Revelation 14

Zande

← Chapter 13 Jump to: Chapter 15 →

1Oni ngére, mi ki bi Wiri Kandoro, ko ru ri gu bagangara nga Siona, agu yo ki du na ko 144,000, nga agu yo du na rimoko ni keke he ti ngbanda kpakpuyo, na rimo Bako a.

2Mi ki gi fugo ngbangbaturũ yo, wa woro dungu aime, na wa woro bakere gumba. Gu fugo mi agi he si adu wa woro atakikundi nataka gayo akundi.

3I ki nibi bia wa Ka si du ni vovo bia barangba mbatabakindo, na barangba gu unga anya du biama, na abaakumba a. A nga boro sa rengbe na wirika gu bia te re, kina agu yo nga 144,000 yo, nga agu yo i atumo yo rogo kpotosende.

4Agi yo re nga agu yo azapa nga tiyo na ade ya, bambiko i nga ngasu yo. Agi yo re nga agu yo naapeka Wiri Kandoro ku ho ko andu ku ho ni dunduko. I atumo agi yo dagba aboro yo re, i du ni amakawa fu Mbori, na fu Wiri Kandoro a.

5I agia nga zire ngbayo yo wa sa te, i zanga serõ.

6Mi ki bi kura maraika, ko nigu bebere ngbangbaturũ yo, nyenye pangbanga ki du ngbako yo ka tungusa ha fu agu yo dunduko naraka auru kpotosende, na fu arikaaboro, na ngbatunga aboro, na ngbatunga afugoyo, na aboro;

7ko ki poi ni bakere fugo, niya, “Oni gúnde ti Mbori, ki taasi rimoko; bambiko rago gako sapangbanga da; oni írisi gu ko naamangi ngbangbaturũ na kpotosende, na baime, na agugaabi aime.”

8Kura maraika, nga gu ue ko, ki ta peka fuo ko, niya, “Si ti, gu bakere bakporo nga Babera, si ti, nga gu he natina arikaaboro i mbiri gu imekakue nga ga gu zinga nga ga gaha meteka.”

9Gu kura maraika, nga biata ko, ki ta peka fuo ko, niya ni bakere fugo, “Ka boro irisi nyarinde na kpiaru, ki du na gau nogodinogodi he ti ngbanda kpakpuni, watadu ti beni,

10ni ambíra gu imekakue nga ga gu zinga nga ga Mbori, nga gu i ambakadi he, adu nga ni kodikodi he ya, rogo gu inga nga ga gako zinga; i arungosi ni na we na baruti, bara bangiri ziazia amaraika na bara bangiri Wiri Kandoro.

11Ngime gayo rungosi nagunda ku ari nye anye kindi, i aongoda nga uru na yuru te, nga agu yo nairisa nyarinde, na kpiaru, na agu yo i anogodi rimoru ti yo.”

12Mbiko gere ga Mbori aboro ka du na hipai ti ni, nga agu yo naka kuti ga Mbori arugute, ki nira fu Yesu kindi.

13Mi ki gi fugo ngbangbaturũ yo, si niya, “Mo ké he ya; Aboro maku nga agu yo nakpi rogo Gbia yo awere a kindi!” Toro naya, “Rengo du! ya i ongodi be gayo sunge; bambiko gayo mangaapai napeka fuo yo!”

14Oni ngére, mi ki bi dubo ni pusi he, auru gu dubo re mi ki bi gu ko nasungu wa kina wiri boro na kpakpari dahabu riko yo, tĩtĩ marã ke ahe ki du be ko.

15Kura maraika ki kuru yekaru yo, ki nipoi ni bakere fugo kovo du gu ko ni nasungu ri dubo, ki ya, “Mo kúsi ga marã ke ahe ki ke ahe kpotosende ba mbiko rago ke he da; mbiko gu zuzuhe nga ga kpotosende aima uga”

16Gu ko nasungu ri dubo, ko ki kusi gako marã ke ahe ku auru kpotosende ũ kpotosende ki du ni keke he.

17Kura maraika ki kuru rogo gu yekaru du ngbangbaturũ yo, ko ki du na tĩtĩ marã ke ahe be ko a.

18Kura maraika ki kuru bamotumo yo, nga gu ko du na tandu zoga we be ko; ko ki poi ni bakere fugo koyo du gu ko ni du na tĩtĩ marã ke ahe be ko, niya, “Mo kúsi ga tĩtĩ marã ke ahe ki dungura gu akpura bakakue nga ga kpotosende, bambiko zuzuhe nazama gbe.”

19Gu maraika ki ba gako marã ke ahe ku auru kpotosende, ki dungura gu bakakue nga ga kpotosende, ki bafu he ku rogo bapiraahe yo, nga gu bakere bapiraahe nga ga ga Mbori zinga.

20I ki simbi he ku rogo gu bapiraahe du ku zegi yo ti bakporo, kure ki gbadi bapiraahe yo ki da ti kina marãrugangba afarasi, ni bagbanga rago wa akirometere 300.

← Chapter 13 Jump to: Chapter 15 →