Exodus 33

Zande

← Chapter 32 Jump to: Chapter 34 →

1Yekova ki ya fu Mose, “Mo gúari erẽ, ki ga, oni na agu aboro mo akusi yo rogo ringara Ezipeta yo, ku rogo gu ringara nga gu mi azunga he fu Abarayama, fu Yisaka, na fu Yakoba, niya, ‘Mi afú he fu angbatungaroni.’

2Mi akéda maraika ku mbata yo foro, mi adánda aKanano, aAmoro, aEto, aPereso, aIvo, na aYebuso.

3Oni ndú ku rogo gu ringara du adu na mamuanya na nzeme anyege kpaima; ono mi andú nga ku mbata yo ku dagba roni yo te, bambiko oni nga gu rikaaboro du ni airanyakari, mi ka ba tungaroni gene.”

4Ho aboro agi gi gbigbitaapai ni re, i ki rungo; a nga boro sa navo gani afongo ti ni te.

5Bambiko Yekova aya fu Mose, “Mo yá fu awiri aYisaraere, ‘Oni nga gu rikaaboro du ni airanyakari; ka mi ndú ku dagba roni ngbutuko, mi abá tungaroni aba. Si du tie, oni úru gaoni afongo ti roni, mi íni gu pai mi ka manga ha fu roni.’ ”

6Awiri aYisaraere ki uru gayo afongo ti yo tona Bagangara Orebe yo, na ku mbata yo kindi.

7Were, Mose anandu na bamburoko ki nidua ha ku ari gii bataya yo tuturu; ko ki niya ti ni, bamburoko dungurati. Si ki ta du wa gere, agu aboro dunduko naakpi nyemu ka gbata Yekova, i anandu koyo du bamburoko dungurati ni gii bataya yo.

8Were, ho Mose anakura ni ku zegi yo ka udu ku bamburoko yo, aboro dunduko ki niguari, ki rundu ku ari pa ngbadimo gayo bamburoko ki ningere fuo Mose, daho ko anirimi ni ku rogo bamburoko yo.

9Ho Mose anirimi ni ku bamburoko yo, gu bakamikami dubo re ki nizorõ ki niru pa ngbadimo bamburoko, Yekova ki nifura na Mose.

10Ho aboro dunduko anibi gu bakamikami dubo ni re naru pa ngbadimo bamburoko, aboro dunduko ki niru ku ari ki niirisi Yekova, aboro dunduko pa ngbadimo gayo bamburoko.

11Si du Yekova ki nifura na Mose, kina ku bangiriko, a wa boro naafura na badiani. Ho Mose anisa tiko ni ki nindu ku bataya yo berewe, gako bamangipai nga Yosua, ni paranga kumba, nangia wiri Nuna, ko anaguari nga bamburoko yo te.

12Mose ki ya fu Yekova, “Mo bi, mo naya fere, ‘Mo yé na agi aboro re’; ono ka mo atingida nga pa gu boro mo ka keda ni ani ndú na ni ya. Atikawari, mo aya, ‘Mi ini ro ti kina rimoro, mo ngba bangire a.’

13Were, si du tie mi nakpara foro, ka ngia mi ngba bangiro, mo yúgu gamo agene fere awere ya mi ini ro ki ngba bangiro a. Mo ki tingidi he ya gi rikaaboro re nga gamo aboro.”

14Yekova ki ya, “Ani andú na mo, mi ki fu ongoda foro.”

15Mose ki ya fu ko, “Ka mo andú nga na mi ya, ka mo gúari nga na ani erẽ ya.

16Bambiko waĩ ka aboro ini he ya mi ngba bangiro, ani na gamo aboro? Kina gu ka mo ndú na ani, ya ani du ni kparakpara rani ti agu aboro dunduko du auru kpotosende, ani na gamo aboro.”

17Yekova ki ya fu Mose, “Mi amánga kina gu pai re gumba mo ho; bambiko mo ngba bangire, mi ini ro ti rimoro.”

18Mose ki ya, “Mi nazungadi ro, mo yúgu ga taarimo fere.”

19Ko ki ya, “Mi amánga pai gi weneringise súsi barangba ro dunduko, mi ki taki pande rimore nga ‘Yekova’ bara bangiro; mi adú na weneringise fu gu ni mi ka kpi nyemu ka du na weneringise fu ni, ki yugu inapai fu gu ni mi ka kpi nyemu yugo inapai fu ni.”

20Ko ki ya, “Ono mo arengba nga na ka bi kpakpure te; bambiko a nga boro sa ka bi re, ki nye ni ungani wa sa te.”

21Yekova ki ya, “Mo ngére, ba du re pati re, mo arú ri mbia;

22ho gi taarimo ka susa ni, mi amáa ro ku rogo sarisari mbia, ki dadi ro ni bere daho mi ka susa ro ni;

23mi ki di bere, mo ki bi kina giire yo, ono mo abí nga kpakpure te.”

← Chapter 32 Jump to: Chapter 34 →