2 Corinthians 5

Ahirani (आहिराणी नवा करार) - No Year

← Chapter 4 Jump to: Chapter 6 →

1आमले माहित शे कि आमना शरीर ह्या पृथ्वी वर एक तंबू ना सारखा शे जेनामा आमी ऱ्हातस, जव हय नाश हुई जाईन त आमले राहा साठे परमेश्वर ना कळून स्वर्गवर एक असा भवन भेटीन, जेले तेनी स्वता नि बनायेल शे आणि ते कायम ना साठे राहीन.

2एनासाठे आमी ह्या शरीर मा कण्हतस आणि येनातून बी जास्त आपला स्वर्गीय शरीर धारण करानी तीव्र लालूस करतस.

3जव आमी त्या स्वर्गीय शरीर ले घाली लीसुत त आमी नागा नई सापळावत.

4आणि आमी ह्या शारीरिक तंबू मा ऱ्हातांना भार कण कण्हतस, कारण कि आमी ह्या जुना शरीर ले काळाले नई देखतस पण तेनावर नवा स्वर्गीय शरीर घालाना देखतस, एनासाठे कि तो मरणहार शरीर कायम ना जीवन मा बदली जावो.

5परमेश्वर नि आमले ह्या बदलाव साठे तयार करेल शे, आणि तेनीच आमले बेना मा आपला पवित्र आत्मा बी दियेल शे.

6एनासाठे आमी कायम हिंमत बनाई ऱ्हातस आणि हय समजतस, कि जठ लगून आमी शरीर मा ऱ्हातस, तठ लगून आमी प्रभु पासून दूर शे, जो स्वर्ग मा शे.

7कारण कि जठ लगून आमी ह्या पृथ्वी वर जित्ता शे, तठ लगून आमी तेले बिगर देखाना विश्वास कण तेना मांगे चालतस.

8एनासाठे आमी धीर ठेवत, आणि शरीर मा आल्लग हुईसन प्रभु ना संगे राहाले आखो बी चांगल समजतस.

9एनामुळे भले आमी तेना संगे स्वर्ग मा राहोत, कि आमी पृथ्वी वर राहोत, आमनी एकच अभिलाषा हय शे कि आमी प्रभु ले आवळतस.

10कारण कि अवश्य शे कि आमी सर्वा ख्रिस्त ना न्याय सिंहासन ना समोर उपस्थित होवोत, कि तो आमना न्याय करो. प्रत्येक व्यक्ती नि शरीर मा ऱ्हातांना जे काही करेल शे, भले ते चांगल राहो कि वाईट, तेले तेना फय भेटीन.

11एनासाठे प्रभु ना भय मानीसन आमी लोकस्ले विनंती करतस कि त्या सत्य वर विश्वास करोत. परमेश्वर ले आमना बारामा सर्व काही माहिती शे आणि मी आशा करस कि तुमी बी आपला हृदयस्मा आमले चांगल्या प्रकारे वयखतस.

12आमी तरी बी आपली बळाई तुमना समोर नई करतस, पण आमना आपला बारामा तुमले गर्व करानी संधी भेटो, आणि तुमी तेस्ले उत्तर देवू सकोत, ज्या मन वर नई, पण दाखाळा ना कामस्वर गर्व करतस.

13जर आमी येळा शेतस, त परमेश्वर ना साठे शेतस, आणि जर समजदार शेतस त तुमना साठे शेतस.

14ख्रिस्त ना प्रेम आमले विवश करी टाकस, कारण कि आमी निश्चित शे, कि जव एक व्यक्ती सर्वा लोकस साठे मरी ग्या त सर्वा लोक मरी ग्यात.

15आणि ख्रिस्त ह्या मुळे सर्वास्ना साठे मरी ग्या कि ज्या जित्ता शेतस, त्या पुळे चालीसन स्वता ले खुश करासाठे नई जगोत पण त्या तेना साठे जगोत जो तेस्ना साठे मरणा आणि जेले परमेश्वर नि परत जित्ता करा.

16एनासाठे आमी आते पासून कोले बी सांसारिक नजर कण नई देखतस, आणि जर आमी ख्रिस्त ले बी पयले सांसारिक नजर कण देखेल होतुत, पण आते पासून असा नई करावत.

17एनासाठे, जर कोणी ख्रिस्त वर विश्वास करस, त तेले नवा मनुष्यत्व भेटेल शे. जुना मनुष्यत्व बीती ग्या, देखा, त्या सर्वा नवा हुई जायेल शेतस.

18आणि सर्वा गोष्टी परमेश्वर ना कळून शे, जेनी ख्रिस्त ना द्वारे आपला संगे आमनी सामंजस्य करी लीधा, आणि सामंजस्य नि सेवा आमले सोपी टाकेल शे.

19म्हणजे परमेश्वर नि ख्रिस्त ना द्वारे आपला संगे जग नि सामंजस्य करी लीधा, आणि लोकस्ना पापस्ले लोकस्वर नई लाव आणि परमेश्वर नि सामंजस्य ना संदेश ना प्रचार आमले सोपी टाकेल शे.

20एनासाठे आमी ख्रिस्त ना राजदूत शेतस, आणि परमेश्वर आमना द्वारे तुमी लोकस्ले बी विनंती करस. आमी ख्रिस्त ना कळून विनंती करतस, कि परमेश्वर ना संगे सामंजस्य करील्या.

21ख्रिस्त पाप पासून अज्ञात होता, पण तेलेच परमेश्वर नि आमना साठे पाप ठराव, कि आमी परमेश्वर नि नजर मा धर्मी बनी जाउत कारण कि ख्रिस्त नि आमना पापस्ना दंड आपला वर लीलीधा.

← Chapter 4 Jump to: Chapter 6 →