Exodus 7

Zande

← Chapter 6 Jump to: Chapter 8 →

1Yekova ki ya fu Mose, “Mo bí, mi sa ro wa Mbori fu Faro. Arona nga unvuruamo nikangia ga nebi.

2Mo ki gumba agu apai dunduko mi ka ruga ro na ni; Arona nga unvuruamo nikagumba pai fu Faro, ya ko kúsi awiri aYisaraere rogo gako ringara.

3Ono mi anyákasa kpoto Faro yo, ki ngeesi gimi yuguyuguapai, na gimi iiriwo yuguyuguapai rogo ringara Ezipeta,

4ono Faro adéga nga tuko sa sangbaro te; mi atáã bere ku ri Ezipeta, ki kusi gimi arimbasa aborovura nga awiri aYisaraere nga gimi aboro rogo gu ringara nga Ezipeta ni babakere mbusa.

5AEzipeto ki ini he ya mi nga Yekova, ho mi ka táã bere ni ku ri Ezipeta, ka kusa awiri aYisaraere dagba yo.”

6AMose na Arona ki mangi kina wo; a wa Yekova arugu yo, i amangi kina wo.

7Garã Mose adu 80, na ga Arona 83, ho i agumba pai ni fu Faro.

8Yekova ki ya fu aMose na Arona,

9“Ho Faro ka ya ni fu roni, ‘Oni yúgu gaoni iiriwopai,’ mo ki ya fu Arona, ‘Mo di ga ngbondo, ki ba ha ku sande ku bara bangiri Faro, si sá tihe ni wo.’ ”

10AMose ki ndu na Arona koyo du Faro ni, ki mangi a wa Yekova arugu yo na ni; Arona ki ba gako ngbondo ku sande ku bara bangiri Faro na ku bara bangiri avuruko, si ki sa tihe ni wo.

11Faro ki yambu airatatamana na airasoroka; abinza nga ga Ezipeta yo ki mangi he a wo ni gayo birĩ.

12Bambiko i abafu gayo angbondo ku sande ni ba sa sa, si ki sa ti he ni awo, ono ga Arona ngbondo ki mbiri gayo angbondo.

13Ono kpoto Faro yo ki ninyaki kindi ka ko adega nga tuko sa sangbayo ya; a wa Yekova agumba ha.

14Yekova ki ya fu Mose, “Kpoto Faro yo nanyaka anyaka ni rengo, ko naka pa nduge fu aboro.

15Mo ndú koyo du Faro ni wiso ho ko nikandu ni ku di yo. Mo ki ru pavuru di ka ngbisa ko, gu ngbondo nasa tihe ni wo mo ki di he ku bero.

16Mo ki ya fu ko, ‘Yekova, gu Mbori nga ga aEbere ko, ko kedi re kono du mo ni, niya, “Mo ídi he fu gimi aboro i ndu ka manga pare ngbakungba yo. Mo bí nga, mo agia nga sangba daku awere a te.”

17Ya Yekova wẽ, “Be gere mo ka ina gu pai ti ni nga, Mi nga Yekova: mo ngére, mi anára ime Nire yo na gu ngbondo du be re, si ki sa tihe ni kure.

18Agu atĩo du Nire yo ami akpíka akpika, Nire ki fũ afũ gbada, si nikagberã ti aEzipeto ka mbira ime Nire.” ’ ”

19Yekova ki ya fu Mose, “Mo yá fu Arona, ‘Mo di ga ngbondo ki taĩ bero ku ri agu aime nga ga Ezipeta, ku ri gayo adi, na gayo wiri adi, na gayo abarugudi, na gayo amunga, ya si sá tihe ni kure. Kure ayé ku rogo gu ringara dunduko nga Ezipeta, ku rogo agu aũtudaime nga ga ngua, na gu nga ga mbia.’ ”

20AMose na Arona ki mangi a wa Yekova arugu yo na ni; ko ki tumba ngbondo, ki nari gu ime nga Nire, ku bangiri Faro na ku bangiri avuruko, gu ime dunduko nga ga Nire si ki sa tihe ni kure.

21Agu atĩo nadu Nire yo, ami ki kpiki akpika dunduko. Ime Nire ki fu afu gbada, ka aEzipeto arengba nga na mbira gu ime nga Nire ya; kure adu rogo ringara Ezipeta dunduko.

22Ono abinza nga ga Ezipeta yo ki mangi a wo ni gayo birĩ; si du kpoto Faro yo ki ninyaki kindi ka ko adega nga tuko sa sangbayo ya, a wa Yekova agumba ha.

23Faro ki karaga tiko ki rimi ku rogo gako bambu yo, ka ko aruga nga tiko na gi pai re kpotoko yo a ya.

24AEzipeto ki geteke rago pangba Nire dunduko tipa ime ka mbira ha, bambiko i arengba nga na mbira ime Nire te.

25Rame anyasi saba fuo ta Yekova Nire.

← Chapter 6 Jump to: Chapter 8 →