Revelation 10

Zande

← Chapter 9 Jump to: Chapter 11 →

1Mi ki bi kura nyanyaki maraika ko nizorõ ngbangbaturũ yo, ni ukadiukadi ko ni dubo; wangu ki du riko yo, kpakpuko ki du wa uru, kpenduko ki du wa we ngumbe.

2Toni kitabu ki du beko ni zarazara ha; ko ki moi kumbanduko auru baime, garenduko ki du auru kpotosende.

3Ko ki poi ni bakere fugo, wa bahu napaa. Ho ko apoi ni, agumba saba ki poi ni gaami fugo.

4Ho agu agumba saba apoi ni, mi aberẽ pa ke pai, ono mi ki gi fugo ngbangbaturũ yo, naya, “Mo díka he kuti agu apai agumba saba nagumba, ka mo ké nga ha ya.”

5Gu maraika mi abi ko ko ru auru baime na auru kpotosende, ko ki tãi kumbabeko ku ngbangbaturũ yo,

6ki zunga he ti rimo gu Ko du ni ungako nye anye kindi, nga gu ko nafu ngbangbaturũ na agu ahe du rogo ho, na kpotosende na agu ahe du rogo ho, na baime na agu ahe du rogo ho, ya i asunguda nga ragoho kindi te.

7Ono ti agu arago nga ga fugo saba maraika, ho ko ka vu mbanya ni, ni gu rago re gu pai nadu ni gbugbu he nga ga Mbori si ki nyasi ku sangba gu wene pangbanga yo ko ayugu he fu gako amoyambu nga anebi.

8Were gu fugo mi agi he ngbangbaturũ yo mi ki gi he berewe, si ki nifura kono du mi ni, ki ya, “Mo ndú, ki di gu kitabu du ni zarazara ha be gu maraika ru auru baime na auru kpotosende.”

9Mi ki ndu koyo du maraika ni ki ya fu ko, ko fu toni kitabu fere. Ko ki ya fere, “Mo dí he ki ri he; si adú vuro yo ni hihii he, ono ngbaro yo si adu ni nzinziri he wa anyege.”

10Mi ki di gu toni kitabu re be maraika ki ri he; si ki du ngbare yo ni nzinziri he wa anyege, ono ho mi ambiri he ni vure yo ki hii ahia.

11I ki ya fere wẽ, “Mo ka gumba pai wa nebi berewe tipa rika aboro, na ngbatunga aboro, na angbatunga afugoyo, na abakindo a.”

← Chapter 9 Jump to: Chapter 11 →