Revelation 4

Zande

← Chapter 3 Jump to: Chapter 5 →

1Fuo agi apai re, oni ngére, mi ki bi he i ki uru ngbadimo ngbangbaturũ yo, gu bambata fugo mi agi he, nga fugo wa ka si ngia kpangi nafura na mi, ki ya, “Mo yé ku ari no, mi ki yugu agu apai foro nikamanga ku mbata yo.”

2Rure mi ki du rogo Toro yo. Oni ngére, i amoi mbatabakindo ngbangbaturũ yo, gu ko ki sungu auru mbatabakindo!

3Ngbanya gu ko nasungu adu wa gu mbia nga yasipi na sadio. Wangu adu kengerekengere pati mbatabakindo, si adu bangirise wa kina zumeradi.

4Ambatabakindo ki du 24 kirikiri pati gu mbatabakindo re. Mi ki bi abaakumba 24 i sungu auru agi ambatabakindo re, i adu ni ukadiukadi yo ni pusi remu; akpakpari dahabu ki du riyo yo.

5Aikpira gumba ki kuru ti mbatabakindo na afugo, na agumba. Abaro ki du saba naakĩ barangba mbatabakindo, nga gu nga agu atoro du saba nga ga Mbori yo;

6gu rago nadu barangba mbatabakindo adu wa nzere baime, ni kurẽkurẽ he. Unga anya biama adu na dungu abangira ti kpakpura na ku giira yo a, ki du pati mbatabakindo na ku bani na ku bani kirikiri a.

7Gu bambata nya adu wa bahu, gu ue nya ki du wa wiri bagara, gu biata nya adu na kpakpuru wa ga boro, gu biama ru ki du wa gu dingimo nagu ari yo.

8Gu unga anya biama re ki du ni ba sa sa na pupora ni ba sita, na bangira ti ra ni dungu he kirikiri na vura yo a. Ami aongoda nga uru na yuru a te, niya, “Ziazia, ziazia, ziazia, Gbia Mbori du na tandu apai dũ, nga gu ko nadu ho mbata, nga gu ko du ho, nga gu ko nikaye!”

9Ho unga anya aye ni ka fu taarimo na irisa na tambuahe fu gu ko nasunga auru mbatabakindo, nga gu ko nye anye ni ungako kindi,

10agu abaakumba 24 ki tiwi barangba gu ko nasunga auru mbatabakindo, ki irisi gu ko nye anye ni ungako kindi, ki nibafu gayo akpakpari barangba mbatabakindo, niya,

11“Mo gaani Gbia nga gaani Mbori, re mo are na dia taarimo na irisa na tandu, bambiko mo nafu ahe dunduko, si adu ho mbiko sangbaro, ki du ni mangimangi he.”

← Chapter 3 Jump to: Chapter 5 →