1 Chronicles 15

Zande

← Chapter 14 Jump to: Chapter 16 →

1Dawidi ki dudua gako abambu rogo gako bakporo; ko ki mbakadi ba tipa ga Mbori sanduki ki dua bamburoko tipa ha.

2Dawidi ki ya, “Kura aboro ka aka ga Mbori sanduki te kina aRevi, bambiko i Yekova asia yo i nitindi ga Mbori sanduki, ka amanga pako nye anye kindi.”

3Dawidi ki dungura gbuu aYisaraere dunduko ku Yerusarema yo, ka yega na ga Yekova sanduki ku baha yo, nga gu ko ambakadi tipa ha.

4Dawidi ki dungura awiri Arona wa sa na aRevi:

5dagba awiri Koata yo Uriere ki du ni gayo barumbatayo, awirinako ki du fuo ko wa aboro 120;

6dagba awiri Merari yo, Asaya ki du ni gayo barumbatayo, awirinako ki du fuo ko wa aboro 220;

7dagba awiri Gerusoma yo, Yoere ki du ni gayo barumbatayo, awirinako ki du fuo ko wa aboro 130;

8dagba awiri Erisefana yo, Semaya ki du ni gayo barumbatayo, awirinako ki du fuo ko wa aboro 200.

9Dagba awiri Eburone yo, Eriere ki du ni gayo barumbatayo, na awirinako ki du fuo ko wa aboro 80;

10dagba awiri Uziere yo, Aminadaba ki du ni gayo barumbatayo, awirinako ki du fuo ko wa aboro 112.

11Dawidi ki yambu Sadoka na Abiatara nangia aboromotumo, na agu aRevi, nga Uriere, na Asaya, na Yoere, na Semaya, na Eriere, na Aminadaba,

12ki ya fu yo, “Oni nga abarumbatayo fu angbatunga abaroni nga aRevi. Oni kpara tironi ziazia, oni na awirinaroni; oni ki rengbe ka yega na ga Yekova sanduki, nga ga aYisaraere Mbori, ku rogo gu ba nga gu mbakadi mi he tipa ha.

13Bambiko wa oni atinda nga ha ti bambata ha ya, Yekova gaani Mbori ki moi mbusa ku ri rani, bambiko ani amanga nga pa ha wa du pa rugute he te.”

14Si du aboromotumo na aRevi ki kpara tiyo ziazia ka yega na ga Yekova sanduki, nga ga aYisaraere Mbori.

15ARevi ki aka ga Mbori sanduki pagoyo ti angbongboho, wa Mose arugu he kuti sangba Yekova.

16Dawidi ki gumba pai fu ga aRevi abarumbatayo ya i ringbisi awirinayo ni abayango na aú ngbatunga woro ahe be yo napaa ku ari, nangia akindondo na anzenze na gu sirigi napaa apaa, i ki nibiki abia ku ari ni ngbarago.

17Si du aRevi aringbisi Emana ti ni nangia wiri Yoere; na dagba awirinako Asafa ki du nangia wiri Berekiya; dagba awiri Merari, nangia awirinayo, Etana ki du nangia wiri Kusaya;

18awirinayo ki du na yo ni ue rika, nangia Zekaraya, na Bene, na Yaziere, na Semiramota, na Yiere, na Uni, na Eriaba, na Benaya, na Maseya, na Matitaya, na Erifereu, na Mikeneya, gbia kuti Obede-edome na Yiere nangia ababanda ngbadimo.

19Si du i aringbisi abayango nangia Emana, na Asafa, na Etana, i niwo ti sirigi napaa apaa;

20Zekaraya, na Aziere, na Semiramota, na Yiere, na Uni, na Eriaba, na Maseya, na Benaya, i nitaki akindondo tipa woro bia ku ari;

21Matitaya, na Erifereu, na Mikeneya, na Obede-edome, na Yiere, na Azazaya i du na anzenze be yo ka ngbe mbata yo na woroho.

22Kenanaya adu ku ri pa abia nangia barumbatayo fu aRevi, ko arugu pa bibia, bambiko ko nangia baini pa ha.

23Berekiya na Erekana adu ni ababanda ngbadimo tipa sanduki.

24Sebanaya, na Yosafata, na Netanere, na Amasai, na Zekaraya, na Benaya, na Eriezere, nangia aboromotumo, i naavuda ambanya barangba ga Mbori sanduki. Obede-edome na Yiya adu ni ababanda ngbadimo tipa sanduki.

25Si du Dawidi andu ti ni na ga aYisaraere abaakumba, na abarutirivura nangia ga akutu yo, ka dia sanduki ga Yekova mokido ku Obede-edome yo na ngbarago.

26Si adu wa gere, ho Mbori aunda aRevi ni nga agu yo naaka sanduki ga Yekova mokido, i ki tumo ni abaabagara saba na abaakandoro saba.

27Dawidi ki ukadi tiko ni gbanga baukadi ni tutu ndindii giri nzibi, ko na agu aRevi dunduko naaka sanduki, na abayango, na Kenanaya nangia barugu pa bibia fu abayango; Dawidi adu na efoda ti kpotoko a nadu ni tutu giri nzibi.

28Si du aYisaraere ayega na sanduki ga Yekova mokido na ngbiko, na woro anambongo, na ambanya, na gu sirigi napaa apaa, ki nipoi ku ari na akindondo na anzenze.

29Si adu wa gere, ho sanduki ga Yekova mokido ada ni ku rogo ga Dawidi bakporo, Mikara nangia wiri Saura ki ngere ku zegi yo ti bangiri bambu, ki bi Bakindo Dawidi ko nido gbere ki ningi; ri ki payasi pa ko ku kpotori yo.

← Chapter 14 Jump to: Chapter 16 →