Exodus 32

Zande

← Chapter 31 Jump to: Chapter 33 →

1Ho aboro abi he ni ya Mose aima aima gbe, ka ko azorã nga ri bagangara yo ni ipo ya, i ki dungura tiyo koyo du Arona ni, ki ya fu ko, “Mo gúari ki mangi ambori nga agu yo nikangbe ku mbata yo fu rani; bambiko gi kumba re nga Mose nayega na ani ringara Ezipeta yo, ani aina nga gu pai mangi ko te.”

2Arona ki ya fu yo, “Oni káfu agu atongo dahabu du tu adiaroni yo, na tu awironi yo na tu awironi yo nga ade, ki ye na ami fere.”

3Aboro ki kafu agu atongo dahabu nadu tuyo yo dunduko, ki ye na ami fu Arona.

4Ko ki rogo dahabu be yo, ki zaragasi he ki se he ni ũseka marã ni kpia wiri bagara; i ki ya, “Ako aYisaraere, gere nga gaoni ambori, nga agu yo nakusi roni ringara Ezipeta yo!”

5Ho Arona abi gi ni re, ko ki dua bamotumo barangba ha; Arona ki taki pande he ki ya, “Gba i ka manga pumbo fu Yekova.”

6I ki zingi ngbatutu wiso ki tumo ni zozo amotumo, ki ye na amotumo zereda; aboro ki susungu ka ri riahe, ki nimbiri he, i ki guari ka ngi mbaro.

7Yekova ki ya fu Mose, “Mo gúari ki zorõ ku sende yo; bambiko gamo aboro nga agu yo mo akusi yo ringara Ezipeta yo, i wasi tiyo;

8i sa tiyo ku bani ni ipo ti gu gene nga gu mi arugu yo kuti ni; i mbakadi kpia wiri bagara ni zaragasizaragasi marã, ki niirisi he, ki tumo fu he, ki ya, ‘Ako aYisaraere, gaoni ambori nga gere, nga agu yo nakusi roni ringara Ezipeta yo!’ ”

9Yekova ki ya fu Mose, “Mi bi agi aboro re, mo ngére, airanyakari nga yo;

10wa du he were, mo mbu re awere, gi zinga rúngudi fafoi kuti yo, mi ki ba tungayo; ono mi asá ro ni bakere rikaaboro.”

11Mose ki zúngadi Yekova nga gako Mbori, ki ya, “Ako Yekova, tipagine ga zinga arunguda fafoi ti ni kuti gamo aboro, nga agu yo mo akusi yo ringara Ezipeta yo ni bakere tandu, na ni nyanyaki bero?

12Tipagine aEzipeto ka gumba ha ti ni, ki ya, ‘Ko akusi yo ka manga yo gbegberẽ, ka imo yo dagba abaagangara, na ka ba tungayo auru kpotosende zegino dunduko’? Mo sá tiro ti ga nzengerenzengere zinga, ki sa ga berã ti manga gbigbitapai fu gamo aboro.

13Mo tíngidi pa aAbarayama, na Yisaka, na Yisaraere, nangia gamo amoyambu, nga agu yo mo azunga he ni tiro fu yo niya, ‘Mi angéesa ngbatungaroni wa akerekuru ngbangbaturũ yo, na gi ringara re dunduko nga gu mi agumba paha mi afú he fu ngbatungaroni, i adia ha ni gayo nye anye kindi.’ ”

14Yekova ki birĩ tiko ti gu gbigbitapai nga gu ko aberẽ pa manga ha kuti gako aboro.

15Mose ki sa tiko ki zorõ ri bagangara yo na kpasakpasa ambia dezirepai ue be ko, kekeapai adu ti akpakpuhe ue; kekeapai ki du ti ni ku bani na ku bani a.

16Gu kpasakpasa ambia re ki du ni ga Mbori sunge, gu kekepai re ki du ni ga Mbori, ni keke he auru gu kpasakpasa ambia re.

17Ho Yosua agi woro aboro ni wa i angbiko, ko ki ya fu Mose, “Woro vura napaa ku bataya yo.”

18Ono Mose ki ya, “A nga si wa fugo agu yo nadia sima te, watadu fugo agu yo napaa mbiko dia yo be yo a te, ono mi nagia ha wa fugo agu yo nabi bia.”

19Si ki ta du wa gere ni ba sa, ho ko ambedi ni ku bataya yo, ko ki bi wiri bagara na gu gbere i ado, ga Mose zinga ki rungudi arunguda, ko ki bafu gu kpasakpasa ambia nadu be ko, ki kuadi he tii mburu bagangara yo.

20Ko ki di gu kpia wiri bagara nga gu i amangi he, ki zo ho ni we, ki sa ha tubutubu wa ngungo, ki mi he ku ri ime, ki sosodi awiri aYisaraere i mbiri he.

21Mose ki ya fu Arona, “Gini pai mangi agi aboro foro re, ya mo moi bakere ingapai ku ri yo?”

22Arona ki ya, “Ka ga gi gbia zinga rúngudi nga fafoi ya; mo ini pa agi aboro re, ya i nakpi nyemu manga kina gbigbitapai.

23Bambiko i niya fere, ‘Mo mángi ambori fu rani nga agu yo nikangbe ku mbata yo fu rani; bambiko gi kumba re nga Mose nayega na ani ringara Ezipeta yo, ani aina nga gu pai mangi ko te.’

24Mi ki ya fu yo, ‘Agu yo du na dahabu be yo, i káfu he’; si du i aye na ni ti ni fere, mi ki bafu he ku we yo, gi kpia wiri bagara re ki kuru.”

25Ho Mose abi he ni ya aboro amanga gbarakagbaraka, mbiko Arona naidi he fu yo i mangi gbarakagbaraka, avurayo sawia yo,

26Mose ki ru ti ngbadimo bataya, ki ya, “Da nakpi nyemu ka raka fu Yekova? Ni yé kono du mi ni.” Awiri Revi ki dungura tiyo dunduko fuo ko.

27Ko ki ya fu yo, “Ya Yekova nga ga aYisaraere Mbori wẽ, ‘Oni ni ba sa sa mói gaoni basape ku pa dimoroni, ki gbafu dagba angbadimo bataya dunduko, oni ni ba sa sa ími awirinaroni na gaoni abadiangba na akuaroni.’ ”

28Awiri Revi ki mangi he kuti sangba Mose; aboro ki kpiki ni gu rago re wa akumba 3,000.

29Mose ki ya, “Areme oni dika tironi sa manga pa Y ekova, oni dunduko ni ba sa sa kina kuti awironi, na kuti awirinaroni, ko fu maku fu roni ni gi uru re.”

30Mose ki ya fu aboro wiso, “Oni aingi pai ni bakere he. Mi nandu awere koyo du Yekova ni; si ngia mi aréngba ka manga pa dada gaoni ingapai.”

31Mose ki karaga tiko koyo du Yekova ni, ki ya, “Ako, agi aboro re aingi pai ni bakere he; i mangi ambori fu yo ni dahabu.

32Ono, ka mo vú yo ti gayo ingapai awere ― ono ka si adú nga wo ya, mi nazungadi ro, mo gbándaka rimore rogo ga waraga nga gu mo ake he.”

33Yekova ki ya fu Mose, “Gu ni naingi pai kuti re, kina ni mi ka gbandaka rimoni rogo gi waraga.

34Mo ndú awere, ki ngbe ku mbata yo fu aboro ku rogo gu rago mi agumba paha foro; mo ngére, gi maraika angbé ku mbata yo foro. Atikawari ni gu rago mi ka ye, mi asá gayo ingapai kina ku ri yo.”

35Yekova ki mbusi aboro bambiko i amangi gu kpia wiri bagara nga gu Arona amangi he.

← Chapter 31 Jump to: Chapter 33 →