2 Corinthians 6

Ahirani (आहिराणी नवा करार) - No Year

← Chapter 5 Jump to: Chapter 7 →

1आमी ज्या परमेश्वर ना सहकर्मी शेतस आमी तुमले हय बी विनंती करतस, कि परमेश्वर नि जी कृपा तुमना वर हुईनी व्यर्थ नका राहू द्या.

2कारण कि पवित्र शास्त्र मा परमेश्वर अस सांगस, “योग्य टाईम वर मनी तुमनी प्रार्थना आयकी, आणि तारण ना दिन मनी तुमनी मदत करी.” आयका, आते योग्य टाईम शे, आते तारण ना दिन शे.

3आमी परमेश्वर ना सहकर्मी होवाना नाते कोणाच रस्ता मा अळखळन नई टाकतस, एनासाठे कि कोणी आमना सेवाकार्य वर डाग नई लावो.

4पण आमी प्रत्येक परिस्थिती मा स्वता ले परमेश्वर ना योग्य सेवक प्रमाणित करतस, आमी कष्ट, विपत्ती आणि संकट ले मोठी धीर कण सहन करतस.

5आमले चाबूक कण मारा मा उन, बंदिवास मा टाकामा उन, आमना वर गर्दी नि उत्पात कर. आमनी गैर कष्ट कर, आमी रात-रात भर जागनुत आणि भुक्या ऱ्हायनूत.

6आमी आपला निर्दोष स्वभाव, ज्ञान, सहनशीलता, दयाळूपणा, पवित्र आत्मा ना काम, निष्कपट प्रेम ना द्वारे परमेश्वर ना निवाळेल दास साबित करतस,

7आमनी सत्य ना प्रचार म्हणजे परमेश्वर ना सामर्थ्य कण स्वता ले परमेश्वर ना योग्य सेवक प्रमाणित करेल शे. आमना जोळे धार्मिकता रुपी हत्यार हमला कराले आणि स्वता ना बचाव करासाठे शे.

8जव लोक आमनी प्रशंसा करतस व जव त्या आमना शी घृणा करतस, तव त्या दुसरास्ले सांगतस, कि आमी वाईट व चांगला लोक शेतस, आणि आमले भटकावणारा समजतस, जव कि आमी सत्य बोलतस.

9आमी अनजानस्ना सारखा शेतस, तरी बी सर्वा लोक आमले वयखतस. आमी मरेल समजामा येतस, पण जसा कि तुमी देखतस आमी जित्ता शेतस. जरी आमी मार खातस, पण मरतस नई.

10आमी दुखी शेतस, तरी बी प्रत्येक टाईम ले खुश शेतस. आमी स्वता गरीब दिखतस, पण गैरास्ले आत्मिक रिती कण धनवान बनाई देतस. तरी बी सर्व काही आमन शे.

11ओ करिंथ शहर ना विश्वासीसहोण, आमी तुमना संगे मोक्या गोष्टी करेल शेतस, आमी तुमना वर पुरा हृदय कण प्रेम करतस.

12आमना मन मा तुमना साठे प्रेम कमी नई हुईना, पण तुमना प्रेम आमना साठे कमी हुयेल शे.

13पण आपला पोर समजीसन तुमले सांगस, कि तुमी बी तेना बदला मा पुरा हृदय कण प्रेम करा.

14अविश्वासीस्ना संगे सहभागीता नका ठेवा, कारण कि धार्मिकता आणि अधर्म ना मेय नई होवू सकत. उजाय आणि अंधार नि संगती नई होवू सकत.

15ख्रिस्त नि सैतान ना संगे मित्रता नई होवू सकत. विश्वासी ना संगे अविश्वासी ना कोणताच नात नई होवू सकत.

16मूर्तीस्ना साठे परमेश्वर ना मंदिर मा काहीच जागा नई. कारण कि आमी त जित्ता परमेश्वर ना मंदिर शेतस, जसा परमेश्वर नि पवित्र शास्त्र मा सांगेल शे, “मी त्या लोकस्ना मधमा ऱ्हासु आणि तेस्ना संगे चाल-फिर करसू. मी तेस्ना परमेश्वर होसू आणि त्या लोक मनी प्रजा होतीन.”

17एनासाठे परमेश्वर पवित्र शास्त्र मा आमले सांगस, “त्या लोकस्ना मधून निघी या, आणि तेस्ना पासून आल्लग राहा. आणि अशुद्ध वस्तूस्ले स्पर्श नका करा, त मी तुमले स्वीकार करसू.

18आणि तुमना बाप होसू आणि तुमी मना पोर आणि पोरी होशात, हय सर्वशक्तिमान प्रभु परमेश्वर ना वचन शे.”

← Chapter 5 Jump to: Chapter 7 →