Ezekiel 3

Zande

← Chapter 2 Jump to: Chapter 4 →

1Ko ki ya fere, “Wiri boro, mo ri gu he fu yo foro; mo ri gi kaĩkaĩ waraga re, ki ndu, ka gumba pai fu ngbatunga aYisaraere.”

2Si du mi aaka ngbare ti ni, ko ki fu kaĩkaĩ waraga fere mi ri he.

3Ko ki ya fere, “Wiri boro, mo ri gi kaĩkaĩ waraga re nga gu fu mi foro ki hisi vuro na ni.” Si du mi ki ri he; si ki du ngbare yo nzinziri wa nzeme anyege.

4Ko ki ya fere, “Wiri boro, mo ndú, da nga da ku ngbatunga aYisaraere yo, ki gumba gimi apai fu yo.

5Bambiko mi akeda nga ro koyo du kungba aboro ni du payo kia na kpakarakpakara fugoyo te, ono koyo du ngbatunga aYisaraere ni

6koyo du dungu kungba aboro ni du na payo kia na kpakarakpakara fugo te, nga agu yo ka mo aruga nga tiro na payo ya. Ni rengo, ka mi akeda ro koyo du ngbatunga aboro ni were, ka i dege tuyo foro.

7Ono ngbatunga aYisaraere adéga nga tuyo foro te; bambiko i akpi nga nyemu ka dega tuyo fere te; bambiko ngbatunga aYisaraere dunduko du na nyakari na nyanyaki ngbaduse a.

8Mo ngére, mi sa kpakpuro nyanyaki kuti kpakpuyo, ngbanda kpakpuro nyanyaki kuti ngbanda kpakpuyo.

9Mi mangi kpakpuro wa banyanyaki he susi mbia we; ka mo gúnde nga be yo ya, ka mo ayúngura nga be ngera yo a ya, bambiko i nga ngbatunga asamungu.”

10Ku ri gere ko ki ya fere, “Wiri boro, gu gimi apai dunduko nga gu mi akagumba foro mo di he ku kpotoro yo, ki gi he ni turo.

11Mo ndú, da nga da koyo du gu zizi yo ni i aga na yo, koyo du ngbatungaro ni, ki ya fu yo, ‘Ya Gbia MBORI wẽ’; watadu i agia ha na watadu i aka pa gia ha.”

12Si du Toro ki tumba re ku ari, ho gu taarimo nga ga Yekova aguari ba ha ni, mi agi worohe giire yo nga ga bakere bazigizo ti kpotosende;

13si angia woro apupo unga anya wa ami azi pupora na akuara, na woro angbagida pati ra, nga gu nawo wa bakere bazigizo ti kpotosende.

14Toro ki tumba re ku ari ki di re ku sa yo, mi ki nindu na kere pai rogo zinga torore yo, be Yekova ki du ti re nyanyaki;

15mi ki da Terabiba yo koyo du gu zizi yo ni i aga na yo nanaraka pavuru gu di nga Kebara. Mi ki sungu yo dagba yo na kiga rame ki du saba.

16Ti digida rame saba, sangba Yekova aye fere ki ya:

17“Wiri boro, mi moi ro ni babandarago tipa ngbatunga aYisaraere; ho mo ka nigi pai ni ngbare, mo ki nifugu he fu yo a.

18Ka mi ya fu gu gbegberẽ ni, ‘Mo akpí akpi ni rengo,’ ono ka mo afúga nga ha fu ni ya, ka mo agúmba nga pai ka fuga ha fu gbegberẽ boro tipa gani gbegberẽpai a ya, ka batasa ungani, gu gbegberẽ boro re anikpi kina rogo gani irairapai; ono mi aira bape kureni ku ri ro.

19Ono ka mo fugu he fu gbegberẽ boro, ka ni asá nga tini ti gani gbegberẽpai ya, watadu ti gani gbegberẽ sino ya, ni anikpi kina rogo gani irairapai; ono mo ki batasi tiro.

20Berewe, ka ruru boro sa tini ti gani rurupai ki mangi irairapai, mi ki moi mbia kota bara bangirini, ni anikpi akpi; bambiko wa mo afuga nga ha fu ni ya, ni anikpi tipa kina gani ingapai, gu gani ruru mangaapai ni amangi ka i atingida nga paha ya; ono mi aira bape kureni ku ri ro.

21Ono ka mo fugu he fu ruru boro ya ka ni mangi nga ingapai ya, ka ni amánga nga ingapai ya, ni aninye anye ni ungani, bambiko ni aidi pa fugapai; mo ki batasi tiro.”

22Be Yekova adu yo ku ri re; ko ki ya fere, “Mo gúari, mo kúru ku kpasakpasa rago yo, yo mi ka fura ni na mo.”

23Si du mi ki kuru ki ndu ku kpasakpasa rago yo; mo ngére, ga Yekova taarimo aru yo, wa gu taarimo nga gu mi abi he pavuru di nga Kebara; mi ki ti ni kpakpure ku sande.

24Ono Toro ki rimi ku kpotore yo, ki rugu re ku ngba ndure; ko ki gumba pai fere ki ya, “Mo ndú, ki kisi tiro ku dimo kpuro yo.

25Mo, Ako wiri boro, mo ngére, i abá agire ku auru ro, i ki vo ro na ni, si du ka mo aréngba nga ka ndu ku zegi yo ku dagba aboro yo ya;

26mi ki mangi mirãro si dika tihe kuti biringa ngbaro, si du mo ki du ni bubo ka mo aréngba nga ka za yo ti pai ya; bambiko i nga ngbatunga asamungu.

27Ono ho mi ka fura ni na mo, mi azá ngbaro ki ya fu yo, ‘Ya Gbia MBORI wẽ’; gu ni nikagia ha, ni gí he; gu ni nikaka pa gia ha, ni ká pa gia ha; bambiko i nga ngbatunga asamungu.

← Chapter 2 Jump to: Chapter 4 →