Revelation 16

Zande

← Chapter 15 Jump to: Chapter 17 →

1Mi ki gi bakere fugo yekaru yo, si niya fu agu amaraika du saba. “Oni ndú, ki uka ga Mbori zinga du rogo akurungbu saba ku rogo kpotosende.”

2Gu bambata ko ki ndu ki uka gu he nadu rogo gako kurungbu ku rogo kpotosende; si ki ye ka du ni gbegberẽ furú aoro ti agu aboro naadu na gu nogodinogodi he nga ga nyarinde ti yo, nga agu yo naairisa kpiaru.

3Gu ue ko ki uka gu he nadu rogo gako kurungbu ku rogo baime; si ki sa tihe ni kure, wa kure kangba boro; agu ahe nadu rogo baime yo, nga gu du ni ungaha, si ki kpiki dunduko.

4Gu biata ko ki uka gu he nadu rogo gako kurungbu ku rogo adi na agugaabi aime, si ki sa tihe ni kure.

5Mi ki gi pa gu maraika nga ga aime ko, ko niya, “Mo nga ruru boro, bambiko wa sapu mo ngbanga wa gere, mo nga gu ko du ho, nga gu ko nadu ho mbata, nga gu Ziazia ko.

6Bambiko i auka kure ga Mbori aboro na ga anebi, mo ki fu kure fu yo i mbiri he. I re na ni!”

7Mi ki gi pa gu kura ni bamotumo yo, ni niya, “Ii Ako Gbia Mbori, du na tandu apai dũ, ga sapangbanga du na rengo na rurupai!”

8Gu biama ko ki uka gu he nadu rogo gako kurungbu ku auru uru, i ki asia ha si nizo aboro ni we.

9Aboro ki nigbitiki be faa we, i ki nigberẽ ngbayo yo ti rimo gu Mbori du na tandu zoga agi arungosi re; ka i asa nga gayo berã ka taasa rimoko ya.

10Gu bisue ko ki uka gu he nadu rogo gako kurungbu ku auru gu mbatabakindo nga ga nyarinde; bitimo ki ti rogo gau ngbi; aboro ki nirunduku mirãyo mbiko egerãha,

11i ki nigberẽ ngbayo yo fu Mbori du ngbangbaturũ yo, mbiko gayo aegerã na gayo aoro; ka i asa nga gayo berã ti gayo mangaapai ya.

12Gu sita ko ki uka gu he nadu rogo gako kurungbu ku rogo gu bakere di nga Ferata; imehe ki ugudi ya gene du ni mbakadimbakadi he tipa agu abakindo naye uroyo.

13Mi ki bi gbigbita atoro biata, ami nikuru ngba daragona yo, na ngba nyarinde yo, na ngba zire nebi yo, ami ki du wa andagba;

14bambiko ami nga atoro adaimona namanga gu pai i aina pa, ti ni nga agu ra naandu fuo abakindo zegino dunduko ka dungura yo sa gu vura nga ga gu bakere rago nga ga Mbori, nga gu ko du na tandu apai dũ.

15(“Oni ngére, mi naye wa iradĩ. Boro maku nga gu ni nangera ki nibanda gani aremu, ka ni adu nga ni kundirini, i ki bi gani zee ya!”)

16I ki dungura yo ku rogo gu ba i niya ti ni rogo pa Ebere yo, Aramegido.

17Gu saba ko ki uka gu he nadu rogo gako kurungbu ku yuge yo; bakere fugo ki poi yekaru yo, rogo mbatabakindo, niya, “Si nyasi!”

18Aikpira gumba ki du, na afugo, na woro gumba a; bakere bazigizo ki du, si adu nga wo mbata wa aboro adu auru kpotosende te, nga gu bakere bazigizo du na baome.

19Gu bakere bakporo ki kparaka rogo biata, agu abaakporo nga ga arikaaboro, si ki tiwi. Mbori ki tingidi pa gu bakere bakporo nga Babera, ka fu gu inga imekakue fu he, nga ga gako ngariangaria zinga.

20Akisanga ki gbandaka dunduko, ka i abi nga abagangara a ya.

21Bakingidi morogumba ki nitiwi ngbangbaturũ yo ku auru aboro, roãha ki du ni ba sa sa wa akiro 40. Aboro ki nigberẽ ngbayo yo fu Mbori mbiko gu rungosi nga ga morogumba; bambiko gaha rungosi adu ni bakere he gbe.

← Chapter 15 Jump to: Chapter 17 →