2 Corinthians 9

Ahirani (आहिराणी नवा करार) - No Year

← Chapter 8 Jump to: Chapter 10 →

1यरूशलेम शहर मा राहणारा विश्वासीस्नी मदत ना साठे आर्थिक मदत धाळीसन करामा येणार सेवा ना बारमा, मले तुमले लिखाणी गरज नई.

2कारण कि मले माहिती शे कि तुमनी मदत करानी ईच्छा शे, जेना मुळे मी तुमना बारामा मासेदोनिया प्रांत ना विश्वासीस्ना समोर गर्व करस, कि अखया प्रांत ना लोक मदत करासाठे एक वरीस पासून तयार शेतस. खरज हवू तुमना उत्साह होता जेनी तेस्ना मधून कईक लोकस्ले मदत कराना साठे उभारेल शे.

3पण मनी ह्या तीन विश्वासी भावूस्ले तुमना जोळे एनासाठे धाळेल शे, कि आमनी जो गर्व तुमना बारामा दाखाळा, तो ह्या गोष्ट मा व्यर्थ नई ठरो. पण जस मनी सांग, तसाच तुमी यरूशलेम शहर ना विश्वासीस्ले मदत करासाठे तयार राहोत.

4अस नई होवो, कि कदी कोणी मासेदोनिया प्रांत ना एक विश्वासी मना संगे येवो, आणि तुमले आर्थिक मदत ना संगे तयार नई देखो, त आमले तुमना वर आमना विश्वास मुळे लाजे भरण पळो, पण तुमी आमना तून जास्त लाजे भरश्यात.

5एनासाठे मनी, ह्या विश्वासी भावूस्ले हय विनंती करान चांगल समज कि त्या पहिले पासूनच तुमना जोळे जावोत. आणि तुमनी उदारता ना मुळे जेना बारामा पहिले पासून प्रतिज्ञा करामा एयेल होत, तयार करी ठेवो, कि हय दबाव कण नई पण उदारता कण मदत ना सारखा तयार हो.

6पण गोष्ट त हय शे, कि जो कमी पेरस तो थोडच कापीन बी, आणि जो जास्त पेरस तो जास्त कापीन.

7प्रत्येक झन जसा मन मा निच्चय करस तसाच दान करो, नईत कुड-कुड करीसन आणि नईत दबाव कण, कारण कि परमेश्वर खुशी कण देणार वर प्रेम करस.

8परमेश्वर तुमना गरजास्तून जास्त प्रत्येक प्रकार ना आशीर्वाद देवू सकस. जेना कण प्रत्येक गोष्टी मा आणि प्रत्येक टाईम वर, सर्व काही, जे तुमले आवश्यक हो, तुमना जोळे राहो, एनासाठे कि प्रत्येक चांगला काम साठे तुमना जोळे गैर काही राहो.

9जस पवित्र शास्त्र मा लिखेल शे, “परमेश्वर नि गरजाळूस्ले उदारता कण दिध, तेनी धार्मिकता कायम बनेल राहीन.”

10परमेश्वरच शे, जो शेतकरीले पेरासाठे बीज आणि जेवा साठे भाकर देस. त्याच प्रकारे, तो तुमले संसाधन दिन आणि तेले व्हाळाईन आणि तव तो तुमना मा उदारता ना पिक ले उत्पन्न करीन.

11तो तुमले आखो जास्त मालदार बनावो कि तुमी आखो जास्त उदारता कण दि सको, आणि जव आमी तुमनी दियेल मदत ले त्या लोकस लगून पोहोचाळसुत जेस्ले एनी गरज शे, त त्या परमेश्वर ना धन्यवाद करतीन.

12कारण कि ह्या सेवा पुरी करा कण नईत फक्त परमेश्वर ना लोकस्ना गरजा पुरा होतस, पण लोकस्ना कळून परमेश्वर ना गैरा धन्यवाद होस.

13तुमनी हय सेवा प्रमाण वर मानीसन लोक परमेश्वर नि महिमा करतीन, कारण कि तुमी ख्रिस्त नि सुवार्ता ले मानीसन तेनावर विश्वास करतस आणि सहभागीता नि भावना कण तेस्नी व सर्वास्नी उदारपणा कण मदत करतस.

14त्या तुमना साठे परमेश्वर ले प्रार्थना करतीन. त्या तुमना वर प्रेम करतस, कारण कि तेस्ले माहिती शे कि परमेश्वर नि तुमी लोकस्वर मोठी कृपा करेल शे.

15परमेश्वर ले तेना पुत्र ना रूप मा त्या दान ना साठे जो वर्णन ना बाहेर शे, धन्यवाद हो.

← Chapter 8 Jump to: Chapter 10 →