Ezekiel 13

Zande

← Chapter 12 Jump to: Chapter 14 →

1Sangba Yekova ki ye kono du mi ni ki ya,

2“Wiri boro, mo gúmba pai kuti anebi nga ga aYisaraere yo, mo gúmba pai ki ya fu agu yo nagumba pai wa nebi sangba gayo berã yo: ‘Oni gí gu pai nga ga Yekova!’

3Ya Gbia MBORI wẽ, Na gberẽ he fu gu mumungo anebi napeka kina gayo toro, ka i abi nga he ya!

4Ako aYisaraere, gaoni anebi nidu wa kina ahúa rogo kungba arago.

5Oni ata mbakada nga sapusapu rago te, watadu dua ngapa bakporo tipa ngbatunga aYisaraere a te, ya si ru rago vura ti gu rago nga ga Yekova.

6I agumba pai ni wia ka soroka ni zire; ya yo, ‘Yekova naya,’ ho Yekova akeda nga yo ni ya, ono i ki berẽ he ya ko adígisa gayo pai.

7Oni abi nga yuguyuguhe nga úwia te? ki gumba zire soroka, ho oni niya ni, ‘Wo poi Yekova,’ ka mi avura nga gumba ha vurũ ya.”

8Si du ya Gbia MBORI wẽ: “Bambiko oni gumba pai ni wia ki gi pa azire, si du oni ngére, mi gbarasi rimoroni, wo poi Gbia MBORI.

9Bere adú kuti agu anebi nabi yuguyuguhe nga ga úwia, nga agu yo nape pa zire asoroka; i adú nga rogo gbuu gimi aboro te, rimoyo adú nga ni Keke he rogo kitabu ke ngbatunga aYisaraere yo a te, i aríma nga ku rogo gu ringara nga ga aYisaraere yo a te; oni ki ini he ya mi nga Gbia MBORI.

10Tiparimowe i tigayo ingisi gimi aboro, niya, ‘Zereda,’ ho adu nga zereda ni ya; tiparimowe ho dua aboro ngapa bakporo ni, agi anebi re nambeda ha na iwo kuamba;

11mo yá fu agu yo nambeda ha na iwo kuamba ya si ati ati! Ngirimo mai adú, bakere bakamikami yuge ki ya a;

12ho ngapa bakporo ka ti ni, i aya nga fu roni te, ‘Wari du gu mbedimbedi he ni oni ambeda ha?’

13Si du ya Gbia MBORI wẽ: Mi amánga bakamikami yuge si kuru ni gi ngauangaria zinga: baguu mai ki du mbiko gi ngariangaria zinga, na bakere morogumba rogo zinga ka gbarasa ha.

14Mi ki kuadi ngapa bakporo ku sande nga gu oni ambedi he na iwo kuamba, ki gbandaka ha ku sande, si du mburuhe ki du ni ku he; ho si ka ti ni, oni akpíka akpika dagba ha yo; oni ki ini he ya mi nga Yekova.

15Were mi ka manga na gi ngariangaria zinga ku ri ngapa bakporo, na ku ri agu yo nambedi he na iwo kuamba; mi ki ya foro, Ngapa bakporo ho berewe te, na agu yo nambedi he a te,

16nga agu anebi nga ga aYisaraere yo nagumba pai tipa Yerusarema ki bi yuguyugupai nga ga zereda tipa ha, ho adu nga zereda ni ya, wo poi Gbia MBORI.

17“Na mo, wiri boro, mo sá kpakpuro sa awiri gamo aboro nga ade, nagumba pai wa nebi kina sangba gayo aberã yo; mo gúmba pai wa nebi kuti yo,

18ki ya, Ya Gbia MBORI wẽ: Na gbere he fu agu ade naru agiri ngua radatise kuti angukube dunduko, ki mangi roko dadari tipa ri bagbangagbanga aboro, rogo pa gbata mbisimo aboro! Oni agbáta mbisimo gimi aboro, ki mbu kura mbisimo ni ungayo ni gaoni mokiisa?

19Oni gbarasi rimore ku dagba gimi aboro tipa bete he wa mapunga i nandukuda ha ni be na tipa mbusuru kpokuta, ki niimi agu aboro ka akpi nga ya ki nibatasi agu aboro ni ungayo ka nye nga ni ungayo ya, ni gaoni zire fu gimi aboro, nadega tuyo sa azire.

20“Si du ya Gbia MBORI wẽ: Oni ngére, mi zingi kuti gaoni agiri ngua radatise oni nagbata mbisimo na ni, mi akafa ha be roni; mi ki mbu mbisimo agu yo oni agbata yo i gu zezeredi wa azire.

21Gaoni roko dadari a, mi asípa ha ku sa yo, ki batasi gimi aboro be roni, ka i adu nga berewe be roni wa úmozi ya; oni ki ini he ya mi nga Yekova.

22Bambiko oni arungosi kpoto ruru boro yo ni azire, wa mi avura nga rungosi kpotoni yo ya, oni anyakasi be gbegberẽ boro, ya ka ni sa nga tini ti gani gbegberẽpai ka batasa ungani ya;

23si du oni abi nga yuguyuguahe nga auwia berewe te ki mangi soroka a te; mi akúsa gimi aboro be roni. Si du oni ki ini he ya mi nga Yekova.”

← Chapter 12 Jump to: Chapter 14 →