1 Chronicles 17

Zande

← Chapter 16 Jump to: Chapter 18 →

1Si adu wa gere, ho Dawidi araka ni tii gako bambu yo. Dawidi ki ya fu Natana nangia nebi, “Mo bi nga, mi naraka rogo bambu ngua kedara, ono sanduki ga Yekova mokido naima ku tii bamburoko yo.”

2Natana ki ya fu Dawidi. “Mo mangi agu apai du kpotoro yo dunduko, bambiko Mbori du na mo.”

3Ono ni kina gu yuru re sangba Yekova ki ye fu Natana, niya.

4“Mo ndu ki gumba pai fu gi moyambu nga Dawidi, ki ya. ‘Ya Yekova wé: Mo adua nga bambu fere mi nira rogo ho te.

5Mi naraka nga rogo bambu tona ti gu uru mi aye na aYisaraere, daku areme te, ono mi nidu kina rogo bamburoko nita ku bani na ku bani, na rogo baraka ku bani na ku bani a.

6Ti agu arago dunduko mi anandu rogo ho na aYisaraere dunduko, mi agumba pai fu gu basapungbanga nga ga aYisaraere ni, nangia gu ni mi arugu ni ka riga gimi aboro? niya. “Tipagine oni adua nga bambu kedara ti ni fere ya?” ’

7Were mo ya fu gi moyambu nga Dawidi. ‘Ya Yekova nga ga arimbasa ko wẽ. Mi adi ro banambu yo pati peka fuo akandoro, mo du ni bazogo ku ri gimi aboro nga aYisaraere.

8Mi anidu na mo ho mo anidu ku ho ni a, ki nirogo avuraro ku sa yo ti ro, mi asa rimoro, wa kina rimo gu kikindigi yo du auru kpotosende.

9Mi ayugo ba fu gimi aboro aYisaraere, ki moi yo yo, i raki kina rogo gayo rago, ka i afuda nga ho berewe ya: ka awiri gbegberẽpai arungosi nga yo berewe wa si adu ti bambata ha ya,

10ti gu uru mi arugu abasapungbanga i du ku ri gimi aboro aYisaraere; mi azoga avuraro dunduko. Ku ri gure mi gumba ha foro ya Yekova azugasi ngbatungaiu.

11Ho ga rame ka nyasa ni mo ki kpi fuo atitaro, mi amaa wiro fuo ro, nga gu ni enge ti kina ro. Mi anyakasa gako ngbi.

12Ko ni tiko nikadua bambu fere, mi anyakasa pa gako mbatabakindo nye anye kindi.

13Mi adu ni bako, ko ki du ni wire; mi adía nga gi inapai ti ko ku sa yo te, wa mi adi he ti gu ko naadu mbata foro,

14ono mi anyakasa ko rogo gi bambu na rogo gi ngbi nye anye kindi, pa gako mbatabakindo ki du ni nyakasinyakasi he nye anye kindi.’ ”

15Were ku sangba agi apai re dunduko, na gi yuguyuguapai dunduko re a, Natana agumba paha kina wo fu Dawidi.

16Bakindo Dawidi ki rimi ki sungu ku bara bangiri Yekova, ki ya, “Ako Yekova Mbori, da nga mi, gini he nga ngbatungare, mo nagasa re ti ni ki da ku awere?

17Ako Mbori! gure nangia toni pai bangiro, ono mo gumba pai awere tipa ngbatunga ga moyambu tipa gu gbtinga rago du koyo nikaye. Ako Yekova Mbori! mo ki bere pa re wa bakere boro gbe.

18Gini pai ka Dawidi gumba ha foro berewe tipa gu taarimo mangi mo fu ga moyambu? Bambiko mo ni tiro ini kpoto ga moyambu yo.

19Ako Yekova, mbiko pa ga ga moyambu pai, na kuti sangba kpotoro yo, mo namangi gi bakere apai re dunduko, ka yugo gi bakere apai re i ini he dunduko.

20Ako Yekova, a nga boro ho wa mo te, a nga kura Mbori ho berewe fuo ro a te, kuti agu apai du gi ani ni turani.

21Gini kura rikaaboro du nga ho auru kpotosende wa gamo aboro nga aYisaraere? nga agu yo Mbori andu ka batasa yo i du ni gako aboro nzunzu, ka maa rimoro ni bakere he be bakere baapai na iiriwoapai a, moo arikaaboro barangba gamo aboro, nga agu yo mo abatasi yo ni kusa yo Ezipeta yo?

22Bambiko mo anyakasi gamo aboro aYisaraere tipa ro i du ni gamo aboro nye anye kindi; ako Yekova, mo adu ni gayo Mbori.

23Ako Yekova, awere, gu pai gumba mo tipa ga moyambu na tipa ngbatungako mo nyakasi he nye anye kindi, ki mangi he wa gumba mo pa ha.

24Rimoro adu ni nyakasinyakasi he ni taasitaasi he nye anye kindi, niya. Yekova nga ga arimbasa ko, nga ga aYisaraere Mbori, ko nga ga aYisaraere Mbori, ngbatunga ga moyambu nga Dawidi adu ni nyanyaki he ku bara bangiro.

25Ako gi Mbori, bambiko mo kusi pai fu ga moyambu ki ya mo afu ngbatunga fu ko; si ini ga moyambu he ti ni kpotoko yo ka kpara kpe foro.

26Ako Yekova, mo nga Mbori, mo nakido he tipa gi wene pai re fu ga moyambu;

27si ngba ti ro awere ka fu maku fu ngbatunga ga moyambu, ya si nye anye kindi ku bara bangiro; bambiko mo, Ako Yekova mo nafu maku, maku ki nye anye kindi.”

← Chapter 16 Jump to: Chapter 18 →