Exodus 4

Zande

← Chapter 3 Jump to: Chapter 5 →

1Mose ki karaga ha ki ya, “Ono, mo ngére, i aída nga pare te, i adéga nga tuyo sa sangbare a te, bambiko i ayá, ‘Yekova ayugo nga tiko foro te.’ ”

2Yekova ki ya fu ko, “Gine nga gu du be ro?” Ko ki ya, “Ngbondo du.”

3Ko ki ya, “Mo bá ha ku sande.” Mose ki ba ha ku sande, si ki sa tihe ni wo; Mose ki oro be ru.

4Ono Yekova ki ya fu Mose, “Mo táĩ bero, ki zadi ru ti saru” si du ko ki taĩ beko, ki zadi ru, u ki sa tiru ni ngbondo ku beko yo—

5“Ya i ini he ya Yekova, nga ga abayo Mbori, nga ga Abarayama Mbori, nga ga Yisaka Mbori, nga ga Yakoba Mbori, ko nayugu tiko foro.”

6Yekova ki gumba pai fu Mose berewe, ki ya, “Mo moi bero awere ti ngbaduro.” Ko ki moi beko ti ngbaduko, ho ko adi he ni ho, oni ngére, beko adu na ngbataka, ki vuru avura kpau wa morogumba.

7Mbori ki ya, “Mo mói bero ti ngbaduro berewe.” Ko ki moi beko ti ngbaduko berewe; ho ko adi he ni ti ngbaduko, oni ngére, si ki sa tihe berewe wa kina kura kpotoko.

8Mbori ki ya, “Ka i aída nga paro ya, ka i adéga nga tuyo sa sangba gi bambata yuguyugupai re ya, i aida pa gi kusa yuguyugupai re tie.

9Ka i aída nga kina pa gi yuguyuguapai ue re ya, ka i adéga nga tuyo sa sangbaro a ya, mo ki tu ime Nire yo, ki uka ha ku auru ugu sende; gu ime nga gu mo ka tu he Nire yo si asá tihe ni kure auru ugu sende.”

10Mose ki ya fu Yekova, “Ako gi Gbia, zaza bagumbapai nga mi te, mi adu nga wo mbata te, ka mi adu nga wo fuo gumba mo pai fu ga moyambu a ya; bambiko rõi ngbare arõa, mirãre afu nga zaza a te.”

11Yekova ki ya fu ko, “Da namangi ngba aboro? Da nasa boro ni irabubo, watadu ni irangbianga, watadu gu boro nangera, watadu iravurari? A nga mi nga Yekova, te?

12Si du mo ndú tie awere, mi adú na ngbaro, ki yugu gu pai foro mo ka gumba ha.”

13Ko ki ya, “Ako gi Gbia, mi nazungadi ro, mo kédi pai ku be gu ni mo akpi nyemu ka keda ni.”

14Ga Yekova zinga ki rungudi kuti Mose, ko ki ya, “A nga Arona ho nga unvuruamo nga boro Revi te? Mi ini ya ko rengbe ka fura wenengaĩ; mo ngére, ko naye ku ngbisa ro a, ho ko ka bi ro ni, ko adú pusiapusia kpotoko yo.

15Mo agúmba pai fu ko, ki moi pai ku ngbako yo; mi adú na ngbaro, na ngbako a, ki yugu gu pai foro mo ka manga.

16Ko agúmba pai fu aboro ku ba ro; ko adú wa ngba foro, mo ki du fu ko wa Mbori.

17Mo anidí gi ngbondo re ku bero, mo ki nimangi yuguyuguapai na ni.”

18Mose ki guari, ki karaga tiko koyo du Yetero ni nangia gbioko, ki ya fu ko, “Mi nazungadi ro mo idi he fere mi gúari, ki karaga tire koyo du ngbatungare ni du Ezipeta yo, ka bi he, si ngia i ni ungayo kindi.” Yetero ki ya fu Mose, “Mo ndú zezeredi.”

19Yekova ki ya fu Mose Midiana yo, “Mo káraga tiro ku Ezipeta yo; bambiko agu aboro naagbata ro ka imo roikpiki.”

20Mose ki di diako, na awiriko, ki moi yo ku auru dongi, ki karaga tiko ku rogo ringara Ezipeta yo. Mose ki di ga Mbori ngbondo ku beko.

21Yekova ki ya fu Mose, “Ho mo ka karaga tiro ni ku Ezipeta yo, mo bi he ya mo amánga gu iiriwo yuguyuguapai ku bangiri Faro nga gu mi amoi ku vurube ro dunduko. Ono mi anyakasa kpotoko yo ka ko aída nga fu aboro i gá ya.

22Mo ki ya fu Faro, ‘Ya Yekova wẽ, Yisaraere nga wire, nga bambata gi vungu,

23mi naya foro, “Mo ídi fu wire ko gá, ka manga pare”; ono ka mo ká pa gate fu ko, mo ngére, mi aimo wiro aimo nga kumba nga bambata ga vungu.’ ”

24Si ki ta du wa gere ngba gu gene ku bambu ongoda yo Yekova agbia Mose, ki asadi ka imo ko.

25Were Sipora ki di tĩtĩ mbia ki yere wiriri na ni na yeratise, ki moi he pati nduko, ki ya, “Mo nga kumba ku de fere nga ga kure!”

26Were, ko ki mbu Mose. Ri ki ya, “Mo nga kumba ku de nga ga kure,” bambiko pa yeratise.

27Yekova ki ya fu Arona, “Mo ndú ku ngbakungba yo ka ngbisa Mose yo.” Si du ko ki ndu, ki ngbisi ko pati ga Mbori bagangara ki nyoro pa ngbako.

28Mose ki gumba agu apai fu Arona dunduko Yekova akedi ko na ni, na gu yuguyuguapai dunduko Yekova arugu ko ko mangi he.

29AMose ki ndu na Arona ki dungura ga awiri aYisaraere abaakumba dunduko.

30Arona ki gumba agu apai dunduko Yekova agumba fu Mose re, ki mangi yuguyuguapai ku bangiri aboro.

31Aboro ki idi he; ho i agi he ni ya Yekova aye koyo du awiri aYisaraere ni, ki bi gayo imisiripai, i ki dua riyo ki irisi ko.

← Chapter 3 Jump to: Chapter 5 →