Exodus 20

Zande

← Chapter 19 Jump to: Chapter 21 →

1Mbori ki ta gumba agi apai re dunduko, niya,

2“Mi nga Yekova nga gamo Mbori, nga gu ko nakusi ro ringara Ezipeta yo, rogo kporo akanga.

3“Ka kura Mbori dú nga be ro fuo kina re ya.

4“Ka mo mángi nga sese kpiahe ya, na kpia gu he du ngbangbaturũ ari vo, na gu du sende no, na gu du ime yo tii sende yo wa sa ya;

5ka mo anúgadi nga fu he ya, ka mo aírisa nga ha a ya; bambiko mi Yekova nga gamo Mbori nga iraringo Mbori. Mi nambusa awiri aboro ambusa tipa gu irairaapai nga ga abayo da kina ho rikayo ka du ni biata na biama nga agu yo nasoga re.

6Ono mi ki yugu inapai fu agu yo ni dungu yo nakpi nyemu re, ka kuti gimi arugute.

7“Ka mo yámbu nga rimo Yekova nga gamo Mbori gbua ya; bambiko Yekova ambú nga ha fu gu ni niyambu rimoko gbua te.

8“Mo nitíngidi pa rago, sabiti ka kpara ha ziazia.

9Mo nimángi ga sunge rame ki du sita, mo ki mangi ga sunge dunduko;

10ono saba rame nga rago sabiti fu Yekova nga gamo Mbori; ragoho ka mo amánga nga sunge wa sa ya, mo, na wiro, na gu wiro nga de, na ga moyambu, na ga nagbindi, gamo zogozogo anya, na gu kungba boro ka du kpuro yo;

11bambiko Yekova amangi ngbangbaturũ, na sende, na baime, na agu ahe dunduko du rogo ho, rame ki du sita, saba rame ko ki ongodi. Si du Yekova afu maku ti ni ku ri rago sabiti, ki kpara ha.

12“Mo niírisi bamo na namo, ka ima aima gbe rogo gu ringara Yekova afu foro nga gamo Mbori.

13“Ka mo ími nga boro ya.

14“Ka mo mángi nga bari ya.

15“Ka mo dí nga he ya.

16“Ka mo gúmba nga zire kuti kuaro ya.

17“Ka mo kpí nga ga kuaro kporo ya; ka mo kpí nga dia kuaro ya, na gani moyambu, na gani nagbindi, na gani babagara, na gani dongi, na agu ahe dunduko nga ga kuaro.”

18Ho aboro agi woro sumba gumba ni dunduko, ki bi aikpira gumba ki gi woro nambongo ki bi bagangara wa si agunda suu, i ki nigunde ki nikio akio; ki ru tuturu.

19I ki ya fu Mose, “Kina ro gúmba pai fu rani, ani ki nigi he; ono ka Mbori gúmba nga pai fu rani ya, ani ka kpika.”

20Mose ki ya fu aboro, “Ka oni gúnde nga ya; bambiko Mbori ye ka asada roni, ya gunde ti ko dú ti roni, ka oni aínga nga pai ya.”

21Aboro ki ru tuturũ, Mose ki mbedi ku pati gu tikatika bitimo re ho Mbori adu ni.

22Yekova ki ya fu Mose, “Mo yá fu awiri aYisaraere wẽ: ‘Oni tigaoni ima bi he ya mi du ngbangbaturũ, yo nafura na oni.

23Ka oni mángi nga kura ambori rogo feda fuo kina re ya, ka oni mángi nga ambori rogo dahabu fu roni a ya.

24Oni amánga bamotumo fere rogo sende, ki nitumo ri he ni gaoni zozo amotumo, na gaoni amotumo zereda, gaoni akandoro na gaoni abaabagara; rogo agu arago dunduko yo mi ka ambakada rimore ni, mi ayé aye koyo du oni ni, ki nifu maku fu roni.

25Ka oni mángi bamotumo fere nga ga mbia ka oni dúa nga ha na sekeseke ambia ya; bambiko ka oni di usunge kuti ni oni ima sa ha ni bibiriko ho.

26Ka oni dákpa nga ti ababita ku pati gi bamotumo yo a ya, i ka bi kundiri roni yo.’

← Chapter 19 Jump to: Chapter 21 →