Revelation 3

Zande

← Chapter 2 Jump to: Chapter 4 →

1“Mo ki ke he fu gu maraika nga ga gu kanisa du Sarudi yo ya: ‘Gu ko du na agu atoro du saba nga ga Mbori yo, na agu akerekuru du saba, ko nagumba agi apai re. “‘Mi ini ga mangaapai, wa ya yo ti ro mo ni ungaro, ono mo aima kpi.

2Mo bánda tiro ki nyakasi agu apai nanye, wa si aye ka kpi; bambiko mi abi nga ga mangaapai barangba gi Mbori ni digisidigisi he te.

3Mo tíngidi gu pai tie a wa mo adi he ki nigi he; ki ka kuti ni, ki sa ga berã. Ka mo asó nga gima ha tie ya, mi ayé wa iradĩ, ka mo aína nga gu rago mi ka da yo du mo ni ya.

4Ono mo du na rimo agu yo ni bete yo kina Sarudi yo, nga agu yo agbarasa nga gayo aremu ya; agi yo re nikata na mi na pusi remu, mbiko i re na ni.

5Gu ni ka di be pai, i aúkadi ni na pusi remu; mi agbándaka nga rimoni rogo kitabu unga yo wa sa te, mi akúsa rimoni barangba Buba na barangba gako amaraika.

6Gu ni du na tu gia ha ti ni, ni gí gu pai Toro nagumba fu akanisa.’

7“Mo ki ke he fu gu maraika nga ga gu kanisa du Firaderufia yo ya: ‘Gu ko du ni ziazia ko, nga gu ko nga irarengo, du na gu wiri rifungura be ko nga ga Dawidi, nga gu ko ka zaki he ka boro akisa nga ha ya, ko nakisa ha ka boro azaka nga ha a ya, ko nagumba agi apai re.

8“‘Mi ini ga mangaapai. Mo ngere, mi moi ngbadimo ku mbata yo foro ni zaza ha, nga gu ka boro akisa nga ha ya. Mi ini ya mo du na bete ome, ki nika kuti gi pai, ka mo abasa nga pa rimore ya.

9Mo ngére, mi afú agu yo nga ga gu bambutiria nga ga Satana, nga agu yo naya ti tiyo aYudo nga yo, ka i adu nga wo ya, ono i nagumba zire. Mo ngére, mi asá yo i ye ka fu irisa pati nduro, i ki ini ya mi nakpi nyemu ro.

10Bambiko wa mo aka kuti gu pai nga ga gi hipai, mi abánda ro be gu rago asada, nga gu nikaye ku auru kpotosende dunduko, ka asada agu yo naraka auru gi kpotosende re.

11Mi naye ni ipo; mo ká kuti gu pai dũ be ro, ka i adií nga ga kpakpari bakindo ya.

12Gu ni ka di be pai, mi asá ni ni dangba ri gu yekaru nga ga gi Mbori, ni akúra nga yo berewe te. Mi aké rimo gi Mbori ti ni, na rimo gu bakporo nga ga gi Mbori, nga vovo Yerusarema, nga gu nazorã ngbangbaturũ yo du gi Mbori ni, na vovo rimore a.

13Gu ni du na tu gia ha ti ni, ni gí gu pai Toro nagumba fu akanisa.’

14“Mo ki ke he fu gu maraika nga ga gu kanisa du Raodikiya yo ya: ‘Amina nagumba agi apai re, nga ndikidi dezire ni irarengo, nga enge gu mangimangi ahe nga ga Mbori.

15“‘Mi ini ga mangaapai, a nga mo ni zezere he na ni fafoi he a te. Mi nakpi nyemu mo du ni zezere he watadu ni fafoi he a.

16Were bambiko mo ni uruuru he, ka mo adu nga ni fafoi he na ni zezere he a ya, mi asúka ro ngbare yo.

17Bambiko ya mo, Mi kumuko, ki dungura ũkumuko, zingohe amanga nga re te; ka mo aina nga ha ya rungorungo boro nga mo gbe, adu nga na he be ro ya, nga iravurari, nga kundiri boro a, ya.

18Mi naruga ro mo ngbé dahabu be re, nga gu i agirisi he gbigiwi yo, mo ki du ni boro kumuko; na pusi remu, mo ka ukadi tiro na ni, ka zee adu nga ni yuguyugu he tipa kundiriro ya; na nzeme tipa mbeda bangiro na ni, mo ki ngere.

19Agu yo dunduko mi nakpi nyemu yo mi naza yo ti pai ki nirugu yo; si mo ka du ngangarã ti ni, ki sa ga berã.

20Mo ngére, mi naru pa ngbadimo ki ningoka ha. Si ngia boro gi fugore ki uru ngbadimo, mi aríma koyo du ni ni, ki ri riahe na ni, ni ki niri riahe na mi a.

21Gu ni ka di be pai, mi aásia pa sunga na mi fu ni auru gi mbatabakindo, wa mi adi be pai ki sungu na Buba auru gako mbatabakindo.

22Gu ni du na tu gia ha ti ni, ni gí gu pai Toro nagumba fu akanisa.’ ”

← Chapter 2 Jump to: Chapter 4 →