1 Chronicles 21

Zande

← Chapter 20 Jump to: Chapter 22 →

1Bakitingbanga ki guari kuti aYisaraere, ki wo ti Dawidi ko gedi bange aYisaraere.

2Si du Dawidi ki ya fu Yoaba na fu abarutiri rimbasa aborosovura, “Oni ndu ka geda bange aYisaraere tona Berasaba yo ki da ku Dana yo a. Oni ki yega na paha fere, mi ini pa waĩ du bange yo.”

3Ono Yoaba ki ya, “Yekova gbia kura aboro ku ti yo bara 100 ku ri agu yo du awere! Ono gi gbia nga bakindo, a nga i dunduko nga avuru gi gbia, te? Tipagine gi gbia aida gi pai ti ni re? Tipagine ka ko du ti ni ni baenge pa tindika fu aYisaraere?”

4Wa si avura du wo ga bakindo pai adi be Yoaba. Si du Yoaba aguari ti ni, ka ndu rogo ringara aYisaraere dunduko, ki yega ku Yerusarema yo berewe.

5Yoaba ki fu gedigedi bange aboro fu Dawidi. Ku Yisaraere yo i adu dunduko wa akumba mirioni sa na 100,000 narengbe na gbe basape. Ku Yuda yo i adu wa akumba 475,000 narengbe na gbe basape a.

6Ono ngbatunga Revi na Benyamina ko ageda nga yo ku dagba yo te; bambiko sangba bakindo adu ni gbegberẽpai bangiri Yoaba.

7Ono gi pai re agbere ti Mbori, si du ko amangi aYisaraere ti ni.

8Dawidi ki ya fu Mbori, “Mi mangi bakere ingapai ni gu pai mangi mi he re. Ono awere, mi nazungadi ro, mo di gu irairapai nga ga ga moyambu ku sa yo; bambiko mi mangi pai ni mumungo ho.”

9Yekova ki gumba pai fu Gada, ga Dawidi babiapai, ki ya,

10“Mo ndu ka gumba pai fu Dawidi, ki ya, ‘Ya Yekova wé, Mi ringbisi apai foro biata; mo sía gu sa dagba ha yo, mi mángi he foro.’ ”

11Si du Gada ki ye koyo du Dawidi ni, ki ya fu ko, “Ya Yekova wẽ, ‘Mo sía gu mo akpi nyemu he:

12watadu gará gberángbi du biata; watadu i nimangi roni amanga barangba avuraroni diwi ki du biata, ho ga avuraroni basape ka gbarasa roni ni; watadu uru biata ga Yekova basape ki du kuti roni, nga tata kaza gberángbi rogo ringara, ga Yekova maraika ki gbarasi aboro rogo ga aYisaraere arago dunduko.’ Si du awere mo berẽ pa gu karagapai mi ka karaga ha fu gu ko nikedi re.”

13Dawidi ki ya fu Gada, “Mi awere ngba bakere kpakarakpakara pai; mi fu tire awere ku be Yekova, bambiko nunga aboro ti ko ni bakere he; ka mi ti nga ku be boro ya.”

14Si du Yekova akedi tata kaza gberángbi ti ni ku ri aYisaraere; akumba aYisaraere ki kpiki wa 70,000.

15Mbori ki kedi maraika ku Yerusarema yo ka gbarasa ha; ono ho ko adu ni wa ko nikagbarasa ha, Yekova abi he, ko ki birĩ tiko ti gu gbigbitapai re; ki ya fu gu maraika naimo yo, “Si rengbe; mo zogo bero awere.” Ga Yekova maraika ki ru pati gu bataka zende ahe nga ga Orunana boro Yebuso.

16Dawidi ki tuka bangiriko ki bi ga Yekova maraika ko ru dagba kpotosende na ngbangbaturũ, basape ki du beko ko agbe he ki taĩ he ku Yerusarema yo. Dawidi na abaakumba ki ukadi tiyo na mbuzaroko ki tiwi ni kpakpuyo ku sande.

17Dawidi ki ya fu Mbori, “A nga kina mi nafu rugute i gedi bange aboro, te? Kina mi namangi ingapai ni gbigbita ha gbe. Ono agi akandoro re, gini pai mangi yo? Ako Yekova gi Mbori, mi nakpara foro, bero du kina kuti re, na kuti ngbatunga buba; ono ka tata kaza gberángbi ti nga ku ri gamo aboro ya.”

18Ga Yekova maraika ki rugu Gada ko ya fu Dawidi Dawidi ndu ka dua bamotumo fu Yekova rogo gu bataka zende ahe yo nga ga Orunana boro Yebuso.

19Si du Dawidi andu koyo kuti sangba Gada, gu ko agumba ha ti rimo Yekova.

20Were wa Orunana ataka nganu ko ki aria tiko, ki bi gu maraika re; agu awiriko biama naadu na ko i ki oko tiyo.

21Wa Dawidi ada koyo du Orunana ni, Orunana ki ya ngere ki bi Dawidi ki kuru bataka zende ahe yo, ko ki nugadi ni irisa ku bara bangiri Dawidi ni kpakpuko ku sende.

22Dawidi ki ya fu Orunana, “Mo fu gi rago fere re nga ga bataka zende ahe mi dua bamotumo rogo fu Yekova mo ka ida pa ha fere tipa ndikidi genoho du ― ya kaza gberángbi guari ti aboro.”

23Orunana ki ya fu Dawidi, “Mo di he ni gamo; gi gbia nga bakindo mangi gu pai na ni nga gu ngba bangiriko; mo ngere, mi fu abaabagara foro tipa zozo amotumo, na aútaka ahe tipa nyake, na nganu tipa motumo riahe. Mi fu he dunduko.”

24Bakindo Dawidi ki ya fu Orunana, “Ai, ono mi angbé he ni rengo kina kuti ndikidi genoho; bambiko mi adia nga gu he gbua nga gamo ka fu he fu Yekova te, ka mi tumo nga ni zozo amotumo zanga ngbe he angbe a te.”

25Si du Dawidi ki fu asekere dahabu 600 fu Orunana ki ringbisi baróaha mbembedi na akiro ribua, tipa gu ba re.

26Dawidi ki dua bamotumo ho fu Yekova ki tumo ni zozo amotumo na amotumo zereda, ki poi ku ari fu Yekova, Yekova ki karaga pai fu ko ngbangbaturũ yo ni we ku ri bamotumo zozo motumo.

27Yekova ki rugu gu maraika re; ko ki moi gako basape berewe ku fuka ha yo.

28Ti gu rago re, ho Dawidi abi he ni ya Yekova karaga pai fu ko rogo ga Orunana bataka zende ahe yo nangia boro Yebuso, ko ki fu gako amotumo yo.

29Bambiko gu banye nga ga Yekova, nga gu Mose amangi he ngbakungba yo, na bamotumo zozo motumo adu ti gu rago re tumbatumba rago Gibona yo.

30Ono Dawidi arengba nga ka ndu koyo ka sana Mbori te, bambiko ko agunde agunde be gu basape nga ga ga Yekova maraika.

← Chapter 20 Jump to: Chapter 22 →