Judges 4

Chinese TTVR (現代台語譯本羅馬字版)

← Chapter 3 Jump to: Chapter 5 →

1Í-hut sí liáu-āu, Í-sek-lia̍t -lâng koh chòe Siōng Chú khòaⁿ-chòe pháiⁿ ê sū.

2Siōng Chú chiong in kau hō͘ thóng-tī Hā-só ê Ka-lâm -ông Iâ-pin; i ê goân-sòe sī Se-se-la, tòa tī Hā-lô-siat Hap-ko-ìn.

3Iâ-pin -ông ū thih ê chiàn-chhia káu-pah tâi; i chân-jím khi-ap Í-sek-lia̍t -lâng jī-cha̍p nî. Í-sek-lia̍t -lâng ai-kiû Siōng Chú kái-kiù.

4Hit-sî ū chi̍t ê lú sian-ti Tí-pho-la, chiū-sī La-pí-to ê bó͘, chòe Í-sek-lia̍t ê sū-su.

5I tòa tī Í-hoat-liân soaⁿ-khu, La-má kap Pek-te̍k-lī ê tiong-kan, Tí-pho-la ê chang-chhiū kha; Í-sek-lia̍t -lâng lóng khì i hia thiaⁿ i ê phòaⁿ-koat.

6Tí-pho-la phài lâng khì Ná-hut-tha-lī ê Ki-te-su kiò A-pí-lô-am ê kiáⁿ Pa-la lâi, tùi i kóng, “Siōng Chú — Í-sek-lia̍t ê Siōng-tè kiám bô bēng-lēng lí, ‘Lí tio̍h chhōa Ná-hut-tha-lī -lâng kap Se-pò͘-lûn -lâng chi̍t-bān kap lí khì Tha-po̍k-soaⁿ.

7Góa beh hō͘ Iâ-pin ê goân-sòe Se-se-la kap i ê chiàn-chhia, i ê choân-kun lâi kàu Ki-sūn-hô lí chia; góa beh chiong in kau tī lí ê chhiú.’”

8Pa-la kā i kóng, “Lí nā beh kap góa chòe-hé khì, góa chiū beh khì; lí nā m̄, góa chiū m̄ khì.”

9I kóng, “Góa it-tēng ōe kap lí chòe-hé khì, m̄-kú lí chit-piàn chhut-cheng bōe hō͘ lí tit-tio̍h êng-kng, in-ūi Siōng Chú beh chiong Se-se-la kau tī chi̍t ê hū-jîn-lâng ê chhiú.” Tí-pho-la chiū kap Pa-la chòe-hé khì Ki-te-su.

10Pa-la tiàu-chi̍p Se-pò͘-lûn -lâng kap Ná-hut-tha-lī -lâng kàu Ki-te-su; tè i khì--ê ū chi̍t-bān lâng. Tí-pho-la mā kap i chòe-hé khì.

11Hit-sî, Mô͘-se ê tiūⁿ-lâng Hô-pa ê hō͘-tāi Ki-nî -lâng Hi-pek, lī-khui kî-tha ê Ki-nî -lâng, lâi tī Ki-te-su hù-kūn ê Sat-ná-im siōng-chhiū piⁿ tah pò͘-pîⁿ tòa tī hia.

12Ū lâng kā Se-se-la kóng, “ A-pí-lô-am ê kiáⁿ Pa-la í-keng chiūⁿ-khì Tha-po̍k-soaⁿ.”

13Se-se-la chiū tiàu-chi̍p i lóng-chóng thih ê chiàn-chhia káu-pah tâi kap choân-kun, tùi Hā-lô-siat Hap-ko-ìn lâi kàu Ki-sūn-hô.

14Tí-pho-la tùi Pa-la kóng, “Chìn-kong! Kin-á-ji̍t Siōng Chú chiong Se-se-la kau tī lí ê chhiú lah. Siōng Chú tī lí ê thâu-chêng teh chhōa lí.” Pa-la chiū tùi Tha-po̍k-soaⁿ lo̍h--lâi; tè i--ê ū chi̍t-bān lâng.

15Siōng Chú hō͘ Se-se-la, í-ki̍p i só͘-ū ê chiàn-chhia kap kun-tūi, siū Pa-la kong-kek, hūn-loān sì-sòaⁿ; Se-se-la lo̍h-chhia, khí-kha tô-cháu.

16Pa-la tui-jip hiah-ê chiàn-chhia kap kun-tūi, kàu Hā-lô-siat Hap-ko-ìn; Se-se-la ê choân-kun lóng siū thâi-sí, bô lâu kah pòaⁿ-ê.

17Se-se-la khí-kha tô-cháu, cháu kàu Ki-nî -lâng Hi-pek ê bó͘ Ngá-ek ê pò͘-pîⁿ, in-ūi Hā-só -ông Iâ-pin kap Ki-nî -lâng Hi-pek ê ke koan-hē chin hó.

18Ngá-ek chhut-lâi gêng-chiap Se-se-la, tùi i kóng, “Góa ê chú, chhiáⁿ ji̍p-lâi góa chia, m̄-bián kiaⁿ.” Se-se-la chiū ji̍p-khì i ê pò͘-pîⁿ. Ngá-ek chiū ēng thán-á kā i kah--teh.

19Se-se-la kā i kóng, “Góa chhùi-ta, chhiáⁿ lí ēng chi̍t-kóa chúi hō͘ góa lim.” Ngá-ek chiū khui tóe lin ê phê-tē hō͘ i lim; iû-goân koh kā i kah--teh.

20Se-se-la koh kā i kóng, “Lí khiā tiàm pò͘-pîⁿ mn̂g-kháu, nā ū lâng lâi mn̄g lí, ‘Ū lâng lâi lí chia bô?’ Lí tio̍h kóng ‘Bô.’”

21Se-se-la ià-siān khùn tāng-bîn; Hi-pek ê bó͘ Ngá-ek the̍h pò͘-pîⁿ ê khi̍t-á, chhiú gia̍h thûi-á, ēng liam--ê kiâⁿ-khì i hia, ēng khi̍t-á tùi i ê pìn-piⁿ tèng--ji̍p-khì, thàng kàu thô͘-kha; i chiū sí.

22Hit-sî, Pa-la tui-jip Se-se-la, Ngá-ek chhut-lâi gêng-chiap i, tùi i kóng, “Chhiáⁿ lâi, góa hō͘ lí khòaⁿ lí teh chhē ê lâng.” Pa-la chiū kap i ji̍p--khì. Pa-la khòaⁿ-tio̍h Se-se-la í-keng tó tī thô͘-kha, sí tī hia, khi̍t-á iáu tèng tī i ê pìn-piⁿ.

23Tùi án-ni, Siōng-tè hō͘ Ka-lâm -ông Iâ-pin siū Í-sek-lia̍t -lâng chè-ho̍k.

24Í-sek-lia̍t -lâng jú lâi jú kiông-sēng, iâⁿ-kè Ka-lâm -ông Iâ-pin, chòe-āu chiong Ka-lâm -ông Iâ-pin siau-bia̍t.

← Chapter 3 Jump to: Chapter 5 →