Exodus 30

Zande

← Chapter 29 Jump to: Chapter 31 →

1“Mo ki mangi bamotumo tipa zo fuõngua auru he; mo amánga ha rogo gu ngua du wa mbegure.

2Bagiza ha adú wa bagiza mbiribe sa, patihe ki du wa bagiza mbiribe sa, bagiza pavuruhe biama adú wa sa, basonaha ki du wa bagiza mbiribe ue; i ki mangi agbangaha si ki du na ni wa sa.

3Mo ki dadi kpotoho ni ndikidi dahabu, rihe, na pavuruhe kirikiri, na agbangaha a; mo ki mangi he kirikiri rogo dahabu wa kpakpari.

4Mo ki mangi abenge rogo dahabu ue tipa ha; tii akpakpari he yo ti pangba apavuruhe ue ku bani na ku bani, si adú tipa angbongbo ka tinda ha ti ni.

5Mo ki mangi agu angbongbo re kina rogo ngua du wa mbegure ki dadi he ni dahabu.

6Mo ki moi he barangba gu roko kparaba du pati sanduki dezirepai, ku barangba bainapai du ku ri dezirepai, yo mi ka angbisa ro ni.

7Arona nikazo wene fuõngua auru he; na awiso ho ko ka ambakada awe ni, ko ki nizo ho,

8ho Arona ka nitigi awe ni na anyemu ko anizo ho a, si ki ningia gu fuõngua nye anye kindi ku bara bangiri Yekova tipa rika angbatungaroni dũ.

9Oni atúmo nga na kungba fuõngua auru he, na zozo motumo, na gu motumo nga ga riahe te; oni aúka nga mbirimbiri motumo ku auru he a te.

10Arona animangi pa dada ingapai ri agbangaha bara sa na garã na agarã; ko amánga pa dada ingapai tipa ha bara sa na garã na agarã ni kure gu motumo du tipa ingapai, nga gu nga ga dada ingapai, dagba arika ngbatungaroni dunduko; si ni kparakpara he ziazia fu Yekova ki susi.”

11Yekova ki ya fu Mose,

12“Ho mo ka geda bange awiri aYisaraere ni ki ini pa bange yo, akumba ki fu motumo dunduko fu Yekova tipa mbisimoyo, ho mo ka geda yo ni, gberãngbi ka ye ku dagba yo yo ho mo ka geda yo ni.

13Agu aboro dunduko ni ba sa sa ka susi tipa geda yo yo i afú bebere sekere sa ringbisi he na pa gu sekere nga ga kparakpara ba, (sekere sa nga agera 20), bebere sekere ki du ni tumbatumba gamahe fu Yekova.

14Agu yo dunduko ka susi tipa geda yo yo, garãyo nidu 20 watadu susi he, i ki fu gu tumbatumba gamahe nga ga Yekova.

15Ho aboro ka fu gu tumbatumba gamahe ni nga ga Yekova ka manga pa gayo dada ingapai, airakumuko afú nga ha ki susi bebere sekere sa te, ka rungorungo aboro afú nga ha si ki kpa ti bebere sekere sa a ya.

16Mo ki di gu marã re be awiri aYisaraere tipa manga pa dada ingapai, ki kpara ha sa sunge bamburoko dungurati; ya si du ni ũtingidapa bara bangiri Yekova tipa awiri aYisaraere ka manga pa dada ingapai tipa yo.”

17Yekova ki ya fu Mose,

18“Mo amánga akurungbu a rogo sirigi, ndu mburuhe ki du kina rogo sirigi a, tipa zundatise. Mo ki moi he dagba bamburoko dungurati na bamotumo, ki uka ime ku rogo ho,

19aArona na awiriko i ki nizundu beyo na nduyo yo.

20Ho i ka andu ni ku bamburoko dungurati yo, i ka azunda tiyo na ime, ya ka i kpiki nga ya, watadu ho i ka nimbedi ni na bamotumo ka amanga pai, ka zo gu motumo i amanga ha ni we fu Yekova.

21Si du i ka nizundu beyo ti ni na nduvo, ka i kpiki nga ya: si ki du ni rugapai fu yo nye anye kindi, fu kina ko na fu atitako a tipa arika ngbatungayo dunduko.”

22Ku ri gere, Yekova ki ya fu Mose,

23“Mo dí gi bawene fuõngua re: nga ziazia tome mure wa akiro muambi na agarama 400, na wene fuõ sisi ngua nga kinanona wa beberehe nga akiro biama na agarama 200, na wene fuõ nzinziri koko wa akiro biama na agarama 200,

24na sisi kinanona wa akiro muambi na agarama 400, ringbisi he dunduko kuti pa barõa gu sekere nga ga kparakpara ziazia ba, na nzeme ngua wa banga wa aruere sita;

25mo ki mangi agi ahe re ni kparakpara ziazia nzeme tipa mbeda ha ni kodikodi he wa abangbasiaha namanga ha; si ki du ni kparakpara ziazia nzeme tipa mbeda ha.

26Mo ki mbedi bamburoko dungurati na ni, na sanduki dezirepai a,

27na mbisa, na gaha aũsunge dunduko, na baduawe na gaha aũsunge, na bamotumo nga ga fuõngua,

28na gu bamotumo nga ga zozo motumo na gaha aũsunge dunduko, na kurungbu zundatise na ndu mburuhe a;

29mo ki kpara ha si du ni kparakpara ziazia ha ki susi; gu he ka azada ha si ki du ni kparakpara ziazia he a.

30Mo ki mbedi Arona na awiriko ki kpara yo, i nimángi pare rogo pa ga aboromotumo sunge.

31Mo ki gumba pai fu awiri aYisaraere, ki ya, ‘Gere nikangia kparakpara ziazia nzeme mbeda fere dagba arika ngbatungaroni dunduko.

32Ka i aúka nga ha ku ti kpoto kura aboro ya, ka oni amánga nga gu kura ha wa kina ha a ya; si ni kparakpara ha ziazia, si ki du adu ni kparakpara ziazia he fu roni.

33Gu boro ka mangi gu wa kina ha, watadu ka uka ha kuti kungba boro i akpára ni ku sa yo ti gani aboro.’ ”

34Yekova ki ya fu Mose, “Mo di wene fuõngua, na tomengua, na wene fuõ ngbaandi, na wene tomengua nga garabana, na fuõngua, wa sa na fuõngua du wa tomegiwi, (barõaha dunduko ki du wa sa),

35mo ki mangi wene fuõngua na ni, wa abangbasiaha namanga ha, ki ba tikpo ti ni, ni gigiri he, ni kparakpara ha ziazia;

36mo ki suka gu ni umba ha tubutubu, ki moi bete he barangba dezirepai tii bamburoko dungurati yo, yo mi ka angbisa ro ni; si adu fu roni ni kparakpara ziazia he ki susi.

37Gu wene fuõngua mo ka manga ha ringbisi he na kina pa manga ha, ka oni amánga nga ha tipa roni ya; si adu tipa roni ni kparakpara ziazia he fu Yekova.

38Gu boro ka mangi gu wa kina ha, ka gia fuõ ho, i akpára ni ku sa yo ti gain aboro.”

← Chapter 29 Jump to: Chapter 31 →