Judges 20 — Chinese TTVR (現代台語譯本羅馬字版)

1Tùi án-ni, só͘-ū ê Í-sek-lia̍t -lâng, tùi Tān kàu Pia̍t-sī-pa, kap tòa tī Ki-lia̍t ê lâng, lóng khiā--chhut-lâi, thoân-kiat it-tì, chū-chi̍p tī Bí-su-pa, Siōng Chú ê bīn-chêng.

2Í-sek-lia̍t chèng chi-cho̍k ê léng-siù lóng lâi khiā tī Siōng-tè chú-bîn ê hōe-tiong; gia̍h-to ê pō͘-peng ū sì-cha̍p-bān lâng.

3Piān-ngá-bín -lâng ū thiaⁿ-kìⁿ Í-sek-lia̍t -lâng lóng lâi tī Bí-su-pa. Í-sek-lia̍t -lâng mn̄g, kóng, “Kā goán kóng, chit-ê pháiⁿ tāi-chì án-chóaⁿ hoat-seng--ê?”

4Hit-ê Lī-bī -lâng, chiū-sī siū hāi-sí ê hū-jîn-lâng ê tiōng-hu, ìn kóng, “Góa kap góa ê sòe-î kàu Piān-ngá-bín ê Ki-pí-a hioh-mî.

5Ki-pí-a -lâng khí-lâi kong-kek góa, mî--sî pau-ûi góa hioh-mî ê chhù, siūⁿ-beh hāi-sí góa; in koh kā góa ê sòe-î kiông-kan kàu sí.

6Góa chiū chiong góa ê sòe-î chhiat-chòe chi̍t-tè chi̍t-tè, chhiáⁿ lâng the̍h-khì Í-sek-lia̍t -lâng khiā-khí ê só͘-ū tōe-khu; in-ūi Ki-pí-a -lâng tī Í-sek-lia̍t -lâng ê tiong-kan chòe îm-loān kap kiàn-siàu-sū.

7Lín só͘-ū ê Í-sek-lia̍t -lâng tio̍h chham-siông, chòe koat-tēng.”

8Só͘-ū ê jîn-bîn lóng khí--lâi, thoân-kiat it-tì, kóng, “Goán bô chi̍t ê lâng ōe tńg-khì i ê pò͘-pîⁿ, mā bô chi̍t ê ōe tò-khì i ê chhù.

9Taⁿ, goán tùi Ki-pí-a -lâng beh án-ni chhú-lí: Goán chiàu thiu ê chhiam khì kong-kek in.

10Goán beh tī Í-sek-lia̍t chèng chi-cho̍k ê tiong-kan, chi̍t-pah lâng soán cha̍p lâng, chi̍t-chheng soán chi̍t-pah, chi̍t-bān soán chi̍t-chheng, kā kun-peng sàng niû-si̍t, hō͘ kun-peng kàu Piān-ngá-bín ê Ki-pí-a, chiàu Ki-pí-a -lâng tī Í-sek-lia̍t tiong só͘ chòe khó-ò͘ⁿ ê sū kā in pò-ho̍k.”

11Tùi án-ni, só͘-ū ê Í-sek-lia̍t -lâng thoân-kiat it-tì, kong-kek hit-ê siâⁿ.

12Í-sek-lia̍t só͘-ū ê chi-cho̍k phài lâng khì Piān-ngá-bín chi-cho̍k khiā-khí ê ta̍k só͘-chāi, kóng, “Lín chòe ê tāi-chì si̍t-chāi ū-kàu khó-ò͘ⁿ!

13Taⁿ lín tio̍h chiong Ki-pí-a hiah-ê húi-lūi kau--chhut-lâi, goán beh hō͘ in sí, tùi Í-sek-lia̍t -lâng ê tiong-kan sàu-tû chit-ê siâ-ok.” M̄-kú Piān-ngá-bín -lâng m̄-khéng thiaⁿ in ê tông-pau Í-sek-lia̍t -lâng ê ōe.

14Piān-ngá-bín -lâng lóng tùi in ka-kī ê siâⁿ chhut--lâi, lâi Ki-pí-a chi̍p-ha̍p, beh kap Í-sek-lia̍t -lâng kau-chiàn.

15Piān-ngá-bín -lâng tùi ta̍k-ê siâⁿ tiàu-chi̍p nn̄g-bān la̍k-chheng ê gia̍h-to ê peng-sū, lēng-gōa iáu ū Ki-pí-a -lâng tiàu-chi̍p chhit-pah ê cheng-peng.

16Choân-pō͘ ê kun-tūi tiong-kan ū chhit-pah ê te̍k-soán ê cheng-peng; in koàn-sì ēng tò-chhiú, ta̍k-ê ōe ēng soh hìⁿ chio̍h, chin chún, hun-hô-put-chha.

17Í-sek-lia̍t ta̍k chi-cho̍k, Piān-ngá-bín -lâng í-gōa, só͘ tiàu-chi̍p gia̍h-to ê chiàn-sū, chóng-kiōng sì-cha̍p-bān.

18Í-sek-lia̍t -lâng chiū khí--lâi, khì Pek-te̍k-lī kiû-mn̄g Siōng-tè kóng, “Goán tiong-kan tó chi̍t ê chi-cho̍k tio̍h seng khì kong-táⁿ Piān-ngá-bín -lâng?” Siōng Chú kóng, “ Iû-tāi seng khì.”

19Í-sek-lia̍t -lâng thàu-chá khí--lâi, tī Ki-pí-a tùi-bīn chat-iâⁿ.

20Í-sek-lia̍t -lâng chhut--lâi, tī Ki-pí-a pâi-tīn beh kap Piān-ngá-bín -lâng kau-chiàn.

21Piān-ngá-bín -lâng mā tùi Ki-pí-a chhut--lâi; hit-ji̍t, thâi-sí Í-sek-lia̍t -lâng nn̄g-bān nn̄g-chheng.

22Í-sek-lia̍t -lâng khì kàu Siōng Chú ê bīn-chêng, thî-khàu kàu àm-sî, chhéng-būn Siōng Chú kóng, “Goán kiám tio̍h koh chìn-chêng kap goán ê tông-pau Piān-ngá-bín -lâng kau-chiàn?” Siōng Chú kóng, “Tio̍h chìn-chêng kong-kek.” Í-sek-lia̍t -lâng chiū the̍h-chhut ióng-khì, iû-goân tī thâu chi̍t ji̍t pâi-tīn ê só͘-chāi koh pâi-tīn.

24Tē-jī ji̍t, Í-sek-lia̍t -lâng koh chìn-chêng khì kong-kek Piān-ngá-bín -lâng.

25Piān-ngá-bín -lâng mā tī hit-ji̍t tùi Ki-pí-a chhut-lâi gêng-chiàn, koh thâi-sí Í-sek-lia̍t -lâng chi̍t-bān poeh-chheng ê gia̍h-to ê chiàn-sū.

26Í-sek-lia̍t -lâng, chiū-sī só͘-ū ê kun-peng, lóng chiūⁿ-khì Pek-te̍k-lī, chē tī Siōng Chú ê bīn-chêng thî-khàu. Hit-ji̍t, in kìm-chia̍h kàu ji̍t àm, koh tī Siōng Chú ê bīn-chêng hiàn sio-hòa-chè kap pêng-an-chè.

27Hit-sî, Siōng-tè ê iok-kūi tī Pek-te̍k-lī. A-lûn ê sun, Í-lī-a-sat ê kiáⁿ Hui-nî-hap tī Siōng Chú ê bīn-chêng ho̍k-sāi. Í-sek-lia̍t -lâng chhéng-būn Siōng Chú, kóng, “Goán tio̍h koh khì kap goán ê tông-pau Piān-ngá-bín -lâng kau-chiàn, á-sī tio̍h soah?” Siōng Chú kóng, “Tio̍h khì, bîn-á-chài góa beh chiong in kau tī lín ê chhiú.”

29Í-sek-lia̍t -lâng chiū phài peng tī Ki-pí-a ê sì-ûi bâi-ho̍k.

30Tē-saⁿ ji̍t, Í-sek-lia̍t -lâng koh khì kong-kek Piān-ngá-bín -lâng, kap chêng nn̄g piàn siâng-khoán, tī Ki-pí-a pâi-tīn.

31Piān-ngá-bín -lâng chhut-khì gêng-chiàn, siū ín-iú lī-khui siâⁿ. In tī nn̄g tiâu tōa-lō͘, chi̍t tiâu thàng Pek-te̍k-lī, chi̍t tiâu thàng Ki-pí-a ê iá-gōa, chhin-chhiūⁿ chêng nn̄g piàn, thâi-sí Í-sek-lia̍t -lâng iok-lio̍k saⁿ-cha̍p ê.

32Piān-ngá-bín -lâng kóng, “In ōe chhin-chhiūⁿ í-chêng án-ni hō͘ lán phah-pāi.” M̄-kú Í-sek-lia̍t -lâng kóng, “Lán lâi cháu, ín-iú in lī-khui siâⁿ kàu tōa-lō͘.”

33Í-sek-lia̍t -lâng ê chú-le̍k-kun lâi Pa-le̍k Tha-má têng-sin pâi-tīn; Í-sek-lia̍t bâi-ho̍k ê peng-sū tùi Ki-pí-a ê sai-pêng chhiong--chhut-lâi.

34Choân-pō͘ ê Í-sek-lia̍t -lâng ū chi̍t-bān ê cheng-peng, chìn-chêng kong-kek Ki-pí-a; kau-chiàn ê sè-bīn chin béng-lia̍t, m̄-kú Piān-ngá-bín -lâng m̄ chai chai-hō kàu ah.

35Siōng Chú hō͘ Piān-ngá-bín -lâng thâi-su; hit-ji̍t, Í-sek-lia̍t -lâng thâi-sí nn̄g-bān gō͘-chheng chi̍t-pah ê Piān-ngá-bín gia̍h-to ê peng-sū.

36Piān-ngá-bín -lâng chai in í-keng thâi-su. Í-sek-lia̍t -lâng thiat-thè, sī in-ūi in sìn-jīm phài tī Ki-pí-a sì-ûi bâi-ho̍k ê chiàn-sū.

37Bâi-ho̍k ê peng chin kín chhiong-ji̍p Ki-pí-a, ēng to thâi-sí choân-siâⁿ ê lâng.

38Í-sek-lia̍t -lâng ê chú-le̍k-kun kap bâi-ho̍k ê peng ū iok-tēng chi̍t ê sìn-hō, khòaⁿ-tio̍h siâⁿ-lāi chhèng hé-hun ê sî,

39in tio̍h oa̍t-tńg-sin hoán-kong. Tāi-seng, Piān-ngá-bín -lâng ū thâi-sí tāi-iok saⁿ-cha̍p ê Í-sek-lia̍t -lâng, chiū kóng, “In ōe chhin-chhiūⁿ í-chêng án-ni hō͘ lán phah-pāi.”

40Ian-thiāu tùi siâⁿ-lāi chhèng koân ê sî, Piān-ngá-bín -lâng oa̍t-thâu khòaⁿ-tio̍h choân-siâⁿ ê hé-hun tú-thiⁿ.

41Í-sek-lia̍t -lâng koh oa̍t-tńg-sin hoán-kong, Piān-ngá-bín -lâng chiū kiaⁿ kah gāng--khì, in-ūi chai chai-hō kàu lah.

42In tī Í-sek-lia̍t -lâng ê bīn-chêng oa̍t-tńg-sin ǹg khòng-iá ê lō͘ tô-cháu; m̄-kú Í-sek-lia̍t -lâng tui-jip in chin óa, in chiū hō͘ chú-le̍k-kun kap tùi ta̍k-ê siâⁿ chhut--lâi ê peng pau-ûi, siau-bia̍t.

43Í-sek-lia̍t -lâng pau-ûi Piān-ngá-bín -lâng, tui-jip in, kàu Ki-pí-a ê tang-pêng, chi̍t-lō͘ kā in tui-sat.

44Piān-ngá-bín -lâng sí chi̍t-bān poeh-chheng ê ióng-sū.

45Kî-tha ê lâng oa̍t-tńg-sin ǹg khòng-iá tô-cháu, kàu Lîm-bûn-giâm. Í-sek-lia̍t -lâng iân-lō͘ thâi-sí in gō͘-chheng lâng; tui-jip in kàu Ki-tùn, koh thâi-sí nn̄g-chheng lâng.

46Hit-ji̍t, Piān-ngá-bín -lâng lóng-chóng sí nn̄g-bān gō͘-chheng ê gia̍h-to ê chiàn-sū.

47Piān-ngá-bín -lâng iáu chhun la̍k-pah ê chiàn-sū, in tô-cháu khì khòng-iá, tī Lîm-bûn-giâm bih sì kò-ge̍h.

48Í-sek-lia̍t -lâng koh oa̍t-tńg kong-kek Piān-ngá-bín -lâng, ēng to thâi-sí siâⁿ-lāi ê chū-bîn, cheng-siⁿ, kap só͘-ū tú--tio̍h ê lâng; in koh chi̍t-lō͘ pàng-hé sio hù-kūn ê siâⁿ.