Revelation 8

Zande

← Chapter 7 Jump to: Chapter 9 →

1Ho ko aukua gu saba dikadika he ni, rago ki ongo kĩ ngbangbaturũ yo wa bebere saa.

2Mi ki bi amaraika saba nga agu yo ninarunda barangba Mbori; i ki fuku ambanya saba fu yo.

3Kura maraika ki ye, ki ru pati bamotumo, ũzo kingiriwe ni dahabu ki du be ko tipa zo fuõngua; i ki fu bakere fuõngua fu ko, ko kodi he na agu akpe nga ga ga Mbori aboro dunduko ri gu bamotumo dahabu nadu barangba mbatabakindo.

4Gu ngime nga ga fuõngua, na agu akpe nga ga ga Mbori aboro, si ki ndu ku ari yo ku barangba Mbori be gu maraika re.

5Maraika ki di gu ũzo kingiriwe re ki hisi he na gu we naadu bamotumo yo, ki ba ha ku auru kpotosende; gumba ki du na afugo, na ikpira gumba, na bazigizo a.

6Agu amaraika saba nadu na ambanya saba, i ki mbakadi tiyo ka vuda ha.

7Gu bambata ko ki vu mbanya, morogumba ki du na we, ni kodikodi he na kure, i ki ba ha ku auru kpotosende, gu ki gbi sa dagba papara kpotosende biata, gu ngua sa ki gbi dagba angua biata, wesewese nvuo ki gbi a dunduko.

8Gu ue maraika ki vu mbanya, si ki du wa ka i ba bakere bagangara ni ngariangaria ha ku rogo baime yo; gu biata papara baime ki sa tihe ni kure;

9gu he ki kpi sa dagba agu unga ahe biata dunduko du rogo baime yo, gu ki kpi sa dagba abaakurungba biata a.

10Gu biata maraika ki vu mbanya, bakere kerekuru ki ti ngbangbaturũ yo, ni ngariangaria ru wa baro, u ki ti ku auru gu sa dagba adi biata na agugaabi aime;

11rimo gu kerekuru re nga Hihiingua. Gu ki du sa ni hihii he dagba papara aime biata; dungu aboro ki kpiki be aime, bambiko i asa ha ni hihii he.

12Gu biama maraika ki vu mbanya, i ki imi gu biata papara uru, na gu biata papara diwi, na gu biata papara akerekuru, ya i bisi biata papara ha, ka gu biata papara uru adu nga na imarago ya, yuru ki du kina wo a.

13Mi ki bi he, ki gi pa dingimo sa, u nigu ari yo, u ki poi ni bakere fugo, niya, “Rungo, rungo, rungo, fú agu yo naraka auru kpotosende, bambiko gu kura afugo nga ga agu ambanya du be agu amaraika biata ata vuda nga ha ya!”

← Chapter 7 Jump to: Chapter 9 →