Ezekiel 12

Zande

← Chapter 11 Jump to: Chapter 13 →

1Sangba Yekova ki ye kono du mi ni kiya,

2“Wiri boro, monarakadagba ngbatunga asamungu, du na bangirise ka bi he, ono ka i abi nga he ya, du na tue ka gia pai, ono i agia nga pai te;

3bambiko i nga ngbatunga asamungu. Si du, wiri boro, mo mbákadi tindiro tipa ro wa ga zizi boro, ka ndu wa zizi boro uru ku bangiriyo; mo agá wa zizi boro rogo ga kporo ku rogo kura ringara ku bangiriyo. Isoke, i arúga tiyo na ni, wa vura du yo ni ngbatunga asamungu vurũ.

4Mo ayé na ga tindiro kina uru ku bangiriyo, ni tindiro wa ga zizi boro; mo ki kuru ni tiro nyemu ku bangiriyo, wa agu aboro namanga nandu ni zizi yo.

5Mo gé vuro bambu ku bangiriyo, ki kuru rogo ho ku zegi yo.

6Mo atúmba tindiro ku pagoro ku bangiriyo, ki ndu na ni ku zegi yo ku oiumo yo; mo adáda kpakpuro adada; ya ka mo abi nga sende ya; bambiko mi sa ro ni yuguyuguhe fu ngbatunga aYisaraere.”

7Mi ki mangi he wa ko arugu re na ni. Mi ki kusi gi tindiro uru, ni tindiro wa ga zizi boro, nyemu mi ki ge vuro bambu ni kina bere; mi ki kuru ku zegi yo bitimo yo, ninndi aunduge pagore ku bangiriyo.

8Sangba Yekova ki ye kono du mi ni wiso niya,

9“Wiri boro a nga ngbatunga aYisaraere nga ngbatunga asamungu aya foro te, ‘Gine mo amanga?’

10Mo yá fu yo, ‘Ya Gbia MBORI wẽ: Gi pa rungo re si tipa gu bazogo du Yerusarema yo na tipa ngbatunga aYisaraere dunduko nga agu yo du rogo ho.’

11Mo yá fu yo, ‘Mi nga yuguyuguhe fu roni: wa mangi mi he, kina wo si ka manga fu yo; i agá ni zizi yo sa zia.’

12Gu bazogo nikadu dagba yo yo ko atúmba gako tindiro ku pagorõko rogo bitimo, ki kuru; ko age vuro bambu ki kuru rogo ho ku zegi yo; ko adáda kpakpuko; ya ka ko bi nga sende ni bangiriko ya.

13Mi ki gbaragi gi pio ku auru ko, mi ki zi ko ti gi gbina; mi ki ye na ko ku Babera yo ringara aKasado yo, ono ko abí nga ha te; ko ki kpi yo.

14Mi ki gbandaka agu yo nadu pati ko dunduko ku rogo arago dunduko na gako amounda na gako arikavura dunduko; mi ki mo basape fuo yo.

15I ki ini he ya mi nga Yekova, ho mi ka keda yo ni ku dagba arikaboro yo ki gbandaka yo ku rogo aringara.

16Ono mi ambú kina zogoro yo i bati be basape, be ngbongi na be tata kaza, ya i kusi gayo kere gbegberẽ asino dunduko dagba arikaaboro yo i ka ndu ku ho ni, i ki ini he ya mi nga Yekova.”

17Sangba Yekova ki ye ku ri gere kono du mi ni niya,

18“Wiri boro, mo ri ga riahe na kiga, ki moin ime na kio na baka bangirise;

19ki gumba pai tipa aboro ringara, Ya Gbia MBORI wẽ tipa araki Yerusarema ringara aYisaraere yo: 1 ari gayo riahe na kina baka bangirise; ki mbiri ime na kiga, bambiko i aróga agu ahe dunduko ku sa yo du rogo gayo ringara, bambiko gu nyanyaki pa zuu nga ga agu yo dunduko naraka rogo ho.

20Agu abaakporo du na aboro rogo ho si adú wa ngbi ugure; ringara ki sa tihe ni vurubate; oni aina ha ya mi nga Yekova.”

21Sangba Yekova ki ye kono du mi ni niya,

22“Wiri boro, gini nga gi sanza re du ngbaroni tipa ringara aYisaraere, wa i aya, ‘Ramehe nagiza kindi, yuguyugupai dunduko nadiga gbua’?

23Mo gúmba ha fu yo tie, ‘Ya Gbia MBORI wẽ; Mi adígisa pa gi sanza re, ka i agúmba nga paha berewe wa sanza dagba aYisaraere yo ya.’ Ono mo yá fu yo, Ramehe nambeda, na pa digisa pa yuguyugupai dunduko.

24Bambiko yuguyugupai ni wia adú nga watadu soroka zomia he dagba ngbatunga aYisaraere yo berewe te.

25Ono mi nga Yekova agúmba gu pai mi ka gumba, si ki du ni mangimangi he. Si aima nga tipa bagbanga rago te, ono ti rago roni, Ako ngbatunga asamungu, mi agúmba pai ki mangi he, wo poi Gbia MBORI.”

26Sangba Yekova ki ye kono du mi ni berewe niya,

27“Wiri boro, mo ngére, i nga ngbatunga aYisaraere naya, ‘Gu yuguyugupai nga gu ko abi si tipa dungu rago ku mbata yo, ko nagumba pai wa nebi sa kina agu arame ambeda nga ya.’

28Si du mo yá fu yo, Ya Gbia MBORI wẽ: A nga gimi apai ho nikaima berewe tipa bagbanga rago te, ono agu apai nga gu mi agumba si adú ni mangimangi he, wo poi Gbia MBORI.”

← Chapter 11 Jump to: Chapter 13 →