1 Chronicles 19

Zande

← Chapter 18 Jump to: Chapter 20 →

1Fuo gure Nasa nangia bakindo aAmono ki kpi, wiriko ki zogo rago ku ba ko.

2Dawidi ki ya, “Mi ayúgo weneringise fu Anuna wiri Nasa, bambiko wa bako ayugu weneringise fere.” Si du Dawidi akedi avuruko ti ni, i ngarási ko tipa kpio bako. Avuru Dawidi ki da ku rogo gu ringara nga ga aAmono koyo du Anuna ni, ka ngarása ko.

3Ono agu abazogo nangia ga aAmono yo ki ya fu Anuna, “Mo bere he ya Dawidi nairisa bamo, kedi ko abangarasiro ti ni kono du mo ni? Avuruko naye nga kono du mo ni ka wisiga pai, na ka gbarasa ahe, na ka maa ringara amaa te?”

4Si du Anuna ki rogo avuru Dawidi ki kpe maingbayo, ki yepe gayo abaukadi bebere he, kuti basungayo, ki karaga yo ku sa yo,

5i ki guari. Ho i agumba gu pai ni re fu Dawidi tipa agu akumba re, ko ki kedi aboro i ndu ka ngbisa yo; bambiko agu akumba re adu na bakere zee. Bakindo ki ya, “Oni nye kina Yereo yo daho maingbaroni ka funa ni, fuo gure oni ki yega.”

6Ho aAmono abi he ni ya payo gbere ti Dawidi, Anuna na aAmono ki kedi taranda feda 1,000 ka ngbe angbagidavura na abanduri afarasi Mesopotamia yo, na Arama-maka yo, na Soba yo.

7Si du i angbe angbagidavura ti ni wa 32,000, na bakindo aMaka na gako aborosovura, ko aye ka zia bataya barangba Medeba. AAmono ki dungura tiyo adungura rogo gayo abaakporo du, ki ye sa vura.

8Ho Dawidi agi he ni, ko ki kedi Yoaba, na rimbasa airanyaka dunduko.

9AAmono ki kuru, ki tangara tiyo sa vura kuti ngbadimo bakporo, agu abakindo naaye i adu kina haurago yo ni sa yo.

10Were ho Yoaba abi he ni ya vura oro pati ko ku barangba ko na ku gii ko yo a, ko ki sia aboro dagba gu siasia aboro nga ga aYisaraere yo, ki tangara yo sa vura kuti aSurio;

11gu yangara aboro ko ki fu yo ku be Abisai nangia unvuruako, ko ki tangara yo sa vura kuti aAmono.

12Ko ki ya, “Ka aSurio du nyanyaki ki susi re, oni ki ye ka unda re; ono ka aAmono du nyanyaki ki susi ro, mi aye ka unda ro.

13Mo du ngangara, ani mangi pai wa akumba tipa gaani aboro, na tipa agu abaakporo nga ga gaani Mbori. Yekova mangi gu pai ngba bangiriko.”

14Si du Yoaba na agu aboro naadu na ko ki mbedi ku barangba aSurio sa vura; i ki oro be ko.

15Ho aAmono abi he ni ya aSurio oro, i ki oro a tigayo be Abisai, nangia unvurua Yoaba, ki rimi ku bakporo yo. Yoaba ki yega ku Yerusarema yo.

16Ho aSurio abi he ni ya aYisaraere di be yo, i ki kedi asunge ka ye na agu aSurio nadu mbiti Ferata yo, na Sofaka nangia barutiri rimbasa aborosovura nga ga Adadezere ku ri yo.

17I ki gumba ha fu Dawidi; ko ki dungura aYisaraere dunduko, ki si Yaradene, ki ye sa yo, ki re vura kuti yo. Si du ho Dawidi are vura ni kuti aSurio, i ki so vura na ko.

18ASurio ki oro be aYisaraere; Dawidi ki imi aboro Suria wa aboro ngbagidavura 7,000, na aboro ndue wa 40,000, ki imi Sofaka barutiri gayo rimbasa aborosovura.

19Ho avuru Adadezere abi he ni ya aYisaraere di be yo, i ki mangi pa zereda na Dawidi, ki ra fu ko. Ka aSurio aida nga ka manga pa aAmono berewe ya.

← Chapter 18 Jump to: Chapter 20 →