Exodus 8

Zande

← Chapter 7 Jump to: Chapter 9 →

1Yekova ki ya fu Mose, “Mo ndú koyo du Faro ni, ki ya fu ko. ‘Ya Yekova wẽ, “Mo ídi fu gimi aboro i ndu ka manga pare.

2Ka mo ká pa nduge fu yo mi agbárasa ga ringara na adari.

3Nire ahíka ahika be adari, ami andú ki da ku dimo kpuro yo, na ku rogo ga bamburame yo na ku auru ga barame, na ku rogo ga gamo amoyambu abambu, na ga gamo aboro a, na ku rogo gamo agbigiwi, na ku rogo gamo akurungbu fio riahe a.

4Adari ayé ku ri roni, na ku ri gamo aboro na ku ri gamo amoyambu dunduko.” ’ ”

5Yekova ki ya fu Mose, “Mo yá fu Arona, ‘Mo táĩ bero na ga ngbondo ku ri adi, na wiri adi na amunga, ki yambu adari ami ye ku rogo ringara Ezipeta!’ ”

6Si du Arona ki taĩ beko ku ri aime Ezipeta yo dunduko; adari ki kuru, ki dadi ringara Ezipeta dunduko.

7Ono abinza ki mangi a wo ni gayo birĩ, ki kusi adari ku ri ringara Ezipeta.

8Faro ki yambu aMose na Arona ki ya, “Oni zúngadi Yekova, ko rogo adari pati re na pati gimi aboro; mi ki idi he fu aboro i ndú ka tumo fu Yekova.”

9Mose ki ya fu Faro, “I nafu irisa foro ya mo ringbisi gu rago mi ka zúngadi he tipa roni na gamo amoyambu na tipa gamo aboro, ya i gbarasi adari ami guari pati ro na pati gamo abambu, ami ki nye kina Nire yo.”

10Ko ki ya, “Gba.” Mose ki ya, “Si dú wa gu pai gumba mo, mo ini he ya, a nga kura ko ho wa Yekova nga gaani Mbori te.

11Adari ki guari pati ro, na pati gamo abambu, na pati gamo amoyambu, na gamo aboro; ami ki nye kina Nire yo.”

12AMose na Arona ki kuru pati Faro ku zegi vo; Mose ki kpari fu Yekova tipa agu adari nga agu ra ko ambusi Faro na ami.

13Yekova ki mangi pai kuti sangba Mose; adari ki kpiki akpika dunduko rogo abambu, na avuru kporo yo, na aati yo.

14I ki dungura ra ku rogo abadona ra, ringara ki nifũ afũ gbada.

15Ono ho Faro abi he ni ya i ahi pai fu ko, ko ki nyakasi kpotoko yo ka ko adega nga tuko sa sangbayo ya; a wa Yekova agumba ha.

16Yekova ki ya fu Mose, “Mo yá fu Arona. ‘Mo táĩ ga ngbondo ki nari nvutu sende, si sa tihe ni azari ku rogo ringara Ezipeta dunduko.’ ”

17I ki mangi wo; Arona ki taĩ beko na ngbondo, ki nari nvutu sende, azari ki du ti kpoto aboro na ti anya. Nvutu ki sa tihe ni azari dunduko rogo ringara Ezipeta dunduko.

18Abinza ki mangi gayo birĩ ka kusa azari, ono i arengba nga na manga wo te. Si du azari ki du ti kpoto aboro na ti anya a.

19Abinza ki ya fu Faro. “Be Mbori nga gere.” Ono kpoto Faro ki nyaki anyaka, ka ko adega nga tuko sa sangbayo ya, a wa Yekova agumba ha.

20Yekova ki ya fu Mose, “Mo gúari ngbatutu wiso, ki ru bara bangiri Faro, wa ko andú ku di yo, ki ya fu ko, ‘Ya Yekova wẽ, “Mo idi fu gimi aboro i ndú ka manga pare.

21Ka mo aída nga fu gimi aboro i ndu ya, mo ngére, mi akéda wangu azii ku ri ro, na ku ri gamo amoyambu na ku ri gamo aboro, na ku rogo gamo abambu; ga aEzipeto abambu ahíka anika be wangu azii, na gu sende du yo ri he.

22Ni gu rago re, mi akpáraka ringara Gosene, nga gu gimi aboro naraka rogo, ka wangu azii tí nga koyo ya, mo íni he ya mi nga Yekova du rogo zegino dunduko.

23Mi amáa kparaka pai dagba gimi aboro na gamo yo. Gba gi yuguyugupai ka du re.” ’ ”

24Yekova ki mangi he wo; kere wangu azii ki rimi ku rogo ga Faro bambu, na ku rogo ga gako amoyambu abambu, rogo ringara Ezipeta dunduko, ringara ki gberẽ agberã be gu pai nangia ga wangu azii.

25Faro ki yambu aMose na Arona, ki ya, “Oni ndú, ki tumo fu gaoni Mbori rogo ringara no.”

26Mose ki ya, “Ru nga manga pai wo te; bambiko ani atúmo na agu anya nga anyakorokpa bangiri aEzipeto fu Yekova nga gaani Mbori. Were, ka ani atúmo na agu anya nga anyakorokpa bangiri aEzipeto, kina boro ku bangiriyo, i azúmuda nga rani ni ambia te?

27Ani andú ki ra ku gene biata ku ngbakungba yo, ka tumo fu Yekova nga gaani Mbori, wa ko ka ruga rani.”

28Faro ki ya, “Mi ídi he oni ndu, ya oni tumo fu Yekova nga gaoni Mbori ngbakungba yo; ono pai sa ka oni ndú nga tuturũ ku sa yo ya. Mo zúngadi he tipa re.”

29Mose ki ya, “Mo ngére, mi naguari pati ro, mi akpára fu Yekova ya wangu azii gúari gba pati Faro, na pati gako amoyambu na gako aboro a. Ono ka Faro mángi nga pai ni biriki berewe ni ka pa aboro ti ndu ka tumo fu Yekova ya.”

30Mose ki guari bara bangiri Faro, ki zúngadi Yekova.

31Yekova ki mangi pai kuti sangba Mose, ki do wangu azii pati Faro, na pati gako amoyambu, na pati gako aboro; ka zii anye nga sa ya.

32Faro ki nyakasi kpotoko yo ti gi rago re a, ka ko aida nga aboro ndu ya.

← Chapter 7 Jump to: Chapter 9 →