-ê lâng sī góa ê lâng-kheh, lín m̄-thang chòe chit-khoán kiàn-siàu-sū.

24Góa ū chi̍t ê cha-bó͘-kiáⁿ, iáu-sī chāi-sek-lú, koh ū hit-ê lâng ê sòe-î; góa chhōa in chhut--lâi, lín thang kā in lêng-jio̍k, chhut-chāi lín ê ì-sù tùi-thāi in. M̄-kú, tùi chit-ê lâng lín m̄-thang chòe chit-khoán kiàn-siàu-sū.”

25M̄-kú hiah-ê lâng m̄ thiaⁿ hit-ê lāu-lâng ê ōe; hit-ê Lī-bī -lâng chiū lia̍h i ê sòe-î kā i sak chhut-khì gōa-bīn hō͘ in. In chiū kā i kiông-kan, thong-mî lêng-jio̍k i, kàu keh-ji̍t thiⁿ beh kng ê sî, chiah pàng i khì.

26Thiⁿ phú-kng ê sî, hū-jîn-lâng lâi kàu i ê tiōng-hu hioh-mî hit-keng chhù ê mn̂g-kháu, tó tī hia, ti̍t-kàu thiⁿ-kng.

27I ê tiōng-hu thàu-chá khí--lâi, khui-mn̂g, beh chhut-hoat tò-khì in tau, khòaⁿ-tio̍h i ê sòe-î tó tī mn̂g-kháu, nn̄g ki chhiú khòa tī hō͘-tēng.

28I tùi i ê sòe-î kóng, “Khí--lâi, lán tńg--lâi-khì.” M̄-kú i bô hôe-èng, Lī-bī -lâng kā i hû-khí-khì lû-á téng, chiū chhut-hoat tò-khì in tau.

29Tńg-khì kàu in chhù, i chiū the̍h to chiong i ê sòe-î chhiat-chòe cha̍p-jī tè, chhe lâng sàng-khì thong Í-sek-lia̍t ê choân-kéng.

30Só͘-ū khòaⁿ--tio̍h ê lâng lóng kóng, “Tùi Í-sek-lia̍t -lâng chhut Ai-ki̍p kàu kin-á-ji̍t, chit-khoán tāi-chì iáu m̄-bat hoat-seng, mā m̄-bat khòaⁿ--kè. Taⁿ, lán tio̍h siūⁿ, tio̍h chham-siông, tio̍h koat-tēng beh án-chóaⁿ chòe.”

← Chapter 18 Jump to: Chapter 20 →