1 Chronicles 28

Zande

← Chapter 27 Jump to: Chapter 29 →

1Dawidi ki dungura abazogo aYisaraere dunduko ku Yerusarema yo na abazogo ku ri angbatungayo, na agu abarutirivura ku ri agu arika naamanga pa bakindo ti gayo rago, na abarutirivura nga ga akutu yo, na abarutirivura nga ga akama yo, na agu abazogo naadu ni ababanda ga bakindo ahe dunduko na ga awiriko a, na ku ri gayo anya, amoyambu ki du na yo a, na airanyaka na kangará aboro dunduko.

2Dawidi ki ru ku ari ki ya: “Oni gi sangbare, awirinami na gimi aboro. Si adu kpotore yo tigimi ka dua bambu ni banye tipa sanduki ga Yekova mokido, na tipa gbada andu gaani Mbori. Mi ima mbakada apai tipa dua bambu.

3Ono Mbori aya fere, ‘Mo adua nga bambu tipa rimore te, bambiko mo nga basovura, ki uka kure aboro.’

4Ono Yekova ga aYisaraere Mbori, ko asia re dagba angbatunga buba yo dunduko mi du ni bakindo ku ri aYisaraere nye anye kindi; bambiko ko asia Yuda ko du ni bazogo, rogo ngbatunga Yuda yo nga ngbatunga buba, si angba tiko ka sia re dagba awiri buba yo ka maa re ni bakindo ku ri aYisaraere du.

5Ko asia Soromo nga wire dagba awire dunduko bambiko Yekova afu awire fere ni dungu yo, ko sungu auru gu mbatabakindo nga ga ga Yekova ngbi ku ri aYisaraere.

6Ko ki ya fere, ‘Soromo nga wiro, ko nikadua gi bambu na gimi avurukporo, bambiko mi sia ko ko du ni wire, mi ki du ni bako.

7Mi anyakasa gako ngbi nye anye kindi, ka ko du nyanyaki ka ka kuti gimi arugute na gimi asarangbanga, wa du he ti gi uru re.’

8Si du awere mi naruga roni ku bangiri aYisaraere dunduko, nga ga Yekova gbuu, na ku bangiri gaani Mbori, oni ka kuti agu arugute dunduko nga ga Yekova gaoni Mbori ki nigbata pa ha; si du oni ka du ti ni na gi wene ringara re ku be roni, ki mbu he a ni ũkumbo fu awironi fuo roni nye anye kindi.

9“Boro mo, Soromo nga wire, mo ini ga bamo Mbori, ki nimangi pa ko na kpotoro yo ni ziazia ha na kpinyemuse rogo ga berá; bambiko Yekova nawisiga kpoto aboro yo dunduko, ki nirugu tiko na gu wisigapai nga ga berá dunduko. Ka mo agbata ko, mo abi ko abi; ono ka mo mbu ko, ko abá ro ku sa yo nye anye kindi.

10Mo banda tiro awere, bambiko Yekova sia ro mo dua bambu tipa kparakpara ba; mo du nyanyaki, ka manga ha.”

11Dawidi ki fu kpia gu mbaraza nga ga yekaru fu Soromo, na gaha abambu dunduko, na gaha baiga kikiipaahe, na gaha avuru bambu ku ari, na gaha avuru bambu ku dimo yo, na gu nga ga bainapai;

12na kpia agu ahe dunduko nadu rogo gako berá tipa vurukporo ga Yekova bambu, na tipa agu abambu dunduko nikadu pati he kirikiri, na tipa gu baiga kikiipaahe nga ga ga Mbori bambu, na tipa gu baiga kikiipaahe nga gu i akpara ha;

13na tipa ga aboromotumo rika sunge nga ga aRevi a, na tipa agu asunge dunduko nga ga manga pa ga Yekova bambu; na tipa agu aũsunge dunduko nga ga mangapai rogo ga Yekova bambu yo.

14Ko ki fu dahabu a fu ko ni ringbisiringbisi baroaha tipa aũsunge ni dahabu tipa aúsunge dunduko nga ga angbatunga mangapai, ko afu feda a tipa aúsunge dunduko ni feda ni ringbisiringbisi barõaha, tipa aúsunge dunduko nga ga angbatunga mangapai,

15na ringbisiringbisi barõa dahabu tipa abaduawe, na tipa agu awe nga gaha, na tipa agu abaduawe ni feda, ko afu feda ni ringbisiringbisi barõaha tipa abaduawe ni ba sa sa na tipa agu awe nga gaha, wa pa sunge abaduawe adu ni ba sa sa,

16ko ki fu dahabu ni ringoisiringbisi barõaha tipa ambisa nga ga kpokuta yugopai, tipa ambisa ni ba sa sa na feda tipa agu ambisa du ni feda,

17na tipa angorápasio, na akurungbu, na ainga nga ga ndikidi dahabu; na tipa akurungbu dahabu ni ringbisiringbisi barõaha tipa akurungbu ni ba sa sa; na tipa akurungbu feda ni ringbisiringbisi barõaha tipa akurungbu ni ba sa sa;

18ko ki fu gigiri dahabu tipa bamotumo fuõngua, ni ringbisiringbisi barõaha; na dahabu tipa kpia ngbagidavura nga ga akeruba nga agu akeruba zara pupoho ki dadi sanduki mokido nga ga Yekova.

19Dawidi ki ya, Yekova arugu ko na agi apai re dunduko ni ke ko paha fu ko, nga pa gu sunge wa du kpiaha re dunduko.

20Dawidi ki ya fu Soromo nga wiriko, “Mo du nyanyaki ki du na bakere erá, ki mangi he. Ka mo gúnde nga ya, ka mo yungura nga a ya; bambiko Yekova Mbori, nga gi Mbori, ko du na mo. Ko ambu nga ro te, bangiriko ago nga ti ro a te, da kina ho sunge manga pa ga Yekova bambu ka nyasa ni dunduko.

21Mo ngere, rika sunge ho nga ga aboromotumo na ga aRevi tipa manga pa ga Mbori bambu dunduko; agu arika aboro adu na mo rogo asunge dunduko ni ba sa sa nga agu yo nakpi nyemu sunge, du ni abangbasia ha; tipa ngbatunga mangapai dunduko. Abarutirivura na aboro dunduko nikadu tii ga rugute dunduko a.”

← Chapter 27 Jump to: Chapter 29 →