Judges 21

Chinese TTVR (現代台語譯本羅馬字版)

← Chapter 20 Jump to:

1Í-sek-lia̍t -lâng tī Bí-su-pa bat chiù-chōa kóng, “Goán bô beh chiong cha-bó͘-kiáⁿ kè hō͘ Piān-ngá-bín -lâng chòe bó͘.”

2Í-sek-lia̍t -lâng lâi kàu Pek-te̍k-lī, chē tī Siōng-tè ê bīn-chêng tōa-siaⁿ thî-khàu kàu ē-hng,

3kóng, “Siōng Chú — Í-sek-lia̍t ê Siōng-tè, kin-á-ji̍t tī Í-sek-lia̍t tiong-kan kiám chi̍t chi-cho̍k; goán Í-sek-lia̍t -lâng ná ōe tú-tio̍h chit-khoán tāi-chì?”

4Keh-ji̍t thàu-chá, jîn-bîn khí--lâi, tī hia khí chi̍t chō tôaⁿ, hiàn sio-hòa-chè kap pêng-an-chè.

5Í-sek-lia̍t -lâng kóng, “Tī Í-sek-lia̍t chi-cho̍k tiong, siáⁿ-lâng bô chòe-hé lâi Siōng Chú chia chū-chi̍p?” In-ūi in chiù tāng-chōa, kóng, “Bô lâi Bí-su-pa Siōng Chú ê bīn-chêng ê lâng, tio̍h hō͘ i sí.”

6Í-sek-lia̍t -lâng ūi-tio̍h in ê tông-pau Piān-ngá-bín -lâng sim kan-khó͘, kóng, “Kin-á-ji̍t Í-sek-lia̍t tiong toān-choa̍t chi̍t ê chi-cho̍k lah.

7Lán í-keng kí Siōng Chú chiù-chōa, bô beh chiong cha-bó͘-kiáⁿ kè hō͘ in, taⁿ lán beh tùi tó-ūi ūi-tio̍h in só͘ chhun ê lâng chhē bó͘?”

8In koh kóng, “ Í-sek-lia̍t chiah-ê chi-cho̍k tiong-kan, siáⁿ-lâng bô chiūⁿ-lâi Bí-su-pa Siōng Chú chia?” In chiū chhâ-chhut Ki-lia̍t ê Ngá-pí -lâng bô chi̍t ê lâng lâi.

9In-ūi in tiám-sǹg ê sî, bô chi̍t ê Ki-lia̍t ê Ngá-pí -lâng tī hia.

10Hōe-chiòng chiū chhe chi̍t-bān nn̄g-chheng ê ióng-sū, hoan-hù in kóng, “Lín khì Ki-lia̍t ê Ngá-pí, ēng to thâi-sí só͘-ū ê ta-po͘-lâng, hū-jîn-lâng, kap gín-á.

11Lín tio̍h án-ni chòe: Tio̍h chiong só͘-ū ê ta-po͘-lâng, kap kiat-hun--kè ê cha-bó͘-lâng lóng thâi-sí.”

12In tī Ki-lia̍t ê Ngá-pí -lâng tiong-kan tú-tio̍h sì-pah ê iáu-bē kiat-hun ê chāi-sek-lú, chiū kā in tòa kàu Ka-lâm -tōe Sī-lô ê kun-iâⁿ.

13Choân-thé hōe-chiòng chiū phài lâng khì kap Lîm-bûn-giâm ê Piān-ngá-bín -lâng kóng-hô.

14Hit-sî, Piān-ngá-bín -lâng tò--lâi; Í-sek-lia̍t -lâng chiū chiong só͘ lâu--lo̍h-lâi hiah-ê Ki-lia̍t ê Ngá-pí -lâng ê cha-bó͘ gín-á hō͘ in chòe bó͘; m̄-kú iáu bô-kàu.

15Í-sek-lia̍t jîn-bîn ūi-tio̍h Piān-ngá-bín -lâng sim kan-khó͘; in-ūi Siōng Chú hō͘ Í-sek-lia̍t ê chi-cho̍k khih chi̍t kak.

16Í-sek-lia̍t ê tiúⁿ-ló kóng, “ Piān-ngá-bín ê hū-lú kì-jiân í-keng siū châu-bia̍t, taⁿ lán beh án-chóaⁿ chhē bó͘ hō͘ hiah-ê oa̍h--teh ê lâng?”

17Koh kóng, “ Piān-ngá-bín só͘ chhun ê lâng mā tio̍h ū ke-gia̍p hō͘ in, chiah bián Í-sek-lia̍t tiong chi̍t chi-cho̍k siū tû-bia̍t.

18M̄-kú lán bōe-ēng-tit chiong ka-kī ê cha-bó͘-kiáⁿ hō͘ in chòe bó͘, in-ūi lán Í-sek-lia̍t -lâng ū chiù-chōa kóng, ‘Chiong cha-bó͘-kiáⁿ kè hō͘ Piān-ngá-bín -lâng--ê, tio̍h siū chiù-chó͘.’”

19In koh kóng, “ Sī-lô ta̍k-nî ū kú-hêng kèng-pài Siōng Chú ê choeh-kî.” Sī-lô sī tī Lī-pho-ná ê lâm-pêng, Pek-te̍k-lī ê pak-pêng, chiū-sī Pek-te̍k-lī ǹg Sī-kiàm ê tōa-lō͘ ê tang-pêng.

20In chiū kà Piān-ngá-bín -lâng, kóng, “Lín tio̍h khì Sī-lô, bih tiàm phû-tô-hn̂g;

21nā khòaⁿ-tio̍h in ê cha-bó͘ gín-á chhut-lâi thiàu-bú, tio̍h tùi phû-tô-hn̂g chhut--lâi, ta̍k-ê lâng chhiúⁿ chi̍t ê Sī-lô ê lú-chú chòe bó͘, chiah tò-khì Piān-ngá-bín tōe-khu.

22In ê lāu-pē á-sī hiaⁿ-tī nā lâi kā goán khòng-gī, goán ōe kā in kóng, ‘Chhiáⁿ lín tài-liām goán, khoan-iông in; in-ūi kau-chiàn ê sî, goán bô lâu cha-bó͘ gín-á hō͘ in chòe bó͘. Taⁿ, m̄-sī lín chiong cha-bó͘-kiáⁿ hō͘ in; nā sī, lín chiū ū chōe.’”

23Piān-ngá-bín -lâng chiū chiàu án-ni chòe, chiàu in ê lâng-gia̍h, chhiúⁿ thiàu-bú ê cha-bó͘ gín-á choh-bó͘; jiân-āu tò-khì in pún-tōe, tiông-kiàn siâⁿ-tìn, tòa tī hia.

24Siâng-sî, Í-sek-lia̍t -lâng lī-khui hia, ta̍k-ê lâng tò-khì ka-kī ê chi-cho̍k, chong-cho̍k; ta̍k-ê lâng lóng tùi hia lī-khui, tò-khì in pún-tōe.

25Hit-sî, Í-sek-lia̍t -lâng bô ông, ta̍k-ê lâng lóng chiàu i khòaⁿ-chòe tio̍h--ê khì chòe.

← Chapter 20 Jump to: