Ezekiel 32

Zande

← Chapter 31 Jump to: Chapter 33 →

1Ti 12 garã, ti 12 diwi, ti bambata rameru, sangba Yekova aye kono du mi ni niya:

2“Wiri boro, mo tóna biakpe ku ri Faro bakindo aEzipeto, ki ya fu ko: “Mo naberã pa tiro wa bahu dagba arikaaboro, ono mo wa kina daragona rogo abaime yo; mo gba ku rogo gamo adi; mo wo ti aime ni kpenduro, ki metasi gayo adi.

3Ya Gbia MBORI wẽ: Mi abá gi pio ku ri ro wa sa na rimbasa agu aboro; mi ki gbe ro ku ari rogo gi pio.

4Mi abá ro ku sande mi ki ba ro vuyu ku rogo haúrago, mi arúga azire ari dunduko ami sungu auru ro, mi ki mbisi anya kpotosende dunduko na pasioro.

5Mi ki gbaragi pasioro ku ri abaagangara yo, ki hisi angboongboorago na gamo akangba.

6Mi azírĩsa ringara na kurero nafu ki da ti kina abaagangara; gene aime ki hiki be he.

7Ho mi ka digisa ga pai ni, mi adáda angbangbaturũ, ki bisi gaha akerekuru; mi adáda uru ni dubo, ka diwi ahása nga rago ya.

8Gu imaima aimarago dunduko nga ga ngbangbaturũ, mi asá ha ni bitimo ku ri ro, ki fu bitimo ku ri ga ringara, wo poi Gbia MBORI.

9“Mi arungosi kpoto dungu aboro yo, ho mi ka ndu na mo ni ni zizi ro ku dagba arikaaboro, ku rogo agu aringara nga gu mo aina nga ha ya.

10Mi akígisa dungu aboro mbiko ro, gayo abakindo ki nikio akio be ro ni kere kio, ho mi ka vugumo gi basape ni ku bangiriyo; i akio pitipiti, aboro ni ba sa sa tipa kina ungayo, ti uru ga tigo.

11Bambiko ya Gbia MBORI wẽ: Gu basape nga ga bakindo aBabero ayé sa ro.

12Mi amánga ga rimbasa aboro i kpiki be ga airanyaka abaasape nga agu yo dunduko du ni airakigisa aboro dagba arikaaboro susi. “I asá gu enda nga ga Ezipeta ni kungba he, gaha rimbasa aboro dunduko akpíka.

13Mi agbárasa gaha anya dunduko ti pavuru dungu aime; ka ndu boro amétasi nga ha berewe ya, ka sukutu anya amétasi nga ha berewe a ya.

14Si du mi asá gayo aime ni dudu ngura ha, na gayo adi si nifu wa nzeme, wo poi Gbia MBORI.

15Ho mi ka sa ringara Ezipeta ni ni vurubate, na ho ringara ka du ni zanga agu ahe dunduko nadu rogo ho, ho mi ka manga agu yo ni dunduko naraka rogo ho, si du i aina ha ya mi nga Yekova.

16Gere nga biakpe nga gu i ka bi he yee; awiri arikaaboro nga ade abí bia yee; tipa pa Ezipeta, na tipa pa gaha rimbasa aboro dunduko, i ka bi bia yee, wo poi Gbia MBORI.”

17Ti 12 garã, ti bambata diwi, ti rameru 15, sangba Yekova aye kono du mi ni niya:

18“Wiri boro, mo kpári ni wawa ku ri ga Ezipeta rimbasa aboro, ki kedi yo i zorõ kina ku rogo gu rago du ku tii sende yo, i na agu awiri arikaaboro nga ade rimoyo awo awo, fuo agu yo zorõ ku Due yo:

19‘Da mo nasusa ni ni wene ngbanyaro? Mo zórõ nga, i ki pigi ro na azangayeratise.’

20I akpíka dagba agu yo yo i aimi yo ni basape, gaha rimbasa aboro dunduko ka tiwa wa sa na ni.

21Agbia airanyaka agúmba pa yo Baatoro kpikpi aboro yo, na pa gayo amounda, ki ya, ‘I zorõ kono, i piki zaa, nga azangayeratise, imi yo yo ni basape.’

22“Asura du yo, na gaha rimbasa agu aboro, amurãyo du pati he kirikiri, i du nduko imi yo yo, kpiki be basape;

23nga agu yo moi yo murãyo kina boro ku durugaduruga Due yo, gaha rimbasa agu aboro ki du kirikiri pati gaha murã; i dunduko imi yo yo, kpiki be basape, nga agu yo nagbandaka pa gbudagbuda rogo ringara unga aboro.

24“Erama du yo, na gaha rimbasa aboro pati gaha murã kirikiri; i dunduko imi yo yo, kpiki be basape, nga agu yo naazorõ ni azangayeratise ku rogo gu rago du ku tii sende yo, nga agu yo gbandaka pa gbudagbuda rogo ringara unga aboro, i ki kpidi pa gayo zee na agu yo zorõ ku Due yo.

251 ambakadi barame tipa ha dagba imiimi yo yo, na gaha rimbasa aboro dunduko, murãyo ki du kirikiri pati he, i dunduko nga azangayeratise, i aimi yo ni basape; bambiko pa gayo gbudagbuda agbandaka rogo ringara unga aboro, i ki kpidi pa gayo zee na agu yo zorõ ku Due yo; i moi yo dagba imiimi aboro.

26“Meseka du yo na Tubara, na gayo rimbasa aboro dunduko, murãyo ki du kirikiri pati he, i dunduko nga azangayeratise, imi yo yo ni basape; bambiko i gbandaka pa gbudagbuda rogo ringara unga aboro.

27Ka i apika nga na airanyaka nga kuru yo imi yo yo nazorõ ku Baatoro kpikpi aboro yo na gayo ausovura ya, nga agu yo gayo basape adu ni pigipigi he kina ba riyo, du gayo avurakube kina ri amemeyo; bambiko gu gbudagbuda nga ga airanyaka adu rogo ringara unga aboro.

28Si du mo adú ni kuadikuadi ro ki pi dagba azangayeratise, nga agu yo i aimi yo ni basape.

29“Edome du yo, na gaha abakindo na gaha abazogo, nga agu yo i apigi yo na agu yo i áimi yo ni basape, tipa gayo ngarã dunduko; i apiki na azangayeratise, na agu yo zorõ ku Due yo.

30“Abazogo rago ku nodiyo du yo, i dunduko, na aboro Sidona dunduko, nazorõ na zee na gu imiimi yo, bambiko gu gbudagbuda dunduko i atina be gayo ngarã; i piki zanga yeratise na agu yo imi yo yo ni basape, i kpidi pa gayo zee na agu yo zorõ ku Due yo.

31“Ho Faro ka abi yo ni, ko angárãsi t iko bambiko gako rimbasa aboro dunduko, Faro na gako rimbasa aborovura dunduko, imi yo yo ni basape, wo poi Gbia MBORI.

32Bambiko ko agbandaka pa gbudagbuda rogo ringara unga aboro; si du i apíga ko dagba azangayeratise, na agu yo imi yo yo ni basape. Faro na gako rimbasa aboro dunduko, wo poi Gbia MBORI.”

← Chapter 31 Jump to: Chapter 33 →