Ezekiel 17

Zande

← Chapter 16 Jump to: Chapter 18 →

1Sangba Yekova ki ye Kono du mi ni ki ya:

2“Wiri boro, mo gúmba masaku, ki gumba sanza fu ngbatunga aYisaraere;

3mo yá, Ya Gbia MBORI wẽ: Bakere dingimo aye ku Rebanona yo ki dewe ri ngua kedara. U adu na bapuporu na gbanga tikotiko ngba puporu yo, asueru ki du ni dungu he na dungu azehe ti ni.

4U akua gu fogo be kedara ti rihe ki ndu na ni ku rogo ringara baga ahe, ki moi he rogo bakporo nga ga ababagiahe.

5Si du u ki di tunga dagba gu nga ga gu ringara re ki rú he rogo mbudu sende; u aru he pangba kpaima aime. U aru he wa katakpa ngua sarizi,

6si ki tere ki sono ni bakakue ki wa gbe ku sande, abehe asa tihe koyo du u ni, atarãha ki nye kina rogo gu baha. Si du si ki sa tihe ni bakakue, ki kusi abehe na akpehe a.

7“Ono kura bakere dingimo adu yo, na bapuporu, asueru ki du ni dungu he; mo ngére, tarã gi bakakue re arimi kina bara koyo du u ni, ki nibafu abehe kina koyo du u ni, ya u nitudi he. Rogo gu baha ho u aru he ni

8u ki muku he ki gbisi he sa wene mbudu sende pati kpaima aime, ya si kusi abehe, ki zu zuzuhe, ki du ni bawene bakakue.

9Mo yá, Ya Gbia MBORI wẽ: Si aida? Ati u adéwa tarãha ki yepe abehe ku sa yo, si du terehe ki ugu ti ni dunduko te? Si aréngba nga na nyanyaki be boro watadu dungu aboro ka mo ho na tarãha te?

10Mo ngére, yo gbisi yo ho ku ho m, si aida yo? Ati si aúga auga dunduko ho yuge ku uroyo ka yada ha ni te, ki ugu auga rogo gu baha i aru he rogo?”

11Si du sangba Yekova ki ye kono du mi ni ki ya:

12“Mo gúmba ha awere fu ngbatunga asamungu, Oni aina nga gu pai agi apai agumba ha te re? Mo gúmba ha fu yo, Oni ngére, bakindo aBabero aye ku Yerusarema yo, ki rogo gaha bakindo na gaha abazogo ki ndu na yo ku Babera yo.

13Ko ki di gu ko dagba ngbatunga abakindo yo ki mangi mokido na ko, ya ko zunga he. Ko arogo airaome ku sa yo nga ga ringara yo,

14ya ngbi umbasi tihe ka si atumba nga tihe ku ari ya, ya si ru be ka kuti gako mokido.

15Ono gi vovo bakindo re asa mungu kuti ko ni keda abamokedi ku Ezipeta yo, ya i fu afarasi fu ko na bakere rimbasa aboro sovura. Ko adia be pai? Gu ko namanga ngbatunga agu apai re, ko rengbe ka merã be he? Ko rengbe ka basa pa mokido ki merẽ?

16Wa du mi ni ungare, wo doí Gbia MBORI, ni rengo rogo gu rago yo bakindo naraka ni, nga gu ko nasa ko ni bakindo, yo ko ka kpi ni, nga gu ko ko apayasi pa gako zungahe, du gako mokido na ko basa ni pa ha, nga kina Babera yo.

17Faro aúnda nga ko na gako nyanyaki rimbasa aborosovura na bakere rimbasa agu aboro rago sovura te, ho i ka abaka akanda ni ki zi agu angapa bakporo i adua ha tipa roga unga aboro ku sa yo ni dungu yo.

18Bambiko ko apayasi pa zungahe ki basa pa mokido, bambiko wa ko afu tiko ku tii be bakindo ko ki nimangi agi apai dunduko re. Ko amérã nga te.

19Si du ya Gbia M BORI wẽ: Wa du mi ni ungare, gu gi zungahe nga gu ko apayasi pa ha, na ei mokido ko abasa pa ha, mi amáa ngbanga ha kina ku ri ko ni rengo.

20Mi agbaraga gi pio ku ri ko, mi azía ko ti gi gbina, mi ki ye na ko ku Babera yo ki tona sara ngbanga ko yo tipa gu biriki ko amangi he kuti re.

21Gako siasia yo nga ga gako arimbasavura akpi be basape, gu unga yo nikanye i agbándaka ku rogo angbi dunduko; oni ki ini he ya mi nga Yekova, gumba pai.”

22Ya Gbia MBORI wẽ: “Mi ni tire ayepa rukutu bengua ri bagbanga kedara yo, ki rú he ku bani; mi ki yepe gu wesewese behe du ti fogo behe rihe yo, mi ni sa re ki rú he ri gbanga bagangara sono ku ari yo gbe;

23ri basosono bagangara nga ga aYisaraere mi ka rú he ni, ya si kusi abehe ki nizuku, ki sa tihe ni bawene kedara; arika anya aráka tii he yo; azire ni ngbatungara ni ba sa sa adúa gaami bambu ti abehe rogo nzereme.

24Agu angua dunduko du bire yo aína ya mi nga Yekova nazoga gbanga ngua ku sande, ki sa yegbende ngua ni gbanga ngua, ki ugusi iwo ngua, ki mangi ugu ngua si funa. Mi nga Yekova gumba ha, mi amánga ha amanga.”

← Chapter 16 Jump to: Chapter 18 →