Ezekiel 14

Zande

← Chapter 13 Jump to: Chapter 15 →

1Agu abaakumba nga ga aYisaraere yo ki ye kono du mi ni, ki sungu ku bara bangire.

2Sangba Yekova ki ye kono du mi ni niya,

3“Wiri boro, agi aboro re di kina pa gayo kpiaahe ku kpotoyo yo, ki moi mbia kota nga ga gayo irairapai bara bangiriyo; si rengbe mi idi he fu yo i sana re tipa pai?

4Si du mo gúmba pai fu yo, ki ya fu yo, Ya Gbia MBORI wẽ: Gu boro dagba ngbatunga aYisaraere yo nadia kina pa gani kpiaahe ku kpotoni yo ki moi mbia kota nga ga gani irairapai bara bangirini, ki niye koyo du nebi ni, mi nga Yekova nikakaraga pai fu ni ni tire bambiko gani rimbasa kpiaahe,

5ya mi zi kpoto ngba tunga aYisaraere yo nga agu yo sa tiyo ku sa yo dunduko ti re mbiko gayo kpiaahe.

6“Si du mo gúmba ha fu ngbatunga aYisaraere, Ya Gbia MBORI wẽ: Oni sá gaoni berã ki sa tironi ti gaoni kpiaahe; ki sa kpakpuroni dunduko ti gaoni kere gbegberẽ asino.

7Bambiko gu ni dagba ngbatunga aYisaraere yo, watadu dagba kungba aboro yo asungu Yisaraere yo, nga gu ni nakpara tini ti re, ki di kina pa gani kpiaahe ku kpotoni yo ki moi mbia kota nga ga gani irairapai bara bangirini, ki ye koyo du nebi ni ka sasana re tipa tini, mi nga Yekova nikakaraga pai fu ni ni tire;

8mi azínga kuti gu boro re, mi asá ni ni yuguyuguhe ni sanza, ki di ni adia ku sa yo dagba gimi aboro yo; oni ki ini he ya mi nga Yekova.

9Ka i nangi nebi ni ki gumba pai, mi, nga Yekova, nangi gu nebi re, mi atáá bere kuti ni, ki gbarasi ni dagba gimi aboro nga aYisaraere.

10I ki kpidi pa gayo mbusa gu mbusa nga ga nebi na gu mbusa nga ga gu ni ninasasana ni si adu kina sa

11ya ka ngbatunga aYisaraere ndu nga berewe ni ingiingi yo ti re ya, ka i abinkosi nga tiyo berewe na gayo samungu dunduko ya, ono i ki du nga gimi aboro mi ki du ni gayo Mbori, wo poi Gbia MBORI.”

12Sangba Yekova ki ye kono du mi ni niya:

13“Wiri boro, ho ringara namanga ingapai ni kuti re ni manga pai ni tiandika, mi ki taĩ bere kuti ni, ki kua gaha ariahe ti he ki Kedi ngbongi ku ri he, ki rogo aboro na anya ku sa yo,

14zavura agi akumba biata re adu rogo ho, nga Noa, Daniere, na Eyobo, i arengba ka batasa kina ungayo tigayo ni gayo ruruapai, wo poi Gbia MBORI.

15Ka mi sa kere anya ami kuru ku rogo ringara, ami ki gbarasi he, si ki sa tihe ni vurubate, si du ka boro asusa nga rogo ho be kere anya ya;

16zavura agi akumba biata re avura du kina rogo ho vuru, wa du mi ni ungare, wo poi Gbia MBORI, i abátasa nga awiri aboro nga akumbagude na adegude a te; kina yo nikabata, ono ringara adú ni vurubate.

17Watadu ka mi ye na basape ku ri gu ringara re, ki ya, Basape mo ndú nga rogo ringara; mi ki rogo aboro na anya ku sa yo rogo ho;

18ka agi akumba biata re vura du rogo ho vurũ, wa du mi ni ungare, wo poi Gbia MBORI, i abátasa nga awiri aboro nga akumbagude na adegude a te, ono kina yo nikabata.

19Watadu ka mi kedi tata kaza ku rogo gu ringara re, ki uka gi ngariangaria zinga ku ri he na kure, ka roga aboro na anya ku sa yo;

20ka si vura du nga Noa, Daniere, na Eyobo adu rogo ho, wa du mi ni ungare wo poi Gbia MBORI, i abátasa nga awiri aboro nga akumbagude na adegude te; ono i abátasa kina ungayo ni gayo ruruapai.

21“Bambiko ya Gbia MBORI wẽ: Si nikasusa ni pai te? ho mi ka keda gi kere mangaapai biama nga ga sarangbanga ku ri Yerusarema ni, nga basape, ngbongi, kere anya, na tata kaza, ka roga aboro na anya rogo ho ku sa yo!

22Ono ka i ambú yangara yo rogo ho ni ungayo i angbé ku mbata yo fu awiriyo nga akumbagude na adegude, ho i ka kura ni koyo du oni ni, oni ki bi gayo apai na gayo mangapai, oni adú ni ngarãsingarãsi roni tipa gu gbegberẽpai nga gu ye mi na ni ku ri Yerusarema, bambiko agu apai ye mi na ni ku ri he dunduko.

23I nikangarãsi roni, ho oni ka bi gayo apai ni na gayo mangaapai; oni ki ini he ya mi amanga nga pai zanga nduhe nga agu apai dunduko mangi mi rogo ho yo te, wo poi Gbia MBORI.”

← Chapter 13 Jump to: Chapter 15 →