Ezekiel 20 — Zande

1Ti saba garã, ti bisue diwi, ti rameru bawe, agu abaakumba nga ga aYisaraere yo aye ka sasana Yekova tipa pai, ki sungu ku bara bangire.

2Sangba Yekova ki ye kono du mi ni, niya:

3“Wiri boro, mo gúmba pai fu ga aYisaraere abaakumba ki ya fu yo, Ya Gbia MBORI wẽ, Oni ye ka sasana re tipa pai? Wa du mi ni ungare, mi aída nga ha fu roni oni sasana re tipa pai te, wo poi Gbia MBORI.

4Mo asára ngbanga yo? wiri boro, mo asára ngbanga yo? Mo rúgu yo i ini gu kere gbegberẽ asino nga ga abayo,

5mo ki ya fu yo, Ya Gbia MBORI wẽ: Ti gu uru nga gu mi asia Yisaraere ni, mi azunga he fu ngbatunga Yakoba, niyugu tire fu yo i ini re rogo ringara Ezipeta, mi azunga ne fu yo, niya, Mi nga Yekova nga gaoni Mbori.

6Ti gu uru re mi azunga he fu yo, ya mi aye na yo ringara Ezipeta yo ku rogo gu ringara nga gu mi agbata fu yo, gu ringara du adu na mamuanya na nzeme anyege kpaima, du ni taasitaasi ringara dagba aringara dunduko.

7Mi ki ya fu yo, Oni báfu gu kere gbegberẽ ahe ku sa yo nangba bangironi, oni ni ba sa sa, ka oni birikosi nga tironi na gu kpiaahe nga ga Ezipeta ya, mi nga Yekova nga gaoni Mbori.

8Ono i asa mungu kuti re ka i akpi nga nyemu ka dega tuyo fere ya; i ni ba sa sa abafa nga gayo kere gbegberẽ ahe ku sa yo nangba bangiriyo te, i ambu nga pa gu kpiaahe nga ga Ezipeta a te. “Si du mi aberẽ pa uka gi ngariangaria zinga ti ni ku ri yo ki mangi pa gi zinga kuti yo rogo ringara Ezipeta.

9Ono mi mangi pai mbiko rimore, ya ka si du nga ni gbarasigbarasi he ku bangiri arikaaboro nga agu yo i araka dagba yo yo ya, nga agu yo mi ayugu tire fu yo ni kusa yo ringara Ezipeta yo.

10Si du mi ki ngbe ku mbata yo fu yo ka kusa yo ringara Ezipeta yo ku ngbakungba yo.

11Mi afu gimi rugaapai fu yo ki yugu gimi asarangbanga fu yo, nga gu ka boro ka kuti ni ni nye anye ni ungani.

12Ku ri gere mi afu gimi arago sabiti fu yo, wa yuguyuguhe dagba re na yo, i ini he mi nga Yekova kpara yo ziazia.

13Ono ngbatunga aYisaraere asa mungu kuti re ngbakungba yo; i apeka nga sangba gimi rugaapai te, ono i ki gindiga gimi asarangbanga, nga gu ka boro ka kuti ni ni nye anye ni ungani; i ki nibirikosi gimi arago sabiti gbe. “Si du mi aberẽ pa uka gi ngariangaria zinga ku ri yo ngbakungba yo, ka nyasa yo du.

14Ono mi amangi pai mbiko rimore, ya ka si du nga ni gbarasigbarasi he ku bangiri arikaaboro ya, nga agu yo mi akusi yo ku bangiriyo.

15Ku ri gere mi azunga he fu yo ngbakungba yo ya mi aye nga na yo ku rogo gu ringara nga gu mi afu fu yo te, gu ringara du adu na mamuanya na nzeme anyege kpaima, du ni taasitaasi ringara dagba aringara dunduko,

16bambiko i agindiga gimi asarangbanga, ka i apeka nga sangba gimi rugaapai ya, i ki birikosi gimi arago sabiti; bambiko kpotoyo yo andu fuo kina gayo kpiaahe.

17Ono mi aína nga pai fu yo te, ka mi agbarasa nga yo watadu nyasa yo ngbakungba yo du ya.

18“Mi ki ya fu awiriyo ngbakungba yo, Ka oni peke nga sangba ga abaroni rugaapai ya, ka oni ká nga kuti gayo asarangbanga ya, ka oni birikosi nga tironi na gayo kpiaahe a ya.

19Mi nga Yekova nga gaoni Mbori; oni péke sangba gimi rugaapai, ki ka kuti gimi asarangbanga,

20ki nikpara gimi arago sabiti ziazia, ya si du ni yuguyuguhe dagba re na oni, ya oni ini he ya mi nga Yekova gaoni Mbori.

21Ono awiriyo asa mungu kuti re; i apeka nga sangba gimi rugaapai te, ka i aka nga kuti gimi asarangbanga ya, nga gu ka boro ka kuti ni ni nye anye ni ungani; i abirikosi gimi arago sabiti. “Si du mi abere pa uka gi ngariangaria zinga ku ri yo ki mangi gi zinga ku ri yo ngbakungba yo.

22Ono mi ambu paha, ki mangi pai mbiko rimore, ya ka si du nga ni gbarasigbarasi he ku bangiri arikaaboro ya, nga agu yo mi akusi yo ku bangiriyo.

23Ku ri gere mi azunga he fu yo ngbakungba yo ya mi agbándaka yo ku dagba arikaaboro yo ki gbandaka yo ku rogo aringara,

24bambiko i amanga nga pa gimi rugaapai te, ono i ki gindiga gimi asarangbanga ki birikosi gimi arago sabiti, i amoi bangiriyo ti kina ga abayo kpiaahe.

25Ku ri gere mi afu rugaapai fu yo nga gu adu nga ni wene he ya, na asarangbanga nga gu ka i adu nga na unga mbiko ho ya;

26mi ki birikosi yo be kina gayo gamaahe rogo manga yo i tumo ni bambata awiriyo dunduko ku we yo, ya mi gbarasi yo, i ini he ya mi nga Yekova.

27“Si du, wiri boro, mo gúmba pai fu ngbatunga aYisaraere ki ya fu yo, Ya Gbia MBORI wẽ: Rogo gi pai re abaroni agberẽ ngbayo yo berewe fere, ni manga pai ni biriki na mi.

28Bambiko ho mi aye ni na yo ku rogo gu ringara nga gu mi azunga he ka fu he fu yo, si du ho i anibi gu batumbatumba rago ni watadu gu nanaga ri ngua, yo i anatumo ni ni gayo amotumo ki nimoi gu zingisapai nga ga gayo gamunihe mbedisatise; yo i azo gayo wene fuõngua ni, yo i auka gayo mbirimbiri amotumo ku ho ni a.

29Mi aya fu yo, Gine nga gu tumbatumba ba oni nandu ku ho ni? Si du i ay ambu rimoho nga Bama daku awere.

30Si du mo yá fu ngbatunga aYisaraere, ya Gbia MBORI wẽ: Oni nabirikosi tironi ni agu asino nga ga abaroni ka ingisa tironi nimangi pai ni sino pa kere gbegberẽ asino?

31Ho oni nafu gaoni agamahe ni nitumo ni awironi nibafa yo ku we yo, oni nabirikosi tironi na gi gaoni kpiaahe dunduko re daku areme. Ako ngbatunga aYisaraere, oni asásana re tipa pai? Wa du mi ni ungare, wo poi Gbia MBORI, mi aída nga ha fu roni oni sasana re tipa pai te.

32“Gu pai dũ rogo gaoni berã si amánga nga wa sa te ― gu berã nga, ‘Ani dú wa arikaaboro, wa agu angbatunga nga ga aringara yo, ki niirisi ngua na mbia.’

33“Wa du mi ni ungare, wo poi Gbia MBORI, Mi adú ni bakindo ku ri roni ni rengo, na nyanyaki bere na ni taĩtaĩ bere, na ngariangaria zinga naauka ku ri roni.

34Mi akúsa roni dagba aboro ki dungura 11 mi rogo agu aringara yo oni agbandaka ku ho ni, na nyanyaki bere na ni taĩaĩ bere, na iipanangaria zinga naauka ku ri roni;

35mi k i ye na oni ku rogo gu ngbakungba nga ga aboro, yo mi ka sara ngbanga roni ni nibi bangirani dagba rani.

36Wa mi asari ngbanga abaroni ngbakungba yo ringara Ezipeta yo, wo a mi ka asara ngbanga roni, wo poi Gbia MBORI.

37Mi amánga roni oni susi tii ngbondo, mi ki idi he oni ndu ni gedigedi roni.

38Mi akpára asamungu dagba roni, na agu yo gu auru gi ndika; mi ayé na yo rogo gu ringara yo i asungu ni, ono i aríma nga ku rogo ga aYisaraere ringara yo te. Si du oni ki ini he ti ni ya mi nga Yekova.

39“Ako ngbatunga aYisaraere, tipa roni, ya Gbia MBORI wẽ: Ka oni aida nga ka dega turoni fere ya, oni ndú dunduko ka manga pa gaoni kpiaahe, awere na ku mbata yo a; ono ziazia rimore oni agbárasa nga ha berewe na gaoni agamahe na gaoni kpiaahe te.

40“Bambiko ri gi kparakpara bagangara yo, gu bagbanga bagangara nga ga aYisaraere, wo poi Gbia MBORI, yo ngbatunga aYisaraere dunduko, i dunduko, ka amanga pa re rogo ringara ni; yo mi ka ida pa yo ni, mi ki sasana he yo a tipa gaoni aruhe na gaoni siasia agamahe na gaoni kparakpara amotumo dunduko.

41Mi aída pa roni wa wene fuõhe, ho mi ka kusa roni ni dagba aboro, ki dungura roni rogo agu aringara yo oni agbandaka ku ho ni; mi ki yugu gi pa du ni kparakpara re ziazia rogo roni yo ku bangiri arikaaboro.

42Oni ki ini he ya mi nga Yekova, ho mi ka ye ni na oni ku rogo ringara aYisaraere, gu ringara mi azunga he ka fu he fu abaroni.

43Oni atingida pa gaoni apai yo, na gaoni mangaapai dunduko nga gu birikosi oni tironi na ni; oni ki sogo tironi tipa gu gbigbitaapai nga gu oni amangi he.

44Oni ki ini he ya mi nga Yekova, Ako ngbatunga aYisaraere, ho mi ka manga pai ni fu roni ku sangba rimore yo, kuti gaoni gbigbitaapai te, na kuti gaoni wasiwasi mangaapai a te, wo poi Gbia MBORI.”

45Sangba Yekova ki ye kono du mi ni niya:

46“Wiri boro, mo sá kpakpuro ku sudiyo ki tungusi pai ku sudiyo, ki gumba pai wa nebi kuti ringara bire Negebe yo;

47mo yá fu bire Negebe yo, Mo gí sangba Yekova: ya Gbia MBORI wẽ, Mo ngere, mi agínda we rogo ro yo, si ki riti iwo angua du rogo ro yo na ugu angua dunduko; gu kĩkĩ mirãwe re abísa nga te, agu apavuruhe dunduko nangera sudiyo da ku nodiyo agbí be he.

48Aboro dunduko nikabi he ya mi nga Yekova ginda ha; si abísa nga te.”

49Si du mi ki ya, “Ako Gbia MBORI! i nagumba ha tipa re, ‘A nga ko nga bagumba asanza te?’”