2 Corinthians 2

Ahirani (आहिराणी नवा करार) - No Year

← Chapter 1 Jump to: Chapter 3 →

1एनासाठे मनी आपला मन मा निश्चय करी लीयेल होत कि तुमले दुख देवा साठे परत तुमना जोळे नई येवू.

2कारण कि जर मी तुमले दुखी करू, त मले समाधान देणार कोणी नई राहाव. फक्त तोच व्यक्ती जेले मनी दुख दिधा.

3एनासाठे मनी ह्या गोष्टी तुमले लिख, एनासाठे अस नई हुई जावो कि मना येवावर जेस्ना कण मले खुशी भेटाले पायजे, मी तेस्ना कण उदास होवू. कारण कि मले तुमी सर्वास्वर ह्या गोष्ट ना विश्वास शे, कि जव मी खुश शे त तुमी सर्वा बी खुश शेतस.

4मोठा क्लेश आणि मन ना कष्ट कण, मी आसा व्हावाळी-व्हावाळीसन तुमले तो पत्र लिखेल होतु, एनासाठे नई कि तुमले दुखी करू, पण एनासाठे कि तुमी त्या मोठा प्रेम ले वयखी लेवोत, जो मले तुमना वर शे.

5आते जर कोणी दुखी करेल शे, त मलेच नई पण तुमले बी दुखी करेल शे. मी अस एनासाठे सांगी ऱ्हायनु, कारण कि मी तेस्ना संगे गैरा कठीण नई कराना देखत.

6असा व्यक्ती ले जो दंड तुमना मधून गैरा विश्वासीस्नी दियेल शे, ते पुरेपूर शे.

7एनासाठे अस करा पेक्षा हय चांगल शे, कि तुमी तेना अपराध माफ करा, आणि तेले प्रोत्साहित करोत, जर तुमी तेले माफ नई करतस त कदाचित तो इतला दुखी हुई जावो कि निराशा मा हार मानीसन ख्रिस्त वर विश्वास कराले सोळी देवो आणि तो जास्त दुख मा डुबी जावो.

8ह्या मुळे मी तुमले विनंती करस, कि तुमी तेले आश्वासीत करत हय देखाळा कि तुमी आते बी तेना संगे प्रेम करतस.

9मनी तुमले ते पत्र एनासाठे लिखेल होत, कारण कि मनी तुमले परखा नि ईच्छा होती, कि तुमी मना निर्देशस्ना पालन करासाठे तयार शेतस, कि नईत.

10ज्या माणुस ले तुमी माफ करतस तेले मी बी माफ करस, कारण कि मी तुमना चांगला साठे ख्रिस्त ना अधिकार कण जे काही बी माफ करानी गरज होती ते माफ करेल शे,

11एनासाठे कि सैतान ना डाव आमना वर नई चालो, कारण कि आमले तेना वाईट उद्देश माहिती शेतस.

12जव मी ख्रिस्त नि सुवार्ता आयकाळा साठे त्रोवस शहर मा उनू, त प्रभु नि मले प्रचार साठे महान संध्या दिधात.

13पण मी गैरा व्याकुळ होतु, कारण कि मले आपला भावू तीत नई भेटणा, एनासाठे मी त्रोवास शहर ना विश्वासीस पासून निघीसन, तीत ले झामला साठे मासेदोनिया प्रांत ले चालना ग्यू.

14पण परमेश्वर ना धन्यवाद होवो, कारण कि ख्रिस्त ना संगे आमना संबंध ना मुळे तो कायम आमनी पुढाकारी करस आणि आमले जीकाळस, आणि आमना द्वारे प्रत्येक जागा वर ख्रिस्त ले ओयखाना सुगंध पसरावस.

15कारण कि आमना जीवन परमेश्वर ना जोळे तारण लेणारा आणि नाश होणारा, दोनीस साठे ख्रिस्त ना सुगंध शेतस.

16नाश होणारस साठे हवू वास घातक हुईसन मोत कळे लीजास, पण मुक्ती लेनारास साठे हवू जीवन दायी हुईसन जीवन कळे लीजास. निश्चित रूप मा कोणी बी ह्या कार्य ले करामा सक्षम नई शे.

17कारण कि आमी त्या गैरास्ना सारखा नईत, ज्या धन ना साठे परमेश्वर ना वचन ना प्रचार करतस. पण आमी मन नि सत्यता कण, परमेश्वर पासून प्रेरित हुईसन आणि परमेश्वर ले उपस्थित समजीसन, ख्रिस्त ना सेवक ना सारखा बोलतस.

← Chapter 1 Jump to: Chapter 3 →