Revelation 6

Zande

← Chapter 5 Jump to: Chapter 7 →

1Mi ki bi ho Wiri Kandoro aukua gu sa dagba gu dikadika ahe ni saba, mi ki gi pa gu ru sa dagba unga anya biama, u nipoi ni fugo wa woro gumba, ki ya, “Mo yé!”

2Oni ngére, mi ki bi farasi ni pusi ru, mboto ki du be gu ko nasungu auru ru; i ki fu kpakpari fu ko. Ko ki ta kura nidi be apai, ki ndu ka dia be apai.

3Ho ko aukua gu ue dikadika he ni, mi ki gi pa gu ue unga nya, u ki ya, “Mo yé!”

4Kura farasi ki kuru, nga zamba ru. I aasia pa dia zereda auru kpotosende fu gu ko nasungu auru ru, aboro imi tiyo dagba yo. I ki fu bakere basape fu ko.

5Ho ko aukua gu biata dikadika he ni, mi ki gi pa gu biata unga nya, u ki ya, “Mo yé!” Oni ngére, mi ki bi farasi ni bibiri ru; ringbisahe ki du be gu ko nasungu auru ru.

6Mi ki gi he wa ka fugo poi dagba unga anya biama, niya, “Moduka zendehe wa mapunga sa tipa rukutu marã feda sa, amoduka morũ biata tipa rukutu marã feda sa; ono ka mo gbárasi nga pa nzeme na imekakue ya!”

7Ho ko aukua gu biama dikadika he ni, mi ki gi fugo gu biama unga nya, u ki ya, “Mo yé!”

8Oni ngére, mi ki bi farasi ni fukpere ru. Gu ko nasungu auru ru, rimoko angia Kpio; Adisi ki peke fuo ko. I ki asia pai fu yo auru bete kpotosende nga biama ha, i imi aboro ni basape, na ni angbongi, na ni kpio, na ni agu anyarinde nga ga kpotosende ra.

9Ho ko aukua gu bisue dikadika he ni, mi ki bi mbisimo agu yo i aimi yo tipa ga Mbori pai na tipa gu dezire i aka kuti ni, ku tii bamotumo yo.

10I ki ta paa ni bakere fugo niya, “Ako ziazia ndikidi Baira, rago adu waĩ mbata mo nikasapa ngbanga agu yo naraka auru kpotosende ki iri bape kurerani?”

11I ki fu pusi remu fu yo ni ba sa sa; ki ya fu yo i ongodi ngbutuko, daho i ka digisa pa gayo abadiasunge ni, na awirinayo, nga agu yo i ka imo yo wa kina yo.

12Mi ki bi he ho ko aukua gu sita dikadika he ni, ya bakere bazigizo adu, uru ki sa tihe ni bi he, wa gu roko i natu he ni bibiri mange nya, diwi ki sa tiru wa kure;

13agu akerekuru du ari yo, ami ki tiwi ku sende wa vurumo nabafa gbarisaha, ho si nawo ni be bakere yuge.

14Ngbangbaturũ ki guari wa kãikãi waraga ho ka i nikãi he ni, i ki gbisi abaagangara dunduko na akisanga rogo baha.

15Abakindo zegino, na agbia, na abarutirivura, na aboro kumuko, akanga na araniri a, i ki oko tiyo ku simbia yo, na dagba agu ambia nga ga abaagangara;

16i ki ya fu abaagangara na ambia, “Oni tiwi ku auru rani, ki oko rani ti bangiri gu ko nasunga auru mbatabakindo, na be gu zinga nga ga Wiri Kandoro;

17bambiko gu bakere rago nga ga gayo zinga si da; da rengbe ka ru?”

← Chapter 5 Jump to: Chapter 7 →