Exodus 15

Zande

← Chapter 14 Jump to: Chapter 16 →

1AMose ki bi gi bia re na awiri aYisaraere fu Yekova, ki ta bi bia niya, Mi abí bia fu Yekova, bambiko ko nadi be pai ni taasitaasi rimoko; ko nabafu afarasi na abandurira ku baime yo.

2Yekova nga gi ome na gi bia, ko naye ka du ni gi bata; gi Mbori nga gi ko re, mi atámbua ko atambua, nga ga buba Mbori, mi akíisa pa rimoko akiisa.

3Yekova nga boro sovura; rimoko nga Yekova.

4“Ko nabafu ga Faro angbagidavu ra na gako rimbasa aborosovura ku baime yo; gako siasia abarutirivura arinda ku Zamba Baime yo.

5Dudungura ime afu ku ri yo; i arinda ku dudungura ime yo wa kina mbia.

6Ako Yekova, kumbabero du ni taasitaasi he rogo tandu, Ako Yekova, kumbabero nakuadi avurarani rukutu.

7Mo nadia be agu yo nasa mungu kuti ro ni gu babakere he nga ga taarimoro; mo nakeda ga nzengerenzengere zinga, si ki riti yo arita wa nzinga.

8Ime atumba tihe be gu onga nakura õro yo, angiri baime adungura tihe wa guguda; dudungura abaime akputa akputa bebere baime yo.

9Vurarani aya, ‘Mi adó fuo yo, mi agbía yo, mi akpáraka ũmozi, gi nyemuhe azéra azera be yo. Mi amó gi basape, ki gbarasi yo ni bere.’

10Mo aya na ga yuge, baime ki fu ku ri yo; i arinda ku ome baime yo wa dongo.

11“Ako Yekova, da du wa mo dagba ambori yo? Da du wa mo, du ni taasitaasi ro rogo kparakpara ziazia apai, i nita tambua ro nigunde ti ro, wa mo amangi iiriwoapai?

12Mo ataĩ kumbabero, sende ki mbiri yo.

13“Mo angbe ku mbata yo fu agu aboro nga agu yo mo atumo yo ni ga inapai, mo agasi yo ku rogo ga kparakpara ziazia baraka ni ga ome.

14Aboro agi he, i nakio akio; imisirihe azi araki Feresete yo.

15Si nairiwo airiwo ti agbia Edome; abanamaku nazia abaworimo Moaba; araki Kanana yo abirikpo dunduko ku sa yo.

16Gbudagbuda zi yo, gunde nati ti yo; ongo yo aonga kii wa kina mbia mbiko nyanyaki bero, Ako Yekova, daho gamo aboro ka susa ni, daho gamo aboro Ka susa ni, nga agu yo mo angbe yo.

17Mo ayé na yo, ki rũ yo ri gamo bagangara. Ako Yekova, si nga gu rago, mo ambakadi tipa ro tigamo ka raka rogo ho, Ako Yekova, si nga gu kparakpara ba, mo anyakasi he ni bero.

18Yekova azóga rago nye anye kindi.”

19Bambiko ga Faro afarasi andu ku baime yo, na gako angbagidavura na abanduri afarasi, Yekova ki karaga ime berewe ku ba hi he yo si ki fu ku ri yo; ono awiri aYisaraere asi kina ri ugu sende dagba baime.

20Miriama ki di gaza ku beri, nangia denebi, nga dawiri Arona. Ade ki kuru fuo n dunduko na kundi ki nido gbere.

21Miriama ki karaga pai fu yo ki ya, “Oni bí bia fu Yekova, bambiko ko nadi be pai ni taasitaasi rimoko; ko nabafu afarasi na abanduri afarasi ku baime yo.”

22Mose ki ngbe ku mbata yo fu aYisaraere, i ki guari pati Zamba Baime yo ki ndu ku rogo gu ngbakungba nga Sura; i ki ndu ngbakungba yo rame ki du biata, ono i abi nga ime wa sa te.

23Ho i ada ni ku Mara yo, ka i arengba nga na mbira gu ime nadu Mara yo ya, bambiko si adu ni hĩhĩ he; si du i ayambu rimoho ti ni nga Mara.

24Aboro ki gumba rimo Mose, ki ya, “Gini he ani ka mbira ha?”

25Ko ki kpari fu Yekova; Yekova ki yugu ngua fu ko, ko ki ba ha ku ime yo, ime ki du ni wene he. Yekova afu rugapai fu yo yo na pa sarangbanga, yo ko aasadi yo ni a,

26ki ya fu yo, “Ka oni agía fugo Yekova kakaka nga gaoni Mbori ki nimangi gu pai ru aru bangiriko, ki nidege turoni ka gia gako arugute, ki nika kuti gako rugaapai, mi amánga nga roni na agu akaza mi amangi aEzipeto na ni te; bambiko mi nga Yekova bahusi roni.”

27I ki da ku Erima yo, yo gugaabi adu ni 12, na angua wa mbira 70; i ki zi bataya pati ime yo.

← Chapter 14 Jump to: Chapter 16 →